Tlu̱nar ɓu̱ Pudeku 21 - Mewar Alqawarang

Yir ɓu̱ Bulus mbu̱ ghai Urshalima

¹ Sarchi nyem njigki wor chem vi nu̱ mbu̱ du̱mbu̱l ɗyim chem ɗu̱ Kos. Vi dumaaran chem ɗu̱ Rods, kom chem ɗu̱ Patara.

² Nyem gwaki du̱mbu̱l ɗyim nu̱ke a ma yir Fonishiya chem vi chem ɗi.

³ Chem a na ɗyin ghai Saipurus, chem ngga nda nu̱ ɗyin bu̱n gu̱ɗau chem zu̱m guma ndu̱ yir chem a khu̱l dlar ghai Siriya. Chem shur nu̱ mbu̱ ghai Taya, ku̱me du̱mbu̱lang a ma shur shipiti ɓaran gha nje.

⁴ Nyem gwaki ye maa nu̱ke nu̱ mbu Yesu ku a nje chem khan nje me qaandi mut. Tu̱ Jiimbi shakhshakhndi wut ye wora, tu̱ ze Bulus ku za ku̱ ɗu̱ Urshalima ɓa.

⁵ Yang nu̱ sarchi yir ɓaarem shiki chem ji chem zu̱m guma ndu̱ yir ɓaarem. Tu̱ nu̱ mbu Yesu ku du̱ngnderem ma yir qu̱rse ghayang su̱yen ndu̱ nusuku ɓaanda ndu̱ qusonggi ɓaanda. Kom chem kurum gha me ɗyimang chem shi barari.

⁶ Chem shi khar mu̱ndi ye yen. Chem vi nu̱ mbu̱ du̱mbu̱li, ɓaanda tu̱ gaɓ nu̱ kaari ku.

⁷ Nyem njigki Taya chem khu̱l nu̱ Tolemayis, chem shi qaandi ye nyeezerem chem qan da she wora.

⁸ Vi dumaaran chem ɗu̱ Kaisariya, chem vi nu̱ kaa ɓu̱ Filibus nu̱ waazu. Nu̱ke ɗya da chele nduki mutndi nu̱ datki wor ma tlu̱nar shakhti ɗyezu̱mndi ye tabar ɓu̱ nu̱ mbu Yesu ku nu̱ke a Urshalimang, chem zhur nu̱ she nda.

⁹ Yang qusa nusuki a nje khanda wor vat nu̱ke dong nu̱ shi ɓu̱r ku ɓa, yang wa ka zu̱ ɗyi nu̱ Magham zu̱ki ye wora.

¹⁰ Qu̱rse chem wa qan koɗom ye maaran, tu̱ annabi nggur a vi Yakhudiya dlu̱man za Agabus.

¹¹ Nu̱ Agabus a ɓa ki she rem tu̱ da ɗye gu̱ndi mbu̱ var ɓu̱ Bulus. Tu̱ gu̱n kharanku ndu̱ saaranku nu̱gha tu̱ zu̱ za, “Wonji ɗyi nu̱ Jiimbi shakhshakhndi zu̱ki. ‘Yakhudeku nu̱ Urshalima ka gu̱n nu̱ ɗye gu̱ndi mbu̱ var nang nu̱ gha wanang, ka vu̱r nda nu̱ mbu̱ khar nduki nu̱ke ɗya Yakhudeku ɓa.’ ”

¹² Nyem tu̱kki wanang, chem ndu̱ nduki nu̱ke a mbu̱ ghayang chem khuɗ Bulus ku̱ ɗu̱ Urshalima ɓa.

¹³ Tu̱ Bulus tlogha za, “Nu̱m saki tun shi wanang? Nu̱m saki tun ki ghoori tun a su̱bu̱r memu̱nara? Ai, nga daasaran ma ku̱ gu̱ndi nga nu̱ gha ɗyenda ɓa, aa ka tlagha nga nu̱ gha Urshalima ku̱me dlu̱m Zhinerem gwaanji Yesu.”

¹⁴ Nyem ku̱naki nggu̱tli nda, chem kha yit, chem zu̱ nyem za, “Bu ku̱ Zhinkir gwaanji shi shimndi ɓaran.”

¹⁵ Qu̱rse qaandiku nang, chem daasa chem ɗi Urshalima.

