Tlu̱nar ɓu̱ Pudeku 27 - Mewar Alqawarang

Bulus wa Vi Du̱mbu̱l Ɗyim ma Yir Roma

¹ Nu̱ daasaki za chem a ma yir Italiya mbu̱ du̱mbu̱l ɗyim tu̱ sa Bulus ndu̱ nduki nggur nu̱ke khiiran zhaaru̱m nu̱ mbu̱ khar soje gwaanji nu̱ Roma ngguri, dlu̱man za Juliyos, a da chele tabar sojeku ɓu̱ Kaisar.

² Nyem viki nu̱ mbu̱ du̱mbu̱l nu̱ Adu̱ramitiyum nu̱ke a ma mbu mbu̱ ɓeena ghaiku nu̱ konggol Asiya, chem nggaasi yiri. Yang Aristakus, khuzi Tasalonika ɓu̱ Makidoniya nggur a nje su̱yen ndu̱ chem.

³ Ɗaatlu̱maaran chem khu̱l nu̱ Sidon. Tu̱ Juliyos shi mu̱nkir ye Bulus tu̱ njigti nda ku̱ ɗa na raptan ku nu̱ shimki na nda ku.

⁴ Nyem jiiki fan mbu̱ du̱mbu̱lang, khu̱kheeti a kare ndu̱ chem, ku̱me nang chem mala nu̱ Saipurus ye maa nu̱ke khu̱kheetang du̱mbu̱ran kata.

⁵ Qu̱rse chem wa dla Ɗyim chitndi nu̱ke a bing ndu̱ dlar ghai Kilikiya ndu̱ Pamfiliya, chem khu̱l nu̱ Mira mbu̱ dlar ghai Likiya.

⁶ Far tu̱ soje gwaanji nu̱ Roma gwa du̱mbu̱l nggur nu̱ Alekhzandu̱riya nu̱ke a yir Italiya, tu̱ sa rem nu̱ mban.

⁷ Chem qan khang chem a yir laya laya, chem khu̱l bing ndu̱ Kinidus ndu̱ bonye. Nu̱ khu̱kheeti ku̱naki rem chem mala ye maa nu̱ke khu̱kheet si ɓa, gaanje chenjesi Ku̱rit bing ndu̱ Salmoni.

⁸ Chem peeta nje ndu̱ bonye, chem khu̱l maa nggur nu̱ka qaki za Maa Maasi Mbarkandi bing ndu̱ ghai Lasiya.

⁹ Nu̱ke chem su̱bu̱rki sarchi maɗyi nje, tu̱ yirang kha ndu̱ sababu maɗyi ku̱me sonyiri wa ɗu̱ ɓakh ku̱me Tabar Dli ɗyin Solarku wa peeta. Tu̱ Bulus dut dlu̱mndi wor

¹⁰ za, “Nduki, nga na yir ɓaarem nang chem a mbu̱ sababu yang chem ka mbu̱ɗ ɗyiku khang. Ɓu̱ ching nu̱ ɗyine shipiti ɓaarem ku ndu̱ du̱mbu̱lang ɗyenda ɓa, kap ndu̱ nyifi ɓaarem.”

¹¹ Yang Juliyos nu̱ maita ɗyi nu̱ Bulus zu̱kyang ɓa. Me ɓu̱ nang, tu̱ maita kya ɗyi nu̱ ni chi du̱mbu̱lang ndu̱ nu̱ zhin du̱mbu̱lang zu̱ki ku.

¹² Nu̱ke maa lu̱bar nu̱ke a Lisiya mbar ma ku̱ du̱mbu̱lku kha gha nje mbu̱ nomandi ɓa, tu̱ nduki khang wut za ku̱ zu̱m guma ndu̱ yirang, tu̱ wuta ku ma khu̱l nda Finikiya mbu̱ ka shi, shi nda nomandi nje. Yang ma chingndi ɓu̱ du̱mbu̱l nu̱ Finikiyang a Ku̱rit nu̱ke a nggu̱t zan gaɓti ku̱n mugu kom ndu̱ kona gaɓti ku̱n mugu.

Gu̱rti Maari Chele Ɗyim Chitndi

¹³ Nu̱ khu̱kheeti nggaki su̱ piiri ku̱n kona laya laya, tu̱ taman ku za ɗyin wor wa vi, tu̱ dut vi nu̱ ku̱ski du̱mbu̱lang ku tu̱ mbu konggol ku ndu̱ chenjesi Ku̱rit, bing ndu̱ me gu̱mndang.

¹⁴ Nu̱ shoɓ ɓa tu̱ khu̱kheeti gwaanji nggur na jiiki zan ku̱n ɗokhatla tu̱ gu̱r ɗyine chenjesang.

