Tlu̱nar ɓu̱ Pudeku 26 - Mewar Alqawarang

Bulus wa ching ma lawa ɗyinan gume Agu̱ripa

¹ Tu̱ Agu̱ripa ze Bulus za, “Wa vu̱r zalale yor ma ku̱ lawana ɗyinoro.” Kom tu̱ Bulus da kharan, tu̱ nggaasi ɓalar za:

² “Nga shi loobo shwat, kuji Agu̱ripa, ku̱me nga ma ɓalar nu̱ke ka lawaki nga ɗyine ɗyiku nu̱ Yakhudeku zu̱ki nu̱ ɗyina gumero.

³ Nu̱ shi wa nu̱ke ta shi zu̱ndi maɗyi ɗyine me ghaiku ɓu̱ Yakhudeku ndu̱ ɗyi nu̱ke a keele ɗyinan kwang ɓa. Yang nga khutoro, to gwa dlu̱mdor ya nu̱ kaɗanyi.

⁴ “Yakhudeku kap wa zu̱n pooni khar viti nang shiki ji ɓang nyakhtli, mbu̱ ghai ɓaarem gumapaali ndu̱ Urshalima.

⁵ Wa zu̱ndi nga ku ɗau, mbu̱ wa shim ku ka ɗu̱ma saidaran nu̱ ɗyine shwat nga da chele Pariseku nu̱ shiki khar shanggu̱ɗangndi mbu̱ pooni ghaari ghai ɓaarem nang.

⁶ Nga chingndan gume nu a kuma nga ku̱me nga sa memu̱nara nu̱ ɗyine nyedli alqawar nu̱ Magham shiki ye zhikaneremku.

⁷ Nang ke alqawar nu̱ me ghaiku gwaanggu̱m rapndang saki memu̱na wor na nda nyedli ɓaran, tu̱ ku̱s tlu̱nar ɓu̱ Magham ku fu̱ɗar ndu̱ virkiri. Gunndi, sar memu̱nar nang shiki nu̱ ve nyedli alqawar nang saki tu̱ Yakhudeku ki na zop ɓanga!

⁸ Nu̱m saki tu̱ kha nggamaala she nu mbu̱ Magham ka ji ndu̱ mu̱tikwang na?

⁹ “Aa nga ndu̱ vara nga na wa torop sha ɗau fara ku̱ shi nga ɗyiku khang nu̱ke ka nggu̱tlki zu̱mndi gume ɓu̱ Yesu khuzi Nazaret.

¹⁰ Nang ke ɗyi nang shiki Urshalima, tang gwa zalale she kuruku rututundi, ma ku̱ khi nga daatiku ɓu̱ Magham gha zhaaru̱m. Sarchi nu̱ke a tlagha wora, nga gu̱n san.

¹¹ Nga mbu̱ wor mbu̱ kib tabar ku nga kuma wora nga sa ku̱ pu̱z dlu̱m Yesu ku. Ku̱me nga shokhnar ndu̱ wor maɗyi, nga mbu wor mbu̱ ghaiku nu̱ke a mbu̱ dlar ghaiku nggur ma vu̱r bonye ye wora.

Labar Nggooti ɓu̱ Bulus ye Agu̱ripa

¹² “Nga mbu̱ ɗyikunang, fu̱ɗar nggur nga yir Damaskus ndu̱ zalale ɓu̱ kuruku rututundi ndu̱ lagarkati zalale nu̱ vu̱rki yang.

¹³ Chele fu̱ɗar ɓwa nga yiti njivi, Gunndi, tang na yarang nggur nu̱ dukki ɓu̱ fu̱ɗa tu̱ shi wuti mbu̱ viɗi, ye maa nu̱ke nga ndu̱ nu̱ yir ɓang kwang a sang.

¹⁴ Nyem nggu̱ɗki nu̱ yaghai kap ɓaarem, tang tu̱k su̱qur nggur nu̱ke a ɓalar ya ndu̱ me Aramayik za, ‘Shawulu, Shawulu, nu̱m saki to ki vu̱r bonye ya? Kare nu̱ke ta shiran ndu̱ nga nang, ta nggumkya vaaro.’

¹⁵ “Tang tlogha nga za, ‘To kiya, Ku̱man?’ “Tu̱ Zhinerem gwaanji zu̱ ya za, ‘Nga ke Yesu nu̱ke ta vu̱r bonye yendang.

¹⁶ Yang ju nu̱ viɗi. Nga wut vara yoro ma ku̱ sa nga ro shi na tlu̱nar ya, to saida ɗyi no naki sha, ndu̱ ɗyi nu̱ke nga ma wutan yoro guma fan.

