Yibraniyeku 11 - Mewar Alqawarang

Maito

¹ Maito ke zu̱ndi zhire ɓu̱ ɗyi nyem saki memu̱na rem nu̱ ɗyinan, ɗya maitar ɗyi nu̱ke yiterem nu̱ na ɓa.

² Maito saki tu̱ nduki zhu gwa dlu̱r she Magham.

³ Chem wa zu̱n nu̱ ɗyine Magham du̱ng larji ndu̱ ɓalar mbu̱ men nu̱ ku̱nshe maito, ɗyi nu̱ke chem a naran nang a vi mbe ɗyi nu̱ke ɓu̱ shi na ɓa.

Nduki nu̱ khaki wang mbe Maito

⁴ Maito saki tu̱ Khabila vu̱r sadke ye Magham nu̱ dukki ɓu̱ Kayinu mbaari. Shir wanangang saki tu̱ gwa dlu̱r she Magham nu̱ ɗyine chin nu̱ dambi, nu̱ke Magham wa dlu̱ sadke ɓaranang. Aa nu̱ke Khabila wa mu̱ɗi, yang a ɓalar ma ɓar meeni ku̱me maito ɓaran.

⁵ Maito saki tu̱ da Enok ɓara, nu̱ na mu̱t ɓa. Yang nu̱ nduk gwa nda ɓa, ku̱me Magham wa da nda ɓara. Me ku̱ dandang wa kha ndu̱ saidu nu̱ ɗyine wa gwa makhtar she Magham.

⁶ Nduk ɓu̱ gwa dlu̱r she Magham waare maito ɓa, ku̱me wa ku̱s ku̱ njif nu̱ songki bing ndu̱ Magham maita nu̱ ɗyine Magham a nje, yang chin ka ɓiiki nduki nu̱ke a laɓ maa nu̱ chin kap.

⁷ Ɗya maito saki tu̱ Nukhu mbu zu̱r ɓu̱ Magham tu̱ kwaɗa du̱mbu̱l ɗyimi ma ɗana rafti ɓaran, qu̱rse Magham wa wuri nda nu̱ ɗyine ɗyiku nu̱ke nu̱ nduk na dong ɓa. Nang saki tu̱ larji gwa kumari, tu̱ chin yang gwa ɗye mbu̱ ge dambi nu̱ ka gwaki nu̱ ku̱nshe maito.

⁸ Maito saki tu̱ Yibram mbu zu̱r ɓu̱ Magham tu̱ ku̱s njiv ma yir ye maa nggur zum nu̱ shiki alqawaran yenda za ka ɓa zu̱m ɗye mbu̱ ge ni. Tu̱ yang ku̱s njivi aa nu̱ke nu̱ zu̱n ye maa nu̱ke chin a yir su̱ ɓa.

⁹ Maito saki tu̱ shi khar runggi mbu̱ maa nu̱ Magham shiki alqawaran yenda. Wa kha mbu̱ shekhɗekhku, Yishaku ndu̱ Nyagham kha wanang tu̱k, wor nu̱ zu̱mki ɗye mbu̱ ge alqawar nang su̱yen ndu̱ chin.

¹⁰ Jiwa a nggu̱t kya ghai nu̱ke buuri sar saaran ndu̱ daasaran ndu̱ njif nu̱ du̱nki ɗya Magham ndu̱ ɗyinan.

¹¹ Maito saki tu̱ Yibram kha woi, aa nu̱ke wa geema maɗyi sarchi ni, yang ɓu̱ Saratu nokhzan kwarandan. Wa maita nu̱ ɗyine Magham ɗya nu̱ zhire mbe alqawar ɓaran.

¹² Ku̱me nang, nu̱ ku̱nshe njif dandi nang, aa nu̱ke wayen ndu̱ mu̱tan, qusonggi khang a viki mbe nda nu̱ke khang ɓaanda wa anjinjeku nu̱ viɗi, wa wuɗyiri nu̱ke a me gaawu gwaanji nu̱ke ku̱na shiga.