¹⁶ Tu̱ nu̱ mbu Yesu ku nggur Kaisariya bala rem, tu̱ ɗu̱ ndu̱ chem she Manason njif nu̱ke chem a ma zhurti nu̱ she nda. Ɗya ye Saipurus, da chele ɓu̱ nu̱ mbu Yesu ku nu̱ gumapaali.

Bulus wa Khutlo me ghai ɓu̱ Yakhudeku ku̱me Labar Mbarkandang.

¹⁷ Nyem khu̱lki Urshalima tu̱ nyeezerem gaɗa rem ndu̱ kashari.

¹⁸ Vi dumaaran tu̱ Bulus ɗu̱ su̱yen ndu̱ chem she Yaqub, yang dlegumeku ɓu̱ tabar ɓu̱ nu̱ mbu Yesu ku a nje ye maaran kap.

¹⁹ Qu̱rse wa shi qaandi ye wora tu̱ zu̱ su̱ kap ɗyi ku nu̱ Magham shiki chele nduki nu̱ke ɗya Yakhudeku ɓa nu̱ ku̱nshe tlu̱nar nu̱ chin Bulus shiki.

²⁰ Nu̱ tu̱kki ku tu̱ gor dlu̱m Magham ku. Tu̱ ze Bulus za, “To mu̱dlerem, no, Yakhudeku khang wa maita ku, wonji kap ɓaanda wa ka mbu Wopar ɓu̱ Musa maɗyi.

²¹ Yang wa tu̱k labar ɓa ku, za ta zu̱ran ye Yakhudeku nu̱ke a su̱yen ndu̱ nduki nu̱ke ɗya Yakhudeku ɓa ku̱ njig khutlo Wopar ɓu̱ Musa ku. Gwa mban za ta zu̱ran ye wor za ku̱ dla su̱ qusonggi ɓaanda nu̱ gha ku ɓa, yang ku̱ mbu ɓeeni me ghaiku ɓaarem ɓa.

²² Yang na chem ka shi kikimndi? Ku̱me ka tu̱k labar ɓar ɓa ku.

²³ Nu̱ke wanang, to shi ɗyi nu̱ke chem a ma zu̱ran yoro. Nduki a nje vat fan nu̱ daki alqawar.

²⁴ To ɗu̱ ndu̱ wor tun shi me ghai wakar nu̱ khar shakhshakh su̱yen, to ɓi mu̱zhindi wakarang, ma ku̱ shi khu̱zi ye wora. Shir wanang ka sa tu̱ nduki zu̱n nu̱ ɗyine ɗyi nu̱ wor tu̱kki ɗyinorang ɗya zhire ɓa, ka zu̱n ku nu̱ ɗyine ta ka khutlo wopar ɓu̱ Musang.

²⁵ Ɓu̱ nduki nu̱ke ɗya Yakhudeku ɓa nu̱ maitaki, chem wa ru̱k lagarkati ye wor nu̱ ɗyine chem wa dla mbu̱ ɓalarang nu̱gha. Ku̱me nang ku̱ nji ɗyi nu̱ shiki sadke su̱ ye mu̱lu̱m ɓa, ku̱ nji tom ɓa, yang ku̱ nji dlu nu̱ ghengki quran tu̱ mu̱t ndu̱ tom ɓaran ɓa, yang ku̱ shi zawa ku ɓa.”

²⁶ Vi dumaaran tu̱ Bulus ɗu̱ ndu̱ nduki nang tu̱ shi meghai wakar nu̱ khar shakhshakh su̱yen ndu̱ wora. Tu̱ vi tu̱k nu̱ mbu̱ rafti ɓu̱ Magham tu̱ zu̱ fu̱ɗar nyedli ɓu̱ wakarang, nang ke sarchi nu̱ke ka vu̱rki ma sadke ku̱me aa nyi da chele ɓaanda.

