Romeku 14 - Mewar Alqawarang

Du̱ng na Zop ye Mu̱dlo ɓa

¹ Dlu̱ ma nduki nu̱ke maito ɓaanda khukhutan, dla nu kumar ɗyine ɗyi nu̱ke tun a keele ɗyinan ɓa.

² Maito ɓu̱ njif nggur ka sa tu̱ zu̱m ɗyi nu̱ke a shimndan kap, yang njif nu̱ke du̱mbu̱ran mbu̱ maito ɓaran ɓa, ka zu̱mkya ba dlu̱mndi ginu ndu̱ ye qu̱fa.

³ Ku̱ njif nu̱ka zu̱mki ɗyi nyin shimki kap ndu̱m chin nu̱ke nu̱ka zu̱m aa nyi ɗye zu̱m ɓa ndang ɓa. Yang tu̱k njif nu̱ka datki ɗyi nu̱ke chin ka zu̱mki, ku̱ na zop ɓu̱ njif nu̱ka zu̱mki aa nyi ɗye zu̱mndang zum ɓa, ma nu̱ke nu̱zhin wa kha dlu̱ran she Magham.

⁴ To ki ɗo nu̱ke to ka kumaki maavi ɓu̱ njif nggurang na? Zhin nu̱ rafa ka kumaki nda. Yang wonji ka zu̱m loobo, ku̱me Zhinkir gwaanji ka ɗu̱ma sa nda tu̱ shi loobo.

⁵ Njif nggur wa ka da fu̱ɗar nggur ndu̱ zhaaji tu̱ duk ɓeeni fu̱ɗarkwang. Yang she njif nggur fu̱ɗarkwang wayen she nda. Bu ku̱ aaki gwa zhire ɓu̱ ɗyen mbu̱ memu̱naran.

⁶ Njif nu̱ke a na fu̱ɗar nggur ndu̱ zhaaji a shiran wanang ye Zhinkir gwaanji. Njif nu̱ka njiiki dlu a shiran ma gwar dlu̱m Zhinkir gwaanji tu̱k, ma nu̱ke wa ka kuna Magham ku̱men. Aa njif nu̱ke nu̱ka nji dlu ɓa a shiran ma gwar dlu̱m Zhinkir gwaanji tu̱k ba, ma nu̱ke wa ka kuna Magham ku̱men.

⁷ Chele ɓaarem, nduk a nje nu̱ke a khar me ɗyinan ɗyenda ɓa, yang nduk a nje nu̱ke ka mu̱tki ye varan ɗyenda ɓa.

⁸ Mbu̱ chem a nje ndu̱ nyifiri, chem a khar ɓu̱ Zhinkir gwaanji, mbu̱ yang chem wa mu̱ɗi, chem mu̱ɗ ku̱me Zhinkir gwaanji. Ku̱me nang aa chem a nje ndu̱ nyifiri aa chem wa mu̱ɗi, chem a mbu̱ ɓu̱ Zhinkir gwaanji.

⁹ Jiwa ku̱me nang Masiya wa mu̱ɗi tu̱ ji ndu̱ nyifiri ma ku̱ kha nji ma Zhinkir gwaanji ɓu̱ nduki nu̱ mu̱tki ndu̱ nduki nu̱ke a nje ndu̱ nyifiri.

¹⁰ Yang to ɗa, nu̱m saki to ki kuma mu̱dlwang na? To yang tu̱k, nu̱m saki to ki ndu̱m mu̱dlwang na? Kap ɓaarem chem ka ɓa ching gha gume zhakhɗye kumar ɓu̱ Magham.

¹¹ Jiwa a nje bu̱laran za, “ ‘Ba wa nu̱ke nga nje ndu̱ nyifiri shwat,’ Zhinkir gwaanji kya ɓalar nang, ‘Aa nyi me purmi ka kurum gha gumera; aa nyi ghin ka saida za nga ke Magham.’ ”

¹² Aa nyi nduk da chele ɓaarem ka shiga si khar viti nyin shiki ye Magham.

Kha na ma Ɗye Ji Sar ye Mu̱dlo ɓa

¹³ Ku̱me nang njig mi kuma yen. Me ɓu̱ nang, ku̱ aaki san mbu̱ memu̱naran nu̱ ɗyine chin ɓu̱ kha ma ɗye ji sar ye mu̱dlen ɓa.

¹⁴