Tlu̱nar ɓu̱ Pudeku 10 - Mewar Alqawarang

Biturus wa ɗu̱ she gorkir Soje ɓu̱ Rome ngguri

¹ Khuski nggur a nje Kaisariya dlu̱man za Korneliyus. Ɗya gorkir soje Rome nu̱ke a mbu̱ sange ɓu̱ sojeku nu̱ka qaki za Italiya.

² Yang ɗya nu̱ sawar Magham chin ndu̱ rafti ɓaran kap. Wa ka shaata Yakhudeku nu̱ke nungndan maɗyi, wa ka shi barar ye Magham aakochi.

³ Sarchi ngguri, vi kunung nu̱ mugdi tu̱ yitan qu̱ni. Tu̱ na nu̱ ru̱kti ɓu̱ Magham ye dalangi aa ɓa she nda tu̱ zu̱ za, “Korneliyus!”

⁴ Chin yang tu̱ zu̱ yiti yenda mbu̱ sawa tu̱ zu̱ za, “Zhinerem gwaanji, nu̱ma?” Tu̱ nu̱ ru̱ktang ze nda za, “Magham wa tu̱k mu̱ndi barar ndu̱ shaatar nu̱ nungndiku nu̱ke ta shiran, Magham a kwaaroro ku̱men.

⁵ Yang ru̱k nduki leendang nu̱ Joppa ku̱ ɗa qa Siman, nu̱ka qaki nda za Biturus.

⁶ Zhurtan kaa ɓu̱ Siman nu̱ tlu̱nar ku̱zu̱mndi nu̱ke rafti ɓaranang me gaawu gwaanjang.”

⁷ Ni nu̱ ru̱kti ɓu̱ Magham nu̱ shiki ɓalar nang yenda ɗu̱ki varan, tu̱ Korneliyus qa maaviku ɓaran rap ndu̱ soje nggur nu̱ sawar Magham chele sojeku nu̱ke a tlu̱nar yenda.

⁸ Nu̱ zu̱ki aa nu̱m ye wora, tu̱ ru̱k wor nu̱ Joppa.

⁹ Ɗaatlu̱maaran, chele fu̱ɗari nu̱ ru̱kti ɓu̱ Korneliyus a mbu̱ yiri, nu̱ shiki bing ndu̱ ghayang, tu̱ Biturus dlan ɗyin kib ma barari.

¹⁰ Nu̱ meeri shiki yenda, tu̱ shim gwa nji ɗyi nu̱ke chin ka zu̱mki, yang me ku̱ ɗa ɓa nu̱ ɗye zu̱mndang yenda, tu̱ Magham qu̱n yitan.

¹¹ Tu̱ na maa viɗi wa qu̱ni, tu̱ na ɗyi nggur nu̱ shipaki ɗye lu̱par gwaanji a zhurti nu̱ yaghai ndu̱ ngginggeetli vat.

¹² Yang aa nyi ɗye nggar a nje mban. Nu̱ saari vat ku ndu̱ pooni su̱tiku ndu̱ kashangku, ndu̱ ɗyikhtiku nu̱ viɗi.

¹³ Tu̱ yang tu̱k su̱qur nggur a ɓalar yenda za, “Biturus, ju to dla to nji.”

¹⁴ Tu̱ Biturus tlogha za, “Ma nu̱m ya! Zhinerem gwaanji, sar da nang zu̱m ɗyi nu̱ke maatlin ndu̱ ɗyi nu̱ke zopan ɓa.”

¹⁵ Tu̱ su̱qur ɓalarang vi nu̱ rapan tu̱k, a zu̱ran za, “Ɗyi nu̱ Magham shiɓki nu̱ gha qa na nda zopan ɓa.”

¹⁶ Nu̱ ɗyi nang shiki sar kunung, tu̱ da ɗye lu̱parang ɓar nu̱ viɗi fan ndu̱ fan.

¹⁷ Sarchi nu̱ke Biturus damtaki ku̱ da nji mbu̱ ɗyi nyin nakyang, tu̱ nduki nu̱ Korneliyus a ru̱kkyang gwa maa nu̱ke rafti ɓu̱ Siman a si tu̱ chin gha ku me virang.

