Tlu̱nar ɓu̱ Pudeku 25 - Mewar Alqawarang

Bulus wa khuɗ ku̱ ɗa Kuma nda gume Kaisar

¹ Qu̱rse qaandi kunung nu̱ nggomna Festus a khu̱lki tu̱ ku̱s tlu̱nari, tu̱ ji Kaisariya tu̱ ɗu̱ Urshalima.

² Tu̱ yang kuruku rututundi ndu̱ dlegumeku ɓu̱ Yakhudeku da zhaano ɓu̱ Bulus nu̱ she nda.

³ Tu̱ khuti nda ku za ku̱ ɗa gaɓ ndu̱ Bulus Urshalima ku̱me sa nda nduki ku̱ luɓagha ku̱ tlagha nda nda nu̱ gha yiti njivi.

⁴ Tu̱ Festus tlogha za, “Nduki a njig a bu ɗyin Bulus mbu̱ ghai Kaisariya, yang nga yir far mbu̱ qaandan.

⁵ Ku̱me nang ku̱ dlegumeku ɓaanu ɗu̱ su̱yen ndu̱ nga, mbu̱ khuski nang wa shi zop ngguri tang a kuma nda.”

⁶ Nu̱ duk yen ndu̱ qaandi miyasi ma yir gwang she wor ɓa, tu̱ gaɓ varan nu̱ Kaisariya. Vi dumaaran tu̱ khan ɗyin zhakhɗye kumari, tu̱ sa ku̱ ɗa ɓa ndu̱ Bulus gume nda.

⁷ Ɓar ɓu̱ Bulus, tu̱ Yakhudeku na ɓa ki Urshalimang kara Bulus tu̱ da zhaano ɓaranku ɗyine ɗyiku khang maɗyi du̱mbu̱rkandi nu̱ke nu̱ ɗu̱ma wut zhire ni ku ɓa.

⁸ Tu̱ Bulus keela ma lawa ɗyinan a zu̱ran za, “Nang shi zop mbu̱ woparku ɓu̱ Yakhudeku ɓa, yang nang shi zop ye rafti ɓu̱ Magham ndu̱ Kaisar sar da ɓa.”

⁹ Yang nu̱ke Festus a shim mu̱n mbu̱ Yakhudekwang tu̱ zham Bulus za, “Ta tlogha ku̱ ɗu̱ na Urshalima ku̱ ɗa shi kumar nang yor gumera ɗyine ɗyikunang mu?”

¹⁰ Tu̱ Bulus tlogha za, “Fan nang nga gume maa kumar ɓu̱ Kaisar, yang shipa ku̱ shi kumar nang fan. Nang shi zop nggur ye Yakhudeku ɓa, aa to, ta zu̱ni.

¹¹ Mbu̱ tu̱ga nga shi zop nu̱ khu̱lki ku̱ tlagha nga, ai, ngam ɓu̱ zhang ku̱ tlagha nga ɓa. Yang mbu̱ zhire kha wor mbe ɗyiku nu̱ daki zhaano ɓang ɗyinanang ɓa, nduk a nje nu̱ke ka vu̱rki nga nu̱ mbu̱ khar wor ɓa. Nga khutan ku̱ shi kumar nang gume Kaisar.”

¹² Qu̱rse Festus wa shi sawari ndu̱ nduki ɓaran, tu̱ tlogha za, “Nu̱ke ta khuɗ ku̱ shi kumarang gume Kaisar, to ka ɗu̱ gume Kaisar.”

Bulus gume Agu̱ripa ndu̱ Bu̱rnis

¹³ Nu̱ qanki koɗom qu̱rse nang, tu̱ Kuji Agu̱ripa ndu̱ Bu̱rnis khachin nusukandi a ɓa ku Kaisariya ma laale ye Festus.

¹⁴ Nu̱ke ka qan ku khang nje, tu̱ Festus a ɓa ndu̱ ɓalar ɓu̱ Bulus ye kuji. Tu̱ Festus ze nda za, “Khuski nggur a nje nu̱ Feliks njigki ya zhaaru̱m.

¹⁵ Sarchi nang ɗu̱ki Urshalima tu̱ kuru rututundi ndu̱ dle gume ɓu̱ Yakhudeku da zhaano ɓu̱ khuski nang, tu̱ khuti nga ku za ku̱ dla nga mbu̱ kumar nu̱ke a ɗyine ndang nu̱ gha ku̱ khan ɗyine nda.

