Tlu̱nar ɓu̱ Pudeku 24 - Mewar Alqawarang

Yakhudeku wa Da Zhaano ɓu̱ Bulus.

¹ Qu̱rse qaandi qurmun, tu̱ gorkir ɓu̱ kuruku, Khananiya, a ɓa ndu̱ dlegumeku ngguri ndu̱ lauye nggur dlu̱man za Tartulus, ma da zhaano ɓu̱ Bulus gume nggomna.

² Nu̱ ɗa viki ndu̱ Bulus, tu̱ Tartulus shi zhaano ɓu̱ Bulus gume nggomna Feliks a zu̱ran za, “Magham ku̱r nyifiri! Kaɗari ɓaaro saki tu̱ nduki ɓaarem kha ndu̱ qaandi memu̱na, khar viti ɓaarem wa shi mbari ku̱me ta ka nggu̱t maa guma;

³ nduki ɓaarem nu̱ aa fu̱n mbe anyi njiva a kuna ku maɗyi.

⁴ Yang nga khutoro, ku̱ memu̱na su̱bu̱r ɓa, mbe mu̱nkir ɓaaro nggo dlu̱mndo ye ɗyi nu̱ke chem a ma zu̱ran yoro.

⁵ “Njif nang ɗya nu̱ keele, a ɓar ndu̱ damtar chele ɓu̱ Yakhudeku nu̱ mbu̱ larji nang kap, chin ke gorkir ɓu̱ nduki nu̱ka qaki var wor za wor ke Nazaret ku, nang ke nu̱ mbu Yesu ku.

⁶ A shim sa rafti ɓu̱ Magham ku̱ kha ru̱knaran, kom chem ku̱si nda.

⁷ Kom tu̱ gorkir ɓu̱ sojekwang Lusiyas tu̱ ɗa ɓa nu̱ ɗyinerem nu̱ du̱mbu̱r tu̱ lawa nda ɓar me khaarem.

⁸ Ta sa nu̱ dar zhaano ɓaran kwang ku̱ ɗa ɓa gumero. Mbu̱ ta zham nda to ka tu̱k ɗyi nu̱ke chem a da zhaano ɓaran ɗyinanang.”

⁹ Tu̱ Yakhudekwang gu̱n san a zu̱ran ku za ɗyi nu̱ zu̱kyang ba wanang.

Bulus wa Lawa Ɗyinang gume Feliks

¹⁰ Nu̱ nggomna wutki ye Bulus ku̱ shi ɓala, tu̱ zu̱ za, “Nu̱ke nga zu̱n ta shi sonyi khang ta kumar ye nduki nang, ngga lawa ɗyina ndu̱ kasha.

¹¹ Ai mbu̱ ta nggu̱ɗi to ka gwa yir ɓang Urshalima ma ghaari ghai ye Magham nu̱ peeta qaandi gwaanggu̱m rap ɓa.

¹² Yang nu̱ dar zhaano ɓang ku nang sar da nu̱ gwa nga ngaa keele ndu̱ njif nggur mbu̱ rafti ɓu̱ Maghamang ɓa, yang nu̱ gwa nga ndu̱ ɗye dar khangkal mbu̱ kib tabar ɓu̱ Yakhudeku ɓa, yang aa mbu̱ ghai zum ɓa.

¹³ Aa ɗyi nu̱ke a zu̱ran ku gume nang ɓu̱ ɗu̱ma wut zhire ni yor ku ɓa.

¹⁴ Nga tlogha tun da mbu̱ ɗyi nu̱ zu̱ki ku nang ke nga ghar ghai ye Maghamndi ɓu̱ zhikanerem ku mbe Njivang, nu̱ke a zu̱ran ku za zhire ɓa. Nga maita kap ɗyi nu̱ke a nje bu̱laran mbu̱ Taurete ndu̱ lagarkati ɓu̱ annabikwang.