¹⁸ Tu̱ shi gappu̱re ku tu̱ zham mbu̱ nduk a nje kharan mbu̱ raftang nu̱ke dlu̱man za Siman nu̱ka qaki nda Biturus.

¹⁹ Siman Biturus a kwaari ɗyine ɗyi nyin nakyang, tu̱ Jiimbi shakhshakhndi ze nda za, “Siman nduki kunung a nje sho ro.

²⁰ Yang ju to zhur nu̱ yaghai to ɗu̱ su̱yen ndu̱ wora, shi na ku̱ɗa ku̱ɗa ɓa, ku̱me nga ru̱kki wora.”

²¹ Tu̱ Biturus zhur nu̱ yaghai tu̱ ze ndukyang za, “Nga ke njif nu̱ke tun a kaala ndang, tun a shimkya nu̱ma?”

²² Tu̱ zu̱ ku za, “Ɗya gorkir soje Rome nggur a ru̱kki rem, dlu̱man za Korneliyus. Ɗya nu̱ jeembu, nduk mbarkandi nu̱ sawar Magham, Yakhudeku kap a na zhaaji ɓaran. Yang nu̱ ru̱kti na viki she Magham zu̱ki yenda za ɗu̱ na kaa ɓaran chin tu̱k ɗyi nu̱ke to ka zu̱ki.”

²³ Tu̱ Biturus vi ndu̱ wor mbu̱ raftang tu̱ vu̱r maa qaandi ye wora. Nu̱ maa ɗatlki, tu̱ ɗu̱ ku su̱yen ndu̱ nu̱ mbu Yesu ku nggur nu̱ke a mbu̱ ghai Joppa ma bala nda.

²⁴ Vi dumaaran tu̱ vi ku nu̱ mbu̱ ghai Kaisariya. Yang nu̱ke Korneliyus a ku̱rsa ɓar ɓaanda, tu̱ taba kheetiku ɓaran ndu̱ raptan ku.

²⁵ Ba Biturus a viri nu̱ mbu̱ raftang, tu̱ Korneliyus gaɗa nda, tu̱ qan nu̱ gume nda a ghar ghai yenda.

²⁶ Tu̱ Biturus da nda nu̱ viɗi, tu̱ zu̱ za, “Ju nu̱ viɗi, nga nduk wa to.”

²⁷ Tu̱ Biturus vi nu̱ mbu̱ raftang a ɓalarku ndu̱ yen, ta gwa ndukiku khang tabaran.

²⁸ Tu̱ ze wor za, “Tun ndu̱ ɗyinonu tun wa zu̱n za nu̱ shipa ku̱ Yakhude nduku kha ndu̱ nduki nu̱ke ɗya Yakhuda ɓa, yang ɓu̱ ɗu̱ kaa ɓaran ɓa. Yang Magham wa wut ya za qa nga aaki maatlin ɓa, yang zopan ɓa.

²⁹ Ku̱me nang nun ru̱kki ma qa nga, nang zhang ɓar gha ɓa. Yang leendang nga shim zu̱n nga ɗyi nu̱ saki tun qa ngang.”

³⁰ Tu̱ Korneliyus tlogha za, “Qaandi vat meeni ba ye sarchi nang, vi kunung nu̱ mugdi, nga barar kaa ɓanga, fan ndu̱ fan, tang na nduk chingndan gumera nu̱ lukti nu̱ke a wuti maɗyi.

³¹ Tu̱ zu̱ ya za, ‘Korneliyus Magham wa tlogha su̱ barar ndu̱ shaatar nu̱ nungndiku nu̱ke ta shiran, Magham a kwaroro ku̱men.

³² Yang ru̱k nduki leendang nu̱ Joppa ku̱ ɗa qa Siman nu̱ka qaki nda za Biturus. Zhurtan kaa ɓu̱ Siman nu̱ tlu̱nar ku̱zu̱mndi nu̱ke rafti ɓaranang a me gaawu gwaanjang.’

³³ Nang ke ɗyi nu̱ saki tang ru̱k nu̱ sho ɗau, yang wa shi mbar nu̱ke ta ɓa. Yang leendang wonji rem gume Magham ma tu̱k mi ɗyi nu̱ke zu̱ki za zu̱na yerem.”