¹⁵ Nu̱ khu̱kheetang ghwatki du̱mbu̱lang, tu̱ ku̱na yir ye maa nu̱ khu̱kheetang a viki si, chem njig khu̱kheetang tu̱ ki tu̱pa rem.

¹⁶ Nyem mbu ki gaanje chenjesi nggur nu̱ka qaki za Kauda, ye maa nu̱ khu̱kheetang remtaki, chem a dut du̱mbu̱l koɗommandang nu̱ she du̱mbu̱lang ndu̱ bonye.

¹⁷ Qu̱rse wa dut du̱mbu̱l koɗomandang nu̱ mbu̱ gwaanjang, tu̱ shi me shaandiku tu̱ gu̱n zoori tu̱ mala du̱mbu̱l gwaanjang si. Ma ku̱ wul ɓa tu̱ zhur ndu̱ vi taɗakandi nu̱ke a ku̱s du̱mbu̱lang ma ku̱ khu̱kheetang gwa tu̱ tu̱pa du̱mbu̱lang ku̱me ɓu̱ ɗu̱ma chiran ku ɓa. Shi wanang ku ku̱me a sawa ku̱ mbuk wor nu̱ mbu̱ wuɗyiri nu̱ Sirtis nu̱ka shiki khiirang ɓa.

¹⁸ Nu̱ke ɗyimang a me yirti, a yakhta rem maɗyi, tu̱ nggaasi ghar shipiti nu̱ke a mbu̱ du̱mbu̱lang ɓara, tu̱ wos ku nu̱ mbu̱ ɗyimang.

¹⁹ Ye fu̱ɗar nu̱ kunung yang, tu̱ wos ɓeeni ɗye koɗmar du̱mbu̱lang nu̱ mbu̱ ɗyimang ndu̱ khar wora.

²⁰ Nyem qanki khan nyem na fu̱ɗa ɓa yang anjinja ɓa, wonji khu̱kheetang a vu̱r bonye yerem, chem fet memu̱narem ɓar nu̱ ɗyine chem ka ɗana.

²¹ Yang nu̱ke wa shoɓ ku nu̱ zu̱m ɗye zu̱mku ɓa, tu̱ Bulus ji tu̱ ching gha chele ɓaanda. Tu̱ zu̱ za, “Nduki, tu̱ga tun wa tu̱k ɓalar ɓang nang zu̱ki nga za njig mi maa Ku̱rit ɓa, tu̱ga nun nggu̱ɗ nu̱ mbu̱ sababu ndu̱ mbu̱ti ɗyikunang ɓa.

²² Yang leendang nga zu̱ran yenu tun gu̱n memu̱na nu, ku̱me nduka nje nu̱ke ka mu̱tki chele ɓaanu ɓa, chem ka mbu̱dkya du̱mbu̱lang ɗyenda.

²³ Ku̱me mbu̱ɗa nu̱ ru̱kti ngguri ɓu̱ Maghamndi ɓanga nu̱ke nga ghar ghai yenda, tu̱k wa ching sha.

²⁴ Tu̱ zu̱ ya za, ‘Bulus tu̱k na sawa ɓa. To ka ching nu̱ gume Kaisar shwat. Wonji tu̱k mu̱nkir ɓu̱ Magham ka sa tu̱ nduki nu̱ke tun a yir su̱yen ɗana ku ku̱me to.’

²⁵ Ku̱me nang tun gu̱n memu̱na nu, nduki, nga maita Magham nu̱ ɗyine ɗyinang ka shi ba wa nu̱ zu̱ki ya.

²⁶ Yang wa ku̱s ku̱ khu̱kheeti mbukterem nu̱ ɗyin chenjesi ngguri.”

²⁷ Ye virkir nu̱ gwaanggu̱m vat, ba a tu̱pa rem mbu̱ ɗyim chitndi nu̱ Adu̱riya. Chele virkiri, tu̱ nu̱ tlu̱nar du̱mbu̱lkwang taman za chem wa shi bing ndu̱ me gu̱mndi.

²⁸ Nu̱ buuki kirti ɓu̱ ɗyimang tu̱ gwa wa khu̱l mbu̱ bu̱n ɗyirap. Nyem zu̱mki guma koɗom, tu̱ buu ku tu̱k, tu̱ gwa khu̱l mbu̱ bu̱n gwaanggu̱m qurmun.

²⁹ Nu̱ke a sawa ku̱ du̱mbu̱lang gu̱rsha ye ndogdiku ɓa, tu̱ sa viku wor vat taɗakandi ku nu̱ gaanje du̱mbu̱lang ma ku̱ nggu̱tl du̱mbu̱lang yiri. Tu̱ ku̱s khuɗ Magham ku ku̱ maa ɗal ɗau.

