Tlu̱nar ɓu̱ Pudeku 13 - Mewar Alqawarang

Wa Dat Barnaba ndu̱ Shawulu tu̱ Ru̱k Wora

¹ Chele tabar ɓu̱ nu̱ mbu Yesu ku nu̱ke a Antakiya, annabiku ndu̱ maalu̱mku a nje. Nang ke Barnaba, ndu̱ Simiyon nu̱ka qaki nda za Chit, ndu̱ Lushiyos khuzi Sariyan, ndu̱ Manayen nu̱ gorki su̱yen ndu̱ kuji Khiridus, ndu̱ Shawulu.

² Sarchi nu̱ke a ghar ghai ye Magham a zhumti ku, tu̱ Jiimbi shakhshakhndi zu̱ za, “Wa ka ma Barnaba ndu̱ Shawulu ya nu̱ konggol ku̱me tlu̱nar nu̱ke nga shim ku̱ shi ya ku.”

³ Qu̱rse wa shi zhumti ndu̱ bararku, tu̱ sa khar barke ye wor tu̱ shi khar mu̱ndi ye wora.

Barnaba ndu̱ Shawulu mbu̱ ghai Saipurus

⁴ Nu̱ Jiimbi shakhshakhndi ru̱kki Barnaba ndu̱ Shawulu, tu̱ ɗu̱ ku Salukiya, ta vi du̱mbu̱l ɗyim ku ma yir Saipurus dlar ghai nu̱ gaawu gwaanji karakyang.

⁵ Nu̱ khu̱lki ku Salamis, tu̱ shi waazu ɓalar ɓu̱ Magham mbu̱ kib tabar ɓu̱ Yakhudekwang. Yokhana Markus a nje su̱yen ndu̱ wor a shaata wora.

⁶ Nu̱ baaraki maa mbu̱ chenjesang kap tu̱ khu̱l ku Pafos, tu̱ gama ku ndu̱ Yakhude nggur nu̱ me bilim, yang ɗya annabi kotame tu̱k, dlu̱man za Bar Joshuwa.

⁷ A tlu̱nar ye nggomne nggur nu̱ke ɗya nu̱ kaɗari, dlu̱man za Sagiyus Paulus, yang chin kya kwaaɗar ɗyin maarang kap. Tu̱ Sagiyus Paulus ru̱k she Barnaba ndu̱ Shawulu ku̱ ɗa ɓa ku ma tu̱k nji ɓalar ɓu̱ Magham.

⁸ Yang tu̱ Elimas nu̱ me bilimang (nang ke dlu̱man ndu̱ me Gu̱rik), keela ɓalar ɓaanda tu̱ shim su̱bu̱r aa nu̱m nu̱gha ma ku̱ nggomnyang maita ɓa.

⁹ Tu̱ yang Shawulu nu̱ka qaki nda za Bulus nyeedlan ndu̱ Jiimbi shakhshakhndi tu̱ nggu̱t Elimas njang,

¹⁰ tu̱ zu̱ za, “To yi ɓu̱ Sheɗan! Nu̱ zhangndi ɗyi nu̱ke toropndi! To nyeedlan ndu̱ nyiglar maari, ndu̱ mu̱na ɗyenda. Tom njig su̱bu̱r njiv toropndiku ɓu̱ Magham nu̱gha de?

¹¹ Leendang shokhnar ɓu̱ Magham a nje ɗyinoro, to ka kha ma pugum, to ka shoɓ no na yarang ɓu̱ fu̱ɗa ɓa.” Fan ndu̱ fan tu̱ pupondo ndu̱ zhum maari a ɓa tu̱ za yitanang nu̱gha. Tu̱ki taɓ maari a laɓ njif nu̱ke ka balaki nda.

¹² Nu̱ nggomnyang naki ɗyi nu̱ ɗatlkyang, tu̱ maita, a lazham shogar ɓalar ɓu̱ Magham nu̱ shiki yendang.

Bulus ndu̱ Barnaba mbu̱ ghai Antakiya nu̱ Pisidiya

¹³ Tu̱ Bulus ndu̱ nyeezanang njig Pafos mbu̱ du̱mbu̱l ɗyim tu̱ ɗu̱ ku Parga mbu̱ dlar ghai Pamfiliya. Tu̱ Yokhana Markus njig wor nu̱ nje tu̱ gaɓ varan nu̱ Urshalima.

¹⁴ Wor yang tu̱ njig Parga ku tu̱ zu̱m guma ndu̱ yir tu̱ ɗu̱ ku Antakiya nu̱ke a mbu̱ dlar ghai Pisidiya. Tu̱ vi ku nu̱ mbu̱ kib tabar ɓu̱ Yakhudeku ye Fu̱ɗar Maasi tu̱ kha gha ku.

¹⁵ Qu̱rse wa qa ye chiti mbu̱ Taurete ndu̱ lagarkati ɓu̱ annabikwang, tu̱ dlegumeku ɓu̱ kib tabarang ru̱k ye wor za, “Nyeezerem, mbu̱ ɓala kha nu nu̱ke tun a shim zu̱ran ma pa du̱mbu̱r ye nduki, tun zi.”

¹⁶ Tu̱ Bulus ji nu̱ viɗi, tu̱ bu ndu̱ kharan za ku̱ nduki kha yit, tu̱ zu̱ za, “Nyeeza Israileku ndu̱ nu̱ ghaari ghai ye Magham ku nu̱ke ɗya Israileku ɓa, gwa ma dlu̱mndonu ya!

¹⁷ Maghamndi ɓu̱ nduki nu̱ Israila wa dat zhikaneremku tu̱ sa wor tu̱ shi khang maɗyi sarchi nu̱ke a Masar ku, yang tu̱ ɗa vi ndu̱ wor ɓar mbu̱ maarang nu̱ zalale gwaanji.

¹⁸ Tu̱ da kaɗanyi nu̱ ɗye shir ɓaanda me sonyi ɗyin vat mbu̱ gaarang.

¹⁹ Nu̱ kombaki me ghaiku mut ɓar mbu̱ maa Kanana, tu̱ vu̱r mbu̱ ge maarang ye nduki nu̱ Israila.

²⁰ Ɗyiku nang shi kap mbu̱ sonyi won vat ndu̱ ɗyin qurmun. “Qu̱rsan tu̱ Magham vu̱r nu̱ kumarku ye wor ma khu̱dli sarchi ɓu̱ annabi Samaila.

²¹ Kom tu̱ ndukyang khuɗ za ku̱ sa kuji ye wora, tu̱ Magham vu̱r Shawulu yi ɓu̱ Kish, mbu̱ pooni ɓu̱ Banyami, tu̱ shi kwaaɗar me sonyi ɗyin vat.

²² Nu̱ Magham fetki Shawulu ɓar mbu̱ kujirang, tu̱ sa Dauda tu̱ kha ma kuji ɓaanda. Tu̱ Magham shi ɓalar ɓu̱ Dauda tu̱ zu̱ za, ‘Nga gwa Dauda yi ɓu̱ Jesse, memu̱naran wa ɓanga, ka shi ɗyi nu̱ke nga shimndan kap ya.’

²³ “Magham a ɓa ndu̱ nu̱ ɗanari ye Israila ve me sham ɓu̱ khuskinang, chin ke Yesu, ba wa nu̱ daki alqawaran.

²⁴ Gume ɓar ɓu̱ Yesu, Yokhana wa shi waazu ye nduki nu̱ Israila kap ku̱ nggoɗ ku, ku̱ shi baptisme ye wora.

²⁵ Nu̱ Yokhana shiki bing ndu̱ lauɗarsi tlu̱nar ɓaran tu̱ zu̱ za, ‘Tun taman za nga kiya? Nga ke chin ɓa. Njif nggur a nje a ɓar gaanja, nu̱ke aa zo paghamndi ɓaran nang khu̱l ku̱ kol nga nu̱ gha ɓa.’