¹⁷ Nga lawa ɓar mbu̱ khar nduki ɓaaro, ndu̱ nduki nu̱ke ɗya Yakhudeku ɓa, wor nu̱ke nga ma ru̱ktor nu̱ she wora.

¹⁸ To ka qu̱n yiti wor tu̱ vi ɓar mbu̱ zhum maari ta gaɓku nu̱ mbe yarangi, ka njig kwaaɗar ɓu̱ Sheɗan tu̱ ɗa ɓa ku she Magham. Shir wanang ka sa tu̱ yaapa solar ku ɓaanda ye wora, tu̱ gwa me shakhti ɗye mbu̱ ge su̱yen ndu̱ nduki nu̱ wakaki vaanda ku̱me wa maita ku.’

¹⁹ “Ku̱me nang kuji Agu̱ripa, nga mbu kya su̱qur ɗyi nu̱ ɗa ɓa ki ya mbu̱ viɗang.

²⁰ Tang nggaasi waazu ye nduki nu̱ Damaskus, kom tang shi ye nduki nu̱ Urshalima ndu̱ dlar ghai ɓu̱ Yakhudiya kap. Kom tang shi ye nduki nu̱ke ɗya Yakhudeku ɓa nu̱ ɗyine ku̱ ɗa mbu̱m ku ku̱ ɗa gaɓ nu̱ she Magham, tu̱ shi ɗyi nu̱ke ka wutki za wor wa nggoɗ tu̱k.

²¹ Nang ke ɗyi nu̱ saki tu̱ Yakhudeku ku̱si nga mbu̱ rafti ɓu̱ Maghamang a shim ku̱ tlagha nda nga nu̱ gha.

²² Yang tu̱ Magham shaata nga ma ɓar meeni, nang ke ɗyi nu̱ saki nga saidu nang ye nduki rututundi ndu̱ nu̱ katar du̱mbu̱r. Nga zu̱kya ɗyi nggur zum ndu̱ ɗyi nu̱ annabiku ndu̱ Musa zu̱ki za ka ɗatlang ɓa.

²³ Nang ke ɓalar nu̱ zu̱ki ku za wa ku̱s ku̱ Masiya za bonye, tu̱ kha ma njif nu̱ gumapaali nu̱ jiiki mbe mu̱tiku. Ku̱me ka vu̱r yarang ye nduki kap nu̱ ku̱nshe nang, Yakhudeku ndu̱ nduki nu̱ke ɗya Yakhudeku ɓa.”

²⁴ Bulus a mbe ɓalarang tu̱ Festus shi ɓalar ndu̱ du̱mbu̱r tu̱ zu̱ za, “Bulus to yirtan! Khang zu̱ndi no shiki wa mbu̱m ɗyinor nu̱gha!”

²⁵ Yang tu̱ Bulus tlogha yenda za, “Gundi Festus, nga yirtan ɓa. Nga zu̱kya zhire mbu̱ khangkal ɓanga.

²⁶ Ai, kuji wa zu̱n ɗyiku nang, nga ka shi ɓalarang yenda sawa su̱ ɓa. Nga zu̱n shwat wa zu̱n ɗyikunang kap, ku̱me ɗyiku nang shi mbu̱ tuka ɓa.

²⁷ Kuji Agu̱ripa, ta maita annabiku mu? Nga zu̱n ta maita.”

²⁸ Tu̱ Agu̱ripa tlogha ye Bulus za, “Na ta ma gaɓ ndu̱ nga ma Ku̱rista mbu̱ sarchi koɗommandi nang mu?”

²⁹ Tu̱ Bulus zu̱ yenda za, “Aa mbu̱ sarchi koɗomma aa ka da sarchi, nga khuɗ ku̱ Magham sa to ɗyenda ɓa, yang kap ndu̱ nduki nu̱ke a gwa dlu̱mndi wor ya meeni nang, ku̱ kha wa nga waare yakhliku nang.”

³⁰ Tu̱ kuji ji nu̱ viɗi, tu̱ nggomna ji tu̱k su̱yen ndu̱ Bu̱rnis ndu̱ nduki nu̱ke kharan gha su̱yen ndu̱ wora.

³¹ Nu̱ ɗa viki ku ye maa kumarang tu̱ shi ɓalar ndu̱ yen ku za, “Ai, khuski nang nu̱ shi ɗyi nu̱ shipaki ku̱ khi nda gha ɓa yang ku̱ tlagha nda ɓa.”

³² Tu̱ Agu̱ripa zu̱ ye Festus za, “Mbu̱ tu̱ga njif nang nu̱ da kumarang nu̱ gume Kaisar ɓa tu̱ga ka ngga nda gha.”