¹⁵ Nga sa memu̱nara ye Magham ba wa nu̱ke ndukiku nang a shiran nu̱ ɗyine ka ɓa ji ndu̱ mu̱tiku, nu̱ dambi ku ndu̱ nduki nu̱ke ɗya nu̱ dambi ku ɓa kap.

¹⁶ Nang ke ɗyi nu̱ saki aakochi nga wute mbu̱ memu̱nara ku̱ kha nga mba rap rap ɓa yang damtar nggur nje chele ɓang ndu̱ Magham ndu̱ nduk ɓa.

¹⁷ “Na ɗo, qu̱rse sonyi ku koɗom ta nga gaɓ nu̱ Urshalima ndu̱ shaatar ye nu̱ nungndiku chele nduki ɓanga, kom tang shi vu̱rti ye Magham tu̱k.

¹⁸ Nga ɗyinan tu̱ gwa nga ku mbu̱ rafti ɓu̱ Maghamang. Nga woɗa waka vara nu̱ khar shakhshakh, yang tabar nduki a nje sha ɓa, yang nang shi ɗye dar khangkal ɓu̱ nduki ɓa.

¹⁹ Yakhudeku nggur a nje qusa Asiya nu̱ke a nje ye maaran, wor shipaki ku̱ ɗa ɓa ku gume ro tu̱ da zhaano ɓanga mbu̱ ɓalar nggur a nje kha wor ɗyina.

²⁰ Mbu̱ wanang ɓa, ku̱ nduki nang zu̱ zop nu̱ gwaki nga si sarchi nu̱ ɗu̱ki ndu̱ nga gume tabar dle gume ɓu̱ Yakhudekwang.

²¹ Bai tu̱k ku̱ shi ɓalarku ɗyine ɗyinang zu̱ki sarchi nu̱ chingki nga gha gume wor nang zu̱ki nga za, ‘A kuma nga meeni gume nu ku̱me ɓalar jiiri mbe mu̱ti.’ ”

Wa Du̱ng Bulus gha Kaisariya.

²² Yang nu̱ke Feliks wa zu̱n su̱ tun khang ɗyine Njiv ɓu̱ Yesu, tu̱ ching wor gha tu̱ zu̱ za, “Bu ma ku̱ Lisaya gorkir ɓu̱ sojeku a ɓa dong kom tang dla kumar ye nu.”

²³ Tu̱ Feliks sa ku̱ soje ɓu̱ Roma gwaanji nggu̱t Bulus, ku̱ ranna nda maɗyi ɓa, yang ku̱ nggu̱tl raptan ku ɓar she nda ma ku̱ shaata nda ndu̱ tun ɓa.

²⁴ Nu̱ qanki koɗom, tu̱ Feliks ndu̱ nokhzan, dlu̱man za Durusila nu̱ke ɗya Yakhuda a ɓa ku. Nu̱ ɗa ɓa ki ndu̱ Bulus yenda, tu̱ gwa dlu̱mndan ye Bulus ɗyine ɓalar maitar Masiya Yesu.

²⁵ Ye sarchi nang tu̱ Bulus shi ɓalar ɗyine tlu̱nar dambi, ndu̱ dukti du̱mbu̱r ɓu̱ shimndi ɓu̱ man va, ndu̱ kumar nu̱ke a ɓar fu̱ɗar wuri. Tu̱kti ɗyikunang tu̱ Feliks tu̱k sawa, tu̱ ze Bulus za, “Leendang goɓu. Mbu̱ nga gwa sarchi ngga ɓa qa ro.”

²⁶ Feliks taman za Bulus ka vu̱r mu̱zhindi yenda, nang ke ɗyi nu̱ saki tu̱ ka qa nda sar khang mbu̱ yen ma shi nji pijiri ndu̱ chin.

²⁷ Yang sonyi rap qu̱rsan tu̱ Fokiyas Festus zu̱m nggomna me ɓu̱ Feliks. Nu̱ke Feliks a shim mu̱n memu̱na Yakhudekwang, tu̱ njig Bulus nu̱ zhaaru̱m.