¹⁶ “Yang nga ze wor nga za chem Romeku nyem ka dla mbu̱ kuma waare yir ndu̱ nduk gume nduki nu̱ daki zhaano ɓaran ɓa. Wa ku̱s ku̱ vu̱r zalale lawar ɗyinan yenda ɗyine ɗyi nu̱ nduki daki zhaano ɓaran ɗyinanang.

¹⁷ Nang ke ɗyi nu̱ saki ba nyem a ɓa ki su̱yen ndu̱ wora, nang su̱bu̱r sarchi ɓa tang dlan ɗyin zhakhɗye, vi dumaaran tang sa ku̱ ɗa ɓa ndu̱ khuskyang.

¹⁸ Ni nu̱ dar zhaano ɓaran kwang jiiki nu̱ ɗa ɓa ndu̱ zhaano nggur gu̱rgu̱rndi nu̱ ɗyine nda wa nang tamanki ɓa.

¹⁹ Yang ɓalarku a nje ɗyine ghaari ghai ɓaanda nu̱ke nu̱ ra Bulus ku ɗyinan ɓa, kom ndu̱ Yesu nggur nu̱ mu̱tki yang Bulus wa maita za fan ɓa njif nang a nje ndu̱ nyifiri.

²⁰ Nu̱ke nang gwa ɗyiku nu̱ke dla nga mbu̱ kumar nang su̱ ɓa, tang zham Bulus mbu̱ ka ɗu̱ Urshalima ku̱ ɗa shi kumar ɗyikunang njigi.

²¹ Tu̱ yang Bulus khuɗ za ku̱ ɗu̱ ndu̱ ɓalar nang gume kuji gwaanji Kaisar ku̱ kuma, kom tang sa ku̱ bu ɗyinan ku kope sarchi nang ru̱kki nu̱ she Kaisar.”

²² Tu̱ kuji Agu̱ripa ze Festus za, “Aa nga ngga shim tu̱k khuski nang nu̱ vara.” Tu̱ Festus tlogha za, “To ka tu̱kti nda wuri.”

Bulus Gume Agu̱ripa

²³ Vi dumaaran tu̱ Agu̱ripa ndu̱ Bu̱rnis shi viri mbu̱ lukti kwaaɗari, ta ɓa ku su̱yen ndu̱ kwakhneku ndu̱ ndukkudaandi nu̱ mbu̱ ghayang tu̱ vi nu̱ mbu̱ sham tabarang. Tu̱ Festus sa za ku̱ ɗa vi nu̱ Bulus.

²⁴ Tu̱ Festus zu̱ za, “Kuji Agu̱ripa, ndu̱ kap nduki nu̱ke a su̱yen ndu̱ chem, wonji njif nu̱ Yakhudeku kap a ɓa ki ndu̱ zhaano ɓaran mbu̱ ghai Urshalima, ndu̱ fan tu̱k. A zhaano ku za nu̱ shipa ku̱ njigti nda ndu̱ nyifi ɓa nggwa.

²⁵ Yang ɓang nang na ɗyi nu̱ shiki nu̱ khu̱lki ku̱ tlagha nda ɓa. Yang tu̱k nu̱ke chin nu̱ varan khuɗki za ku̱ ɗu̱ ndu̱ kumarang gume Kaisar, tang zu̱ nga za ngga ɗu̱ si she nda.

²⁶ Aa nu̱ke ɓala nje khara shwat nu̱ke ngga bu̱laki ye nu̱ du̱mbu̱rang kuji nu̱ Roma ɗyine nda ɓa. Nang ke ɗyi nu̱ saki tang a ɓa ndu̱ chin gume nu, nu̱ shi wa nu̱ke ta nje, to kuji Agu̱ripa ɓa, ku̱me qu̱rse chem wa laɓ mbu̱ ɓalar ɓaranang bai ngga gwa ɗyi nu̱ke ngga bu̱laki.

²⁷ Ku̱me ye nar ɓanga, ɗya me nggu̱bu̱ng mbu̱ nga ru̱k njif nu̱ khiiki nda gha zhaaru̱m waare wuti ɗyiku na daki zhaano ɓaran nu̱ ɗyinanang.”