¹³ Nduki nang kap mu̱t mbe maito ɓaanda. Yang nu̱ dlu̱ ɗyi nu̱ Magham shiki alqawaranang ɓa dong, tu̱ na ɗyi nu̱ke a ɓakh, wa tu̱k mu̱ndi naran ku, tu̱ saida ku nu̱ ɗyine wora khar runggu, wor qusa larji nang ɓa.

¹⁴ Nduki nu̱ke a pooni ɓalarku nang a wutan ku ye dalang nu̱ ɗyine a laɓ ghai ɓaanda nu̱ ɗyin wora.

¹⁵ Mbu̱ tu̱ga a kor ghai nu̱ wor njigkyang, ai, tu̱ga wa gwa zalale ma ku̱ gaɓ ku.

¹⁶ Yang sakya memu̱na wor nu̱ ɗyine ghai nu̱ dukki mbaari, nang ke mbu̱ viɗi, nang ke ɗyi nu̱ saki nu̱ kha ye Magham ma ɗye kawa ku̱ qa nda za Maghamndi ɓaanda ɓa. Ku̱me wa daasa ghai ye wor shwat.

¹⁷ Maito saki Yibram, sarchi nu̱ buuki nda, tu̱ vu̱r Yishaku ɓar ma dla sadke. Nang wa wut nu̱ ɗyine chin nu̱ dlu̱ki alqawarang wa daasa ma vu̱r nji woi ɓaran kaada fengtu̱lengndang ɓara.

¹⁸ Aa nu̱ke Magham wa ze nda za, “Yishaku ke njif nu̱ke ka zu̱mki guma ndu̱ qar dlu̱moro nu̱ ku̱nshe nda.”

¹⁹ Yibram wa shi kwaari nu̱ ɗyine Magham ka ɗu̱ma ji ndu̱ mu̱ti. Chem ka ɗu̱ma zu̱ ye mbu ɓalar nang, nyem za dlu̱ Yishaku ɓar mbe mu̱ti.

²⁰ Maito saki tu̱ Yishaku sa barke ye Nyagham ndu̱ Yisuwa ɗyine ɗyiku nu̱ke a ɓari.

²¹ Maito saki tu̱ Nyagham sa barke ye aa nyi da chele qusonggi ɓu̱ Yusufu, tu̱ ghar ghai ye Magham sarchi nu̱ cheeki nu̱ ve saaɓir ɓaran.

²² Maito saki tu̱ Yusufu, shi ɓalar viri ɓu̱ Israila ɓar mbu̱ ghai Masar, sarchi nu̱ shiki bing ma mu̱ti tu̱k, wa shi ɓalar ɗyine ɗyi nu̱ke ku̱ ɓa shi ku ndu̱ qu̱tli ɓaranku.

²³ Maito saki tu̱ man Musa ndu̱ zhin tuka nda gha me chere kunung qu̱rse wa kha nda. Shi wanang ku ku̱me wa na nda kharan zum nu̱ aa nyi woi, nu̱ tu̱k sawar ɗyi nu̱ kuji wopaki ɓa.

²⁴ Maito saki gaanje Musa wa shi gori tu̱ zhang ku̱ nduk qa nda za chin yi ɓu̱ Firauna nggotom Masar.

²⁵ Wa dat ku̱ za nji bonye ndu̱ nduki ɓu̱ Magham ye ku̱ tu̱k nji mu̱ndi ɓu̱ solar me sarchi koɗomma.

²⁶ Nu̱ke wa sa memu̱naran nu̱ ɗyine ɗye ɓi nu̱ke a guma, tu̱ da bonye nyin zaki ku̱me Masiya ma ɗyi mbarkandi nu̱ dukki gu̱nar nu̱ke a mbu̱ ghai Masar.

²⁷ Maito saki tu̱ njig ghai Masar, waare sawar shokhnar ɓu̱ kuji. Tu̱ ching gha shaanggu̱ɗang ku̱me wa na njif nu̱ke nduk nu̱ka na nda ndu̱ yiti ɓa ndang ɓa.

