Tlu̱nar ɓu̱ Pudeku 22 - Mewar Alqawarang

¹ “Nyeezaku ndu̱ kudaandiku ɓanga, gwa ma dlu̱mdonu ya tang zu̱ ɗyi nu̱ ɗatlki ye nu, tun zu̱n nu̱ ɗyine nang shi zop ɓa.”

² Nu̱ tu̱kki ku a ɓalarang ndu̱ me ghai Aramayik tu̱ nggaasi khar yit ku. Kom tu̱ ze wor za,

³ “Nga Yakhuda nggeng, kha nga mbu̱ ghai Tarsus nu̱ke a Kilikiya, yang nga gor fan mbu̱ ghai nang. Nga dlu̱ shogar ɓang she Gamaliyel, chin shogaki aa nu̱m ya ɗyine woparku ɓu̱ zhikanerem. Nga nu̱ ghaari ghai ye Magham maɗyi, ba wa nu̱ke tun a shiran meeni.

⁴ Yang nga vu̱r bonye ye nduki nu̱ke a mbu Njiv nang. Nga tlagha ɓeena wor nu̱gha, tang gu̱n ɓeena nduki nusu ndu̱ khusku, nga ka khi wor gha zhaaru̱m.

⁵ Aa chin gorkir ɓu̱ kuruku ndu̱ tabar dlegumeku ɓu̱ nduki ka saida nga shi ɗyikunang. Nga dlu̱ lagarkati she wor ma yir su̱ she nyeezerem Yakhudeku nu̱ke a mbu̱ ghai Damaskus. Nga ɗu̱ ma a ɓa nga ndu̱ wor gu̱ndan Urshalima ku̱ kuma wora.

⁶ “Nga mbu̱ yiri, nang khu̱lki bing ndu̱ Damaskus chele fu̱ɗari ba kelep yiti tu̱ yarang gwaanji shi wuti mbu̱ viɗi ye maa nu̱ke nga sang.

⁷ Tang nggu̱t yaghai tang tu̱k su̱qur ɓalar a zu̱ran ya za, ‘Shawulu, Shawulu, nu̱m saki to ki vu̱r bonye ya?’

⁸ “Tang tlogha nga za, ‘To kiya, Ku̱man?’ “Tu̱ zu̱ ya za, ‘Nga Yesu khuzi Nazaret nu̱ke ta vu̱r bonye yendang.’

⁹ Yang nduki nu̱ke a su̱yen ndu̱ nga wa na yarangang ku, yang nu̱ tu̱k su̱qur njif nu̱ke a ɓalar ndu̱ nga ɓa.

¹⁰ “Tang zham nda nga za, ‘Yang ngga shikya nu̱ma, Zhinerem gwaanji?’ “Tu̱ Zhinerem gwaanji zu̱ ya za, ‘Ju to vi nu̱ mbu̱ ghai Damaskus, ka ɗa zu̱ ɗyi nu̱ daasaki yor fara.’

¹¹ Nu̱ke nga na maa ɓa, ku̱me yarang nang nakyang wa shi maɗyi tu̱ nduki nu̱ke a su̱yen ndu̱ nga ku̱s khara tu̱ bala nga bala nu̱ Damaskus.

¹² “Tu̱ khuski nggur dlu̱man za Khananiya a ɓa sha. Ɗya nu̱ ghaari ghai ye Magham nu̱ mburi wopar ɓaarem mbari, Yakhudeku nu̱ke a fara a kuna nda ku.

¹³ Tu̱ ɗa ɓa tu̱ zu̱ ya za, ‘Mu̱dla Shawulu, no maari.’ Fan ndu̱ fan tu̱ yita qu̱ni, tang na nda.

¹⁴ “Tu̱ zu̱ ya za, ‘Maghamndi ɓu̱ zhikanerem wa daato ro ma ku̱ zu̱n na shimndi ɓaran, to na nu̱ Jeembi nang, to tu̱k ɓalar ɓaran.

¹⁵ Ku̱me to ka kha ma nu̱ saidu ɓaran ye nduki kap ɗyine ɗyi no naki, to tu̱ki.

¹⁶ Yang ta bu kya nu̱ma? Ju tu̱ shi baptisme yoro tu̱ shiɓ solar ɓa yor nu̱ gha nu̱ ku̱nshe qar dlu̱m Zhinerem gwaanji.’

