Tlu̱nar ɓu̱ Pudeku 28 - Mewar Alqawarang

Bulus ɗyin Chenjesi Malta

¹ Qu̱rse chem wa ɗana chem tu̱k za chenjesang dlu̱man za Malta.

² Nduki nu̱ mbu̱ maarang wa shi mu̱nkir yerem maɗyi. Wa dlu̱rerem ku kap, ta pi ɓai yerem ku̱me a romndi ndu̱ mbiti.

³ Tu̱ Bulus ɗa taba qu̱farku tu̱ ki saran nu̱ mbu̱ ɓaiyang, tu̱ yang su̱ti ghu̱ɓti a vi ku̱me gu̱rgu̱r ɓu̱ ɓaiyang tu̱ ku̱t khar Bulus.

⁴ Nu̱ nduki nu̱ mbu̱ maarang naki su̱tang a lalanggur ve khar Bulus tu̱ ze yen ku za, “Khuski nang ɗya nu̱ tlaghar mu̱ɗi shwat. Kap nu̱ lawar me mu̱ti nu̱ shiki mbu̱ ɗyim chitndi nang wonji mu̱ti a mburi nda ku̱me ɗye ɓai nu̱ shiki ba a mburi nda.”

⁵ Tu̱ yang Bulus mba nda nu̱ mbu̱ ɓaiyang yang su̱tang nu̱ shi aa nu̱m yenda ɓa.

⁶ Tu̱ ndukyang taman za mbu̱ varan nu̱ khu̱l ɓa, ka nggu̱ɗi fan ndu̱ fan tu̱ mu̱ɗi. Yang nu̱ shoɓki a nggu̱ti nda ku nu̱ na ɗyi nggur wa gwa nda ɓa, tu̱ kwaari ɓaanda nggoɗi tu̱ zu̱ ku za, “Khuski nang ɗya maghamndi ngguri.”

⁷ Dle gume ɓu̱ maarang dlu̱man za Pubu̱liyus, yang dalang ku a nje kha nda bing ndu̱ ye maa nu̱ke chem a sang. Chin zhurki rem tu̱ vu̱r maa qaandi yerem mbarkandi me qaandi kunung.

⁸ Yang zhin Pubu̱liyus nu̱ da lawan ɓa, a nje qaandan ndu̱ ɓalɓal ndu̱ nggindi tom. Tu̱ Bulus vi nu̱ she nda tu̱ shi barar yenda tu̱ du̱ng kharan nu̱ ɗyine nda, tu̱ khuskyang shaana.

⁹ Nu̱ ɗyi nang shiki tu̱ nu̱ khaatiku kap nu̱ke a mbu̱ maarang ku̱s ɓar ku she Bulus a shaana wora.

¹⁰ Tu̱ vu̱r ɗyiku yerem khang nu̱ke chem a ma yir vaarem mbu̱ du̱mbu̱l tu̱k, tu̱ taba koɗokh me ɗyiku nu̱ke chem a shimndan yerem kap.

Bulus wa Khu̱l mbu̱ ghai Roma.

¹¹ Qu̱rse chere kunung chem ji mbu̱ du̱mbu̱l ɗyim nu̱ke a nje chenjesi Malta gaanje woɗar nomandang. Ɗya du̱mbu̱l na ɓa ki Alekhzandu̱riya nu̱ ɗye shipar nu̱ka qaki nda za, “Mugɗar maghamndiku.”

¹² Nyem khu̱lki Sirakus chem qan kunung nje.

¹³ Ji ɓaarem far chem ɗi chem khu̱l Rigiyum. Nu̱ qanki da tu̱ khu̱kheetang gu̱r ku̱n kona, vi dumaaran chem khu̱l Puteyali.

¹⁴ Chem gama ndu̱ nu̱ mbu Yesu ku nggur ye maaran tu̱ khuterem za shem qaandi mut she wora. Ndu̱ wanang ndu̱ wanang chem khu̱l Roma.

¹⁵ Ni nu̱ mbu Yesu ku nu̱ Roma tu̱kki labar khu̱dli ɓaarem, ta ɓa ku ma gaɗa rem mbu̱ gomar Apiyus, kom ndu̱ ye maa nu̱ka qaki za Maa Zhurti Kunung. Nu̱ Bulus naki wor tu̱ kuna Magham, tu̱ shaata gwa shokhku̱rokh me bu̱ni.

¹⁶ Nyem khu̱lki Roma tu̱ njig Bulus ku̱ khan mbu̱ rafti nu̱ke ka ɓi ki mu̱zhindi chere su̱yen ndu̱ soje nu̱ke a bu ɗyinan.

Waazu ɓu̱ Bulus Roma.