²⁸ Maito saki tu̱ Musa shi Tabar peetar ɗyinang, tu̱ batl tom ma ku̱ nu̱ tlaghar gomirkwang su̱ɓa qusa Israila ɓa.

²⁹ Maito saki tu̱ qusa Israila dla Gaawu gwaanji vyangndang nu̱ dam, wa ɗyin wuɗyiri ghwakandi. Yang nu̱ nduki nu̱ Masar mbuki gaanje wora, tu̱ ɗyimang, da wora.

³⁰ Maito saki tu̱ garuk ghai Jeriko gu̱ɗa qu̱rse nduki Israila wa baara nda ku sar mut.

³¹ Maito saki tu̱ man mu̱nggu̱l nu̱ka qaki nda za Rakhab ɗana, nu̱ mu̱t su̱yen ndu̱ nu̱ song maito ku nang ɓa, nu̱ke wa dlu̱ nu̱ nggu̱ti maa ku mbu̱ su̱nggaɗa wa ɗya raptan ku.

³² Yang ngga zu̱kya nu̱m tu̱ka? Sarchi khara shi nga ɓala nu̱ ɗyine Gidiyon, ndu̱ Barak, ndu̱ Samson, ndu̱ Jafta, ndu̱ Dauda, ndu̱ Samaila, ndu̱ annabiku ɓa.

³³ Maito saki tu̱ nduki nang ra kwaaɗarku, tu̱ shi tlu̱nar dambi ku, tu̱ dlu̱ ɗyiku nu̱ shiki alqawaran. Tu̱ nduki nang za me mu̱zamndiku nu̱ gha,

³⁴ tu̱ piita ɓai du̱mbu̱rkandi ku, tu̱ lawa mbe mu̱ti sarchi nu̱ke a ma ku̱m wor ndu̱ kaskarku. Aa nu̱ke khukhutan ku tu̱ kha ma nu̱ du̱mbu̱r ku. Tu̱ gwa zalale mbu̱ ghai dakhlari tu̱ bu̱rta sojeku mbu̱ ghaiku zum zum.

³⁵ Tu̱ nusuku dlu̱ mu̱tiku ɓaanda nu̱ jiiki ku mbe mu̱ti. Tu̱ vu̱r bonye ye ɓeeni ndukiku, tu̱ yang zhang ku̱ ngga wor gha, ku̱me a shim ku̱ ɓa ji ndu̱ wor ɓar mbe mu̱ti mbe khar nu̱ dukki mbaari.

³⁶ Tu̱ ɓeenan za maatli ɓalarku ndu̱ kurpi, tu̱ gu̱n ɓeenan gha ndu̱ yakhli, tu̱ mbuk ɓeenan nu̱ mbu̱ zhaaru̱m.

³⁷ Tu̱ mbuk wor ndu̱ ndogdiku, tu̱ ku̱rta wor nu̱gha ndu̱ tlugdi dlar qu̱fari tu̱ tlagha wor nu̱gha tu̱k ndu̱ kaskarku. Ɗye sar nu̱ke a ve wor ɗya ku̱zu̱mndi ndu̱ɓangku ndu̱ ɓu̱ guno wutiku, a baara maa ku. Tu̱ shi khar ɓaanda mbu̱ song ndu̱ bonye mbe takashi.

³⁸ Nu̱ke larji wa kata maa khar ɓa nda. Wa baara maaku ye maa nu̱ke aaki nje ɓa, ndu̱ ɗyin dlengku. A qaandi ku mbu̱ gulang ndogdiku, ndu̱ mbu̱ geeku nu̱ke a gargha vu̱ghai.

³⁹ Nduki nang kap Magham wa saida ɗyi mbarkandi ɗyine maito ɓaanda, yang kap ndu̱ nang aa da a nje nu̱ dlu̱ki alqawaran nu̱ shiki ye wora dong ɓa.

⁴⁰ Magham wa daasa ɗyi nu̱ dukki mbaari yerem. Kope chem a su̱yen ka khaki ku nyeedlan.