Wa Ku̱s Bulus mbu̱ Rafti ɓu̱ Magham

²⁷ Nu̱ qaandi mutndang shiki bing nyedli, tu̱ Yakhudeku nggur na viki Asiya na Bulus mbu̱ rafti ɓu̱ Maghamang. Tu̱ sokh tabar ndukyang tu̱ ku̱si nda ku,

²⁸ a zhaano ku a zu̱ran za, “Nyeezerem Israila, shaata ma rem! Wonji njif nu̱ baaraki aa fu̱n a pu̱z nduki ɓaarem, ndu̱ woparku ɓaarem, ndu̱ rafti ɓu̱ Maghamndi ɓaarem nang. Wonji a ɓa tu̱k ndu̱ Kheleneku nggur mbu̱ raftang ma ku̱ sa maa shakhshakhndi nang ku̱ kha ndu̱ ru̱gna.”

²⁹ (Zu̱ ku wanangang ku̱me wa na Bulus ku ɗau su̱yen ndu̱ Tu̱rofimus ye Afisa mbu̱ ghayi. Nang ke ɗyi nu̱ saki tu̱ taman ku za wa vi ndu̱ chin mbu̱ rafti ɓu̱ Maghamang).

³⁰ Tu̱ ghayang rokhdla, tu̱ nduki a ɓa ɗyin ɗa tu̱ ku̱s Bulus ku guma da, tu̱ duti nda ɓar mbu̱ rafti ɓu̱ Maghamang, tu̱ za me vikwang nu̱gha fan ndu̱ fan.

³¹ A bonye ku̱ tlagha nda nda tu̱ gorkir ɓu̱ sange sojeku ɓu̱ Roma gwa labaran za dakhlar malkanda shir mbu̱ Urshalima kap.

³² Tu̱ ji kau tu̱ da sojeku rututundi ndu̱ sojeku tu̱ ɗu̱ ku ɗyin ɗari. Nu̱ tabar ndukyang naki gorkir ɓu̱ sojekwang su̱yen ndu̱ sojeku, tu̱ njig dlab Bulus ku.

³³ Tu̱ gorkir sojang a ɓa tu̱ ku̱s Bulus, tu̱ sa ku̱ gu̱n nda gha ndu̱ yakhli rap. Kom tu̱ zham za ɗa, ɗya kiya ndu̱ ɗyi nu̱ shiki.

³⁴ Yang tabar ndukyang a ɓalarku aaki a zu̱ ɓaran tu̱ maarang kha rokhdlaran, ɓeenan za ɗyi nang ka ɓeenan za ɗyinan ka. Ku̱me rokhdlar ɓu̱ maarang gorkir sojang nu̱ gwa mbu̱ ɗyi nu̱ ɗatlki ɓa, ku̱me nang tu̱ sa ku̱ ɗu̱ ndu̱ Bulus ye maa khar ɓu̱ sojekwang.

³⁵ Nu̱ Bulus a ɓa ki ye me dlar nu̱ke a me virang, tu̱ sojekwang da nda nu̱ viɗi ku̱me me yirti ɓu̱ tabar ndukyang wa shi maɗyi.

³⁶ Tu̱ tabar nduki na mbuki gaanje worang ki zhaano a zu̱ran ku za, “Ɗu̱ ma ɓar ndu̱ chin!”

Bulus wa shi Ɓalar ye Tabar ndukyang

³⁷ Ba a ma viri nu̱ mbu̱ karar maa khar ɓu̱ sojekwang tu̱ Bulus ze gorkir sojang za, “To ka njigti nga tang zu̱ ɗyi nggur yor mu?” Tu̱ gorkirang tlogha za, “Alapa ta magha me Gu̱rik mu?

³⁸ Woɗye to ke khuzi Masar na ɓa ki ndu̱ dakhlar tu̱ dut nu̱ tlaghar mu̱tiku wor du̱pu vat nu̱ mbu̱ gaari zhu bingdang ɓa goma?”

³⁹ Tu̱ Bulus tlogha za, “Nga pooni Yakhuda. Tarsus nu̱ mbu̱ dlar ghai Kilikiya ke ghai ɓanga. Nga ye ghai nu̱ khaki ndu̱ zhaaji nang yang nga khutoro, njigti nga tang shi ɓalar ye nduki nang.”

⁴⁰ Nu̱ vu̱rki zalale ni yenda tu̱ Bulus ching gha ɗyin me dlar me virang, tu̱ da kharan ye tabar ndukyang ku̱ kha yit ku. Nu̱ khaki yit ku, tu̱ shi ɓalar ye wor nu̱ me ghai Aramayik.