¹⁷ “Qu̱rse nga gaɓ nu̱ Urshalima, nga barari, mbu̱ rafti ɓu̱ Magham, tu̱ yita qu̱n tang na tunu.

¹⁸ Tu̱ yita na Yesu a zu̱ran ya za, ‘Ju, to njig Urshalima ɗau, ku̱me ɓu̱ dlu̱ saidu nu̱ke ta ma shiran ku ɗyina ɓa.’

¹⁹ “Yang tang zu̱ nga za, ‘Zhinerem gwaanji, ai, wa zu̱n ku nu̱ke, nga ka baara kib tabarku ɓaanda nga gu̱n nduki nu̱ maitaki ro tang shi kurpi ye wora.

²⁰ Wonji sarchi nu̱ tlaghaki Istafanus nu̱ saidaro, nga nje chingndan ye maaran. Nga gu̱n su̱ ye ɗyi nu̱ shiki kwang, yang nga nggu̱tki luktiku ɓu̱ nduki nu̱ tlaghaki nda ye wora.’

²¹ “Tu̱ Zhinerem gwaanji zu̱ ya za, ‘Ju to ɗi, ngga ru̱ktor nu̱ ɓakh fara, ye maa nu̱ke ɗya Yakhudeku ɓa.’ ”

Bulus wa zu̱ su̱ varan za Chin ye Roma

²² Tu̱ tabar ndukyang gwa dlu̱mndi wor ye Bulus ma yir sarchi nu̱ zu̱ki ɓalar nang. Tu̱ ghwat zhaano ku a zu̱ran za, “Ku̱ tlagha nda nu̱ gha! Ku̱ shakh pooni nduk wanang ndu̱ larji, nu̱ shipa ku̱ njig nda nu̱ nyifi ɓa!”

²³ Tu̱ ki zhaano ku a mbuk ɗye lu̱par ɓaanda nu̱ viɗi, a wos ghai ku tu̱ ku̱s ji ndu̱ kalawi.

²⁴ Ku̱me nang tu̱ gorkir sojang zu̱ za ku̱ vi ndu̱ chin mbu̱ ye maa khar ɓu̱ sojekwang ku̱ zham nda ndu̱ kurpi, ma ku̱ laɓ mbu̱ ɗyi nu̱ saki tu̱ tabar ndukyang ki zhaano yenda wanangang.

²⁵ Yang qu̱rse wa gu̱ndi nda nu̱ gha a ma shi kurpi yenda, tu̱ Bulus shi ɓalar ye soje gwaanji ɓu̱ Roma nu̱ke a nje chingndan bing nu̱ chinang. Tu̱ ze nda za, “Alapa, wa shi torop mbe woparang ku̱ shi na kurpi ye njif nu̱ke zalale khar ye Roma a nje kha nda me ku̱ kuma nda mu?”

²⁶ Nu̱ soje gwaanji nu̱ Romang tu̱kki wanang, tu̱ ɗu̱ she gorkir ɓu̱ sojekwang tu̱ ze nda za, “Ta ma shikya nu̱ma? Khuski nang zalale khar ye Roma a nje kha nda.”

²⁷ Tu̱ gorkirang a ɓa she Bulus tu̱ zu̱ za, “Zu̱ zhire ya zalale khar ye Roma a nje kha mu?” Tu̱ Bulus tlogha za, “I ɗo.”

²⁸ Tu̱ gorkirang tlogha za, “Nga gwa zalale nang nu̱ mu̱zhindi maɗyikandi.” Tu̱ Bulus tlogha za, “Ɓang kha nga si.”

²⁹ Ku̱me nang tu̱ nduki nu̱ke a ma zham ndang song nu̱ gana fan ndu̱ fan. Nu̱ gorkirang daki mban za zalale khar ye Roma a nje kha Bulus tu̱ tu̱k sawa ku̱me wa woɗa wa gu̱n nda.

Bulus gume Tabar Dle gume ɓu̱ Yakhudekwang

³⁰ Vi dumaaran gorkirang a shim zu̱n ɗyi nu̱ saki tu̱ Yakhudekwang da zhaano ɓu̱ Bulus. Tu̱ kwaatli nda nu̱ gha, tu̱ qa kuru rututundi ku ndu̱ nduki nu̱ kya mbu̱ tabar dle gume ɓu̱ Yakhudekwang tu̱ taba ku. Kom tu̱ ɗa ɓa ndu̱ Bulus tu̱ ching nda gha gume wora.