1 Patyşalar 12 - Мукаддес Китап

12‑нҗи бап Демиргазык тирелериниң гозгалаңы

¹ Рехабгам Шекеме гитди. Бүтин ысрайыл халкы Рехабгамы патыша этҗек болуп, Шекеме гелипди.

² Небадың оглы Яробгам шол вагт Сүлеймандан гачып, Мүсүрде яшаярды. Ол Рехабгам барадакы хабары эшиденден соң, Мүсүрден гайдып гелди.

³ Тутуш ысрайыл җемагаты Яробгамы чагырдып алып, онуң билен биле Рехабгамың янына гелип, оңа:

⁴ «Какаң бизе агыр зулум этди. Инди сен какаңың бизе эден агыр зулумыны еңлет ве бизе салан салгыдыны азалт, шонда биз саңа гуллук эдерис» дийдилер.

⁵ Рехабгам ысрайыл халкына: «Гидиң-де, ене-де үч гүнден мениң яныма доланып гелиң» дийди. Шейдип, олар гитдилер.

⁶ Онсоң Рехабгам патыша какасы Сүлейманың дири махалында онуң хызматында дуран яшулулар билен геңешип, олардан: «Бу халка нәхили җогап бермеги маңа маслахат берйәрсиңиз?» дийип сорады.

⁷ Яшулулар оңа: «Эгер сен шу гүн бу халка ягшы хызмат эдип, олардан ягшы сөзүңи гайгырмасаң, олар саңа бакы хызмат эдерлер» дийип җогап бердилер.

⁸ Эмма Рехабгам яшулуларың берен маслахатыны әсгермән, өзи билен биле өсүп улалан, хузурында хызмат эдйән яш йигитлер билен геңешди.

⁹ Рехабгам яш йигитлерден: «Сиз: „Сен какаңың бизе эден агыр зулумыны еңлет“ диййән бу халка нәхили җогап бермеги маңа маслахат берйәрсиңиз?» дийди.

¹⁰ Онуң билен биле өсүп улалан яш йигитлер оңа: «Саңа „Какаңың бизе эден агыр зулумыны еңлет“ диййән бу халка өз күлем бармагың какаңың билинден ёгындыгыны айт.

¹¹ Какам сизе агыр зулум эден болса, мен сизе эдилен зулумы хас-да артдырарын; какам сизи чырпы билен җезаландыран болса, мен сизи гамчы билен җезаландырарын дий» дийдилер.

¹² Шейдип, патышаның: «Мениң яныма ене-де үч гүнден доланып гелиң» дийши ялы, Яробгам билен бүтин халк үчүнҗи гүн Рехабгамың янына гелдилер.

¹³ Патыша халка рехимсизлик билен җогап берди. Ол яшулуларың өзүне берен маслахатыны рет этди.

¹⁴ Рехабгам яш йигитлериң берен маслахатына эерип, Яробгама ве ысрайыл халкына шейле җогап берди: «Какам сизе агыр зулум эден болса, мен сизе эдилен зулумы хас-да артдырарын. Какам сизи чырпы билен җезаландыран болса, мен сизи гамчы билен җезаландырарын».

¹⁵ Шейдип, патыша халкы диңлемеди. Бу вака Реббиң шилолы Ахыя аркалы Небадың оглы Яробгам барада айдан сөзүниң амала ашмагы үчин Реб тарапындан шейле тамамланыпды.

¹⁶ Патышаның өзлерини диңлемеҗегини билен ысрайыл халкы оңа: «Бизиң Давут билен нәме шәриклигимиз бар? Йышайың оглунда мирасымыз ёкдур. Эй, ысрайыллар, өйли-өйүңизе гайдың! Эй, Давудың несли, сен өз өйүңе серет!» Шейдип, ысрайыллар өз өйлерине доландылар.

¹⁷ Эмма Рехабгам диңе Яхуда шәхерлеринде яшаян ысрайыллара патышалык этди.

¹⁸ Рехабгам патыша гулларың баштутаны Адорамы Ысрайыла иберенде, ысрайыл халкы оны дашлап өлдүрди. Рехабгам патыша Иерусалиме гачмак үчин, ховлукмачлык билен өз ат арабасына мүнди.

¹⁹ Шейдип, Демиргазык ысрайыл тирелери шу гүне ченли Давудың несиллерине гаршы питне турзуп гелйәрлер.

²⁰ Яробгамың гайдып гелендигини эшиден бүтин ысрайыл халкы онуң янына адам ёллап, оны йыгнанышыга чагырып, тутуш Ысрайыла патыша этдилер. Яхуда тиресинден башга Давудың несиллериниң ызына дүшен болмады.

Шемагя пыгамберлик эдйәр

²¹ Рехабгам Иерусалиме гелди. Демиргазык ысрайыл тирелерине гаршы уршуп, патышалыгы Сүлейманың оглы Рехабгама гайтарып бермек үчин, бүтин яхуда хем-де бенямин тирелеринден йүз сегсен мүң сайлама уршуҗылар топлады.

²² Эмма Худайың адамы Шемагя Худайың шу сөзи аян болды:

²³ «Сүлейманың оглы, Яхуданың патышасы Рехабгама, бүтин яхуда хем-де бенямин тирелерине хем-де галан халка

²⁴ Реб шейле диййәр дий: „Сиз доганларыңыз болан ысрайыл халкының гаршысына урушмаң. Хер кес өз өйүне гайтсын, чүнки бу болан вака Мендендир“». Олар Реббиң сөзүне гулак асып, Онуң айдышы ялы өйлерине гитдилер.

Яробгам Худайдан йүз өвүрйәр

²⁵ Онсоң Яробгам Эфрайым даглык юрдунда Шекем галасыны бина эдип, шол ерде месген тутды. Соңра ол Шекемден гидип, Пенувалы бина этди.

²⁶ Онсоң Яробгам өз ичинден шейле дийди: «Инди патышалык ене-де Давудың несиллерине гайдып гелер.

²⁷ Эгер бу халк Реббиң өйүнде гурбанлык бермек үчин Иерусалиме гитмегини довам этдирсе, онда оларың йүреги өз җенабы, Яхуда патышасы Рехабгама тарап өврүлер. Олар мени өлдүрип, Рехабгамың янына өврүлип барарлар».

²⁸ Шейдип, патыша пикирини җемләп, ики саны алтын гөле ясап, халка йүзленип, шейле дийди: «Иерусалиме шу вагта ченли гатнаныңыз бесдир. Эй, ысрайыллар, сизи Мүсүрден чыкаран худайларыңыз шулардыр».

²⁹ Ол алтын гөләниң бирини Бейтелде, бейлекисини хем Данда гойды.

³⁰ Шейдип, халк гүнә этди. Халк сежде этмек үчин Бейтелдәки ве Дандакы алтын гөләниң янына узак ере гитдилер.

³¹ Яробгам шейле хем сеждегәхлер гуруп, левилерден болмадык адамлардан руханылар белледи.

³² Яробгам секизинҗи айың он бәшине Яхудадакы гечирилен байрам ялы байрам эдип, гурбанлык сыпасында гурбанлык берди. Ол өз ясан гөлелерине гурбанлыклар хөдүр этмек үчин, Бейтелде хем шейле этди. Онсоң ол Бейтелде өз гуран сеждегәхлерине руханылар белледи.

³³ Яробгам өз сайлан айы болан секизинҗи айың он бәшине Бейтелде дикен гурбанлык сыпасының янына гитди. Ол ысрайыл халкы үчин байрам эдип, якымлы ыслы түтетги якмак үчин гурбанлык сыпаның янына гелди.