1 Petrus 1 - Мукаддес Китап

1‑нҗи бап Саламлар

¹ Иса Месихиң ресулы мен Петрусдан Худайың сайланларына, ягны Понтус, Галатя, Каппадокия, Азия ве Битиния велаятларында дагынык ве гелмишек болуп яшаянлара догайы салам!

² Сиз Атамыз Худайың өңден эден карарына гөрә сайландыңыз ве Мукаддес Рух аркалы мукаддес халк болдуңыз. Худай муны сизиң Иса Месихе табын болуп, Онуң ганы билен пәкленмегиңиз үчин этди. Гой, Худай сизе болдан-бол мерхемет ве парахатлык эчилсин!

Гөкдәки мирасымыз

³ Реббимиз Иса Месихиң Атасы Худая өвгүлер болсун! Ол Өз бейик мерхеметине гөрә, Иса Месихиң өлүмден дирелмеги аркалы бизи тәзе дурмуша ве яшайыш умыдына говшурды.

⁴ Шейле хем сизе гөкде сакланян чүйремез, тегмилтсиз, солмаз мирас берди.

⁵ Сиз иманыңыз аркалы Худайың гудраты билен тә халас эдилйәнчәңиз горалянсыңыз. Бу гутулыш ахыркы гүнлерде аян болмага тайярдыр.

⁶ Шонуң үчин хем муңа йүрекден шатланың. Хәзирки вагтда гысга вагтлайын сынаглара дучар болуп, гам-гусса батсаңыз-да,

⁷ бу сынагларың сизиң иманыңызы беркидйәндигини билиң. Хатда паны алтын хем отда сапланып сыналяндыр. Шейлеликде, алтындан хас гымматлы болан иманыңыз сынагдан гечип, Иса Месих аян боланда, сизе өвги ве шан-шөхрат гетирер.

⁸ Сиз Месихи гөрмедик болсаңыз хем, Оны сөййәрсиңиз. Хатда Оны гөрмесеңиз-де, Оңа иман эдйәрсиңиз ве сөз билен тарыплап болмаҗак бейик шатлыкдан долуп-дашярсыңыз.

⁹ Себәби иманыңызың максадына етип, җаныңызың халас болмагыны газанярсыңыз.

¹⁰ Пыгамберлер сизиң үчин тайынланан бу халас болмаклыга долы дүшүнмәге чалышдылар ве бу мерхемет догрусында өң пыгамберлик этдилер.

¹¹ Оларың калбындакы Месихиң Рухы Онуң чекмели эҗирлери ве эҗирлерден соңкы шан-шөхраты барада овалдан әшгәр этди. Олар буларың нәхили ве нәвагт болҗакдыгы барада Мукаддес Рухуң нәме гөркезйәндигини аңламага чалышдылар.

¹² Шонда бу хабарың пыгамберлер үчин дәл-де, сизиң үчиндиги аян болды. Хәзирки вагтда болса гөкден берлен Хош Хабар сизе Мукаддес Рухуң гудраты билен вагыз эдилйәр. Бу затлара хатда перишделер-де дүшүнмәге чалышдылар.

Мукаддес яшаң

¹³ Шонуң үчин хем әхли пикирлериңизи бир ере җемләп, хүшгәр болуң. Иса Месихиң гелмеги билен өзүңизе берилҗек мерхемете улы умыт баглаң.

¹⁴ Гулак асыҗы чагалар дей болуң, озалкы надан дөврүңиздәки хөвеслериңизе эермәң.

¹⁵ Өзүңизи чагыран Худайың мукаддес болшы ялы, сиз хем әхли эдйән ишлериңизде мукаддес болуң.

¹⁶ Себәби: «Мукаддес болуң, чүнки Мен мукаддесдирин» дийлип языландыр.

¹⁷ Бүтинлей йүз гөрмезден, хер киме эден ишине гөрә хөкүм чыкарян Худайы Ата дийип чагырян болсаңыз, бу дүнйәдәки вагтлайын дөврүңизи Худайдан горкуп гечириң.

¹⁸ Ата-бабаларыңыздан мирас алан бу пуч дурмушыңыздан алтын-күмүш ялы паны затлар аркалы халас болмандыгыңызы билйәнсиңиз.

¹⁹ Терсине, Худайың шикессиз хем тегмилтсиз гурбанлык Гузусы болан Месихиң гымматлы ганы аркалы халас эдиленсиңиз.

²⁰ Месих дүнйә ярадылмаздан өң белленен хем болса, сизиң хатыраңыза бу дөврүң ахырында аян болды.

²¹ Сиз Месих аркалы Худая иман этдиңиз. Худай Месихи дирелдип, Оны шөхратландырды. Шейлеликде, иманыңыз ве умыдыңыз Худайдадыр.

²² Инди сиз хакыката гулак асмак билен өзүңизи пәкледиңиз, чын доганлык сөйгүсине эе болдуңыз. Шонуң үчин бири-бириңизи чын йүрекден сөйүң.

²³ Сиз вагтлайын тохумдан дәл-де, эйсем, эбеди тохумдан, ягны Худайың дири хем бакы галян сөзи аркалы тәзеден догулдыңыз.

²⁴ Чүнки: «Әхли ынсан отлук киминдир, онуң бар гөрки мейдан гүли киминдир. От гурап гидер, гүли хем солар,

²⁵ эмма Реббиң сөзи эбеди галар». Сизе вагыз эдилен хабар, ине, шудур.