³⁰ Yang nu̱ chi du̱mbu̱lkwang a shim ɗa nda vaanda. Tu̱ ɗa zhur ndu̱ du̱mbu̱l koɗommandang tu̱ shi ku wa wora ma zhurkya vi taɗakandang ɓar gume du̱mbu̱l gwaanjang.

³¹ Tu̱ Bulus ze soje gwaanji nu̱ Roma ndu̱ ɓeeni sojekwang za, “Mbu̱ nduki nang nu̱ ching gha mbu̱ du̱mbu̱l nang ɓa, tun ɗana ɓa.”

³² Tu̱kti wanang tu̱ sojekwang ɗakh zooku ɓu̱ du̱mbu̱l koɗommandang nu̱gha, tu̱ njig nda a geeri ɗyin ɗyimang.

³³ Nu̱ maari shiki bing ma ɗaatli, tu̱ Bulus khuɗ wor ku̱ zu̱m ɗye zu̱mndi ku. A zu̱ran ye wor za, “Meeni qaandi gwaanggu̱m vat tun a khar tamandi, nun zu̱m aa nu̱m ɓa.

³⁴ Yang nga khutonu zu̱m ma ɗye zu̱mndi tun tu̱k mu̱ndi vaanu, nu̱ke nduk a nje chele ɓaanu nu̱ke ka mbu̱ɗki aa ye ghosi ɗyinan da ɓa.”

³⁵ Nu̱ zu̱ki wanang tu̱ da ɓurti toliri, tu̱ kuna Magham gume wor kap. Tu̱ ɓakhla nu̱ gha tu̱ ki njiiran.

³⁶ Tu̱ kap ɓaanda gwa du̱mbu̱r tu̱ zu̱m ɗye zu̱mndi ku.

³⁷ Yang chem nu̱ke a mbu̱ du̱mbu̱lang chem won rap ndu̱ ɗyin mut qu̱m njong.

³⁸ Nu̱ zu̱mki ku tu̱ mbu̱ wor zhi, tu̱ kata taɗar mbu̱ du̱mbu̱lang nu̱gha nu̱ woski alkame ɓaanda nu̱ mbu̱ ɗyimang.

Wudli ɓu̱ Du̱mbu̱lang

³⁹ Nu̱ maa ɗatlki nu̱ tlu̱nar du̱mbu̱lkwang nu̱ zu̱n maa nu̱ke wora si ɓa, yang wa na ɓodlong nggur nu̱ wuɗyiri, tu̱ daasa ku ma ku̱ ɗu̱ ndu̱ du̱mbu̱lang ɗyin wuɗyirang mbu̱ ka shi.

⁴⁰ Tu̱ dla zooku nu̱ khubki vi taɗakandikwang, tu̱ njig wor nu̱ mbu̱ ɗyimang, tu̱ pu̱r zoori nu̱ ku̱ski ɗye chi du̱mbu̱lang nu̱ gha ye sarchi nang. Kom tu̱ da khobkiku nu̱ke a gume du̱mbu̱lang nu̱ viɗi torop ma ku̱ khu̱kheetang tu̱pa du̱mbu̱lang nu̱ guma. Tu̱ sa ɗyin wor ma yir ku̱n me gu̱mndang.

⁴¹ Yang nyem khu̱lki ye maa nu̱ke me bu̱n gaawu rap ka gamaki, tu̱ du̱mbu̱lang ɗu̱kh nu̱ ve wuɗyirang tu̱ ɗyin du̱mbu̱lang vi nu̱ mbu̱ wuɗyirang tu̱ ku̱na yakhtari. Tu̱ du̱mbu̱lang nggaasi wudli, ku̱n gana ku̱me me yirti nu̱ke zo ɗyimang a san.

⁴² Tu̱ sojekwang shim tlagha nduki na viki ndu̱ wor zhaaru̱mang nu̱gha ma ku̱ aa nduk da chele ɓaanda ge ɗyim tu̱ ɗa varan ɓa.

⁴³ Yang nu̱ke soje gwaanji ɓu̱ Roma wa shim ɗana Bulus tu̱ nggu̱tl wora. Tu̱ zu̱ za ku̱ nduki nu̱ maghaki geeri nggu̱ɗ nu̱ mbu̱ ɗyimang ku̱ ge ku ma yir me gu̱mndang.

⁴⁴ Tu̱ ɓeenan kwang dlan ɗyin qu̱far du̱mbu̱lang, ndu̱ ɓeeni wudli du̱mbu̱lang, nu̱ wanang tu̱ kap ɓaanda khu̱l me gu̱mndang sur.