¹⁷ Qu̱rse qaandi kunung, tu̱ Bulus qa dlegumeku ɓu̱ Yakhudeku. Nu̱ tabaki ku tu̱ ze wor za, “Nyeezaku, aa nu̱ke nang shi zop nggur ye nduki ɓaarem ɓa, yang nang zhang meghai ɓu̱ zhikaneremku gha ɓa. Kap ndu̱ nang tu̱ ku̱si nga ku mbu̱ ghai Urshalima ta vu̱rti nga nu̱ mbu̱ khar Romeku ma ku̱ gu̱ndi nga gha.

¹⁸ Yang nu̱ laɓki mbu̱ ɓalarang, tu̱ gwa za nang shi zop nggur nu̱ shipaki ku̱ tlagha nga nu̱ gha ɓa.

¹⁹ Nu̱ Yakhudeku zhangki ye wor gha, tu̱ ku̱s ma da nga kumarang nu̱ gume Kaisar, aa nu̱ke nga dakya zhaano ɓu̱ nduki ɓaarem ɓa.

²⁰ Nang ke ɗyi nu̱ saki tang shim na nu, chem shi ɓalar ndu̱ tunu. Ku̱me zu̱n nu nu̱ke gu̱ndi nga nu̱ gha ndu̱ yakhli nang ku̱me chin nu̱ke Israileku a sa memu̱na wor nu̱ ɗyine ɓar ɓaranang.”

²¹ Tu̱ Yakhudekwang tlogha yenda za, “Ɓaarem nyem gwa lagarkati nggur na viki Yakhudiya ɗyine ɓalar ɓaa ɓa, yang mu̱dlerem a nje na ɓa ki tu̱ vu̱r labar ɓaa ɓa, nu̱ nduk zu̱ ɗyi malkandi nu̱ ɗyino ɓa.

²² Yang chem a shim tu̱k mi nu̱ khaaro, ɗyi nyem zu̱nki ɗyenda chin ke mewar shogar nang aakya zu̱ malkandi nu̱ ɗyinan.”

²³ Nu̱ saki sarchi nu̱ke wor ka gamaki tu̱ ɗa ɓa ku ye maa nu̱ zhurki nu̱ nje, yang ɗu̱ ku wor khang maɗyi tu̱ duk nu̱ gumang. Ji dumaari, ma yir mugdi tu̱ ki ɓalar ye wor a saida kwaaɗar ɓu̱ Magham, a wuta dut wor nu̱ she Yesu nu̱ ku̱nshe njiv Taurete ɓu̱ Musa ndu̱ lagarkati ɓu̱ annabikwang.

²⁴ Tu̱ ɓeenan maita ɗyi nu̱ zu̱kyang, yang ɓeenan nu̱ maita ɓa.

²⁵ Ku̱me nang nu̱ da mbu̱ ɓu̱ yen ku ɓa. Me ku̱ njig ye maaranang ku, tu̱ Bulus zu̱ za, “Alapa Jiimbi shakhshakhndi wa shi zhire nu̱ shiki ɓalar ye zhikaneremku nu̱ ku̱nshe annabi Yishaya. Nu̱ zu̱ki za,

²⁶ ‘Ɗu she nduki ku nang no za, tu̱ktan, tun ka tu̱ki, yang tun ɓu̱ da mban aa da ɓa, naran, tun ka ki naran, yang tun ɓu̱ saida ɗyen aa da ɓa.

²⁷ Ku̱me memu̱na nduki nang kaaku̱ɗakh, wa za dlu̱mndi wor nu̱ gha, wa za yiti wor nu̱ gha, mbu̱ ku̱me nang ɓa tu̱ga yiti wor ka na ku, dlu̱mndi wor ka tu̱ki. Yang memu̱na wor ka da mban kom ku̱ ɗa gaɓ ku nu̱ sha tang shaana wora.’

²⁸ “Yang zu̱n man gha, Magham wa ru̱k labar gwar ɗanari nu̱ she nduki nu̱ke ɗya Yakhudeku ɓa. Yang ka dlu̱ ku.”

²⁹ Nu̱ zu̱ki ɓalarku nang tu̱ Yakhudekwang zhang me yen ku tu̱ ɗu̱ vaanda.

³⁰ Tu̱ Bulus kha gha me sonyi rap mbu̱ rafti nu̱ke a ɓiiran ɓyang, a zhur nduki na ɓa ki she nda kap.

³¹ Nu̱ke nu̱ nggu̱tl nda waazu ɓa, tu̱ ki waazu kwaaɗar ɓu̱ Magham a shogar ye nduki ɗyine Yesu Masiya sawa su̱ ɓa.