Ɓalar nu̱ Biturus shiki Kaa ɓu̱ Korneliyus

³⁴ Tu̱ Biturus nggaasi ɓalar za, “Shwat nga da mban nu̱ ɗyine Magham wa da aaki wayen.

³⁵ A shimkya nu̱ sawar nda kom ndu̱ njif nu̱ka shiki ɗyi nu̱ke torop nang ke njif nu̱ke khar viti ɓaran wa kha mbar she Magham aa a vi mbu̱ aa nyi dlar ghai.

³⁶ Tun wa zu̱n labar nu̱ Magham ru̱kki ye nduki nu̱ Israila, nu̱ zu̱ki Labar Mbarkandi nu̱ qaandi memu̱nar nu̱ ku̱nshe Yesu Masiya chin ke Zhinkir ɓu̱ aaki.

³⁷ Tun wa zu̱n ɗyi nu̱ ɗatlki mbu̱ Yakhudiya kap, yang nggaasan Galili gaanje waazu baptisme nu̱ Yokhana shiki.

³⁸ Tun wa zu̱n nu̱ ɗyine Magham wa nyel Yesu khuzi Nazaret ndu̱ Jiimbi ɓaran ndu̱ zalale. Kom ndu̱ baarar maa nu̱ shiki, ndu̱ shir mbarkir ye nduki. A shaana nduki nu̱ Sheɗan damtaki wora ku̱me Magham a nje su̱yen ndu̱ chin.

³⁹ “Chem wa na ɗyi nu̱ Yesu shiki mbu dlar ghai ɓu̱ Yakhudeku ndu̱ mbu̱ ghai Urshalima kap. Tu̱ tlagha nda nu̱ gha ku nu̱ ku̱nshe katli nda nu̱ me qu̱fari.

⁴⁰ Yang tu̱ Magham da nda nu̱ viɗi nu̱ nyifiri ye fu̱ɗar nu̱ kunung, tu̱ sa tu̱ nduki na nda.

⁴¹ Nu̱ wut varan ye nduki kap ɓa, wut varan yerem, chem nu̱ Magham datki rem ma ku̱ kha mi ma saiduku ɓaran. Chem zu̱mki chem za ndu̱ chin gaanje wa ji mbe mu̱ti.

⁴² Chin ru̱kki rem za shem waazu ye nduki, chem saida ye wor nu̱ ɗyine chin ke njif nu̱ Magham datki ma ku̱ kuma nduki nu̱ke a nje nu̱ nyifiri kom ndu̱ nduki nu̱ mu̱tki.

⁴³ Annabikwang kap wa saida nda za aaki maitaki nda ka gwa yaapar solar ɓaran nu̱ ku̱nshe dlu̱man.”

Nduki nu̱ke ɗya Yakhudeku ɓa wa Dlu̱ Jiimbi shakhshakhndi

⁴⁴ Biturus a mbu̱ ɓalari, tu̱ Jiimbi shakhshakhndi a shur nu̱ ɗyine nduki nu̱ke a tu̱k ɓalarang kap.

⁴⁵ Tu̱ Yakhudeku nu̱ mbu Yesu ku nu̱ dlaki su̱ wor na ɓa ki su̱yen ndu̱ Biturus shi lazham, ku̱me Magham wa vu̱r Jiimbi ɓaran ye nduki nu̱ke ɗya Yakhudeku ɓa tu̱k.

⁴⁶ Nu̱ke wa tu̱k wor a ɓalar nu̱ me ghiindi nggur ku zum, a gor dlu̱m Magham ku. Kom tu̱ Biturus zu̱ za,

⁴⁷ “Nduk a nje nu̱ke ka nggu̱tlki ku̱ shi baptisme nu̱ ɗyim ye ndukiku nang mu? Wa dlu̱ Jiimbi shakhshakhndi ku ba wa nyem dlu̱kyang.”

⁴⁸ Tu̱ Biturus sa za ku̱ shi baptisme ye wor mbu̱ dlu̱m Yesu Masiya. Kom tu̱ khuɗ Biturus ku za ku̱ kha gha su̱yen ndu̱ wor me qaandi virkir koɗom dong.