²⁶ “Nyeezaku, zhikankirku ɓu̱ Yibram ndu̱ nu̱ sawar Magham ku nu̱ke ɗya Yakhude ku ɓa a ru̱k labar ɗanar nang yerem.

²⁷ Nduki nu̱ Urshalima ndu̱ dlegumeku ɓaanda nu̱ zu̱n za Yesu ke nu̱ ɗanarang ɓa. Nu̱ da mbu̱ ɓalar ɓu̱ annabiku nu̱ke a karantaran aa nyi Fu̱ɗar Su̱bjang ɓa. Yang wa nyel ɓalar ɓu̱ annabikwang sarchi nu̱ kumaki Yesu ku.

²⁸ Aa nu̱ke nu̱ gwa nda ndu̱ zop ma ku̱ tlagha nda ɓa, tu̱ khuɗ Bilatus ku za ku̱ tlagha nda nu̱ gha.

²⁹ Nu̱ nyeelki kap ɗyi nu̱ bu̱laki nu̱ ɗyine ndang, ta shurti nda nu̱ yaghai me qu̱far katlang, tu̱ sa nda nu̱ mbu̱ ku̱jipi.

³⁰ Tu̱ yang Magham da nda nu̱ viɗi mbe mu̱ti.

³¹ Me qaandi khang a wut varan ye nduki na jiiki Galili tu̱ mbu gaanje nda ma yir Urshalima. Wor nang ke saiduku ɓaran ye nduki ɓaarem leendang.

³² “Chem a ɓa ndu̱ Labar Mbarkandi ye nu tu̱k, nu̱ ɗyine alqawar nu̱ Magham shiki ye zhikaneremang,

³³ wa nyel yerem, chem nu̱ke chem a khar qusonggi ɓaanda sarchi nu̱ daki Yesu nu̱ viɗi mbe mu̱ti. Ba wa nu̱ bu̱laki nu̱ gha mbu̱ Zabura san nu̱ rap za, ‘To Yi ɓanga; Nga kha ma zhu meeni.’

³⁴ “Dar Yesu nu̱ viɗi nu̱ Magham shiki mbe mu̱tang a wutan za Yesu ɓu̱ mu̱t sar da tu̱k ɓa yang ɓu̱ mu̱tl ɓa. Magham wa nyel ɓalar jiiri ɓaran mbe mu̱ti nang shwat, sarchi nu̱ zu̱ki za, ‘Ngga vu̱r barkeku Shakhshakhndi nu̱ke bai bai su̱ ɓa nang shiki alqawarang ye Daudang yoro.’

³⁵ “Ye maa nggur mbu̱ Zaburyang wa zu̱ za, ‘Tom ɓu̱ njig Shakhshakhndi ɓaa tu̱ mu̱tl ɓa.’

³⁶ “Yang Dauda wa mu̱t qu̱rse wa woɗa tlu̱nar nu̱ Magham vu̱rki yenda mbu̱ qaandiku ɓaran, tu̱ pa nda gha su̱yen ndu̱ zhikanku, tu̱ man varan mu̱tli.

³⁷ Yang chin njif nu̱ Magham daki nu̱ viɗi mbe mu̱tang nu̱ mu̱tl mbu̱ ku̱jip ɓa.

³⁸ “Ku̱me nang, nyeezaku, zu̱n ma nu̱ gha nu̱ ɗyine ɓalar yaapar sola a ɓa yenu ba nu̱ ku̱nshe Yesu nang.

³⁹ Yang ba nu̱ ku̱nshe nda tu̱k, aaki maitaki nda ka gwa dli ɗyin mbe solarku nu̱ wopar ɓu̱ Musa ku̱naki dli ɗyinonu ɓar mbanang.

⁴⁰ Ku̱me nang ku̱r ma vaanu, ku̱ ɗyi nu̱ Magham zu̱ki mbu̱ lagarkati ɓu̱ annabikwang nyel nu̱ ɗyinonu ɓa, ku̱me wa zu̱ ɗo za,

⁴¹ ‘Nggu̱t ma, tun nu̱ ɓalar ndu̱mndi! Shi ma lazham, tun mu̱ɗi! Ku̱me nga ma tlu̱nar nggur mbu̱ qaandi virkirku ɓaanu, tlu̱nar nu̱ke aa nduk wa ze nu, tun ɓu̱ maita ɓa.’ ”

⁴² Ba nu̱ Bulus ndu̱ Barnaba viki ɓar mbu̱ kib tabarang, tu̱ ndukyang khuɗ wor za ku̱ gaɓ tu̱ shi ɓalar ye wor ku ɗyine ɗyiku nang Fu̱ɗar Maasi nu̱ke a ɓari.

⁴³ Nu̱ tabarang lakhtaki, tu̱ Yakhudeku khang ndu̱ nduki nu̱ke ɗya Yakhudeku ɓa yang wa vi nu̱ mbu̱ ghaari ghai ɓu̱ Yakhudekwang mbu gaanje Bulus ndu̱ Barnaba. Tu̱ yang shi ɓalar ndu̱ wora tu̱ pa du̱mbu̱r ye wor ku̱ zu̱m guma ndu̱ khar viti ɓaanda mbu̱ mu̱nkir ɓu̱ Magham.

⁴⁴ Nu̱ Fu̱ɗar Maasi nggur a ɓa ki, tu̱ gwaari nduki nu̱ mbu̱ ghayang kap taba ma tu̱k ɓalar ɓu̱ Magham.

⁴⁵ Yang nu̱ Yakhudekwang naki nduki wa taba khan tu̱ shi zhiri ni ku maɗyi, tu̱ ki keela ɗyi nu̱ Bulus zu̱kyang a pu̱zi nda ku.

⁴⁶ Yang tu̱ Bulus ndu̱ Barnaba shi ɓalari, sawa su̱ ɓa. Tu̱ zu̱ ku za, “Tun Yakhudeku, tun shipaki ku̱ ngga mi su̱ zu̱ ɓalar ɓu̱ Magham ye nu, yang nu̱ke tun wa zhang gha. Tun wa wut nu̱ ɗyine nun shipa gwar nyifi nu̱ke nu̱ka shi woɗa ɓa nda ɓa. Nu̱ke wanangang, chem ka ɗu̱ she nduki nu̱ke ɗya Yakhudeku ɓa.

⁴⁷ Ku̱me Magham wa woɗa zu̱ran yerem nu̱gha za, ‘Nga sa ma ku̱ kha na ma yarang ye nduki nu̱ke ɗya Yakhudeku ɓa, ma a ɓa na ndu̱ ɗanar nu̱ke ka khu̱lki koɗokh me larji.’ ”

⁴⁸ Nu̱ nduki nu̱ke ɗya Yakhudeku ɓa tu̱kki wanang, tu̱ kasha ku maɗyi, tu̱ vu̱r zhaaji ye ɓalar ɓu̱ Magham tu̱ nduki nu̱ datki wora ma gwa nyifi nu̱ke ɓu̱ shi woɗa ɓa ndang maita ku.

⁴⁹ Tu̱ ɓalar ɓu̱ Magham shaata gwar dlu̱r mbu̱ dlar ghayang kap.

⁵⁰ Tu̱ yang Yakhudekwang sokh nusuku nu̱ ghaari ghai ku nggur nu̱ke nduki a na zhaaji ɓaanda ndu̱ dlegumeku ɓu̱ nduki nu̱ mbu̱ ghayang. Tu̱ vu̱r bonyeku ye Bulus ndu̱ Barnaba, tu̱ komba wor ɓar mbu̱ dlar ghai ɓaanda.

⁵¹ Tu̱ Bulus ndu̱ Barnaba mba kalau mbu̱ saari wor nu̱ gha ma ku̱ kha ma saidu ɗyine nduki nu̱ mbu̱ ghayang tu̱ ɗu̱ vaanda Ikoniya.

⁵² Yang nu̱ mbu Yesu ku nu̱ Antakiya a kashar maɗyi, nyeedlan ku tu̱k nu̱ Jiimbi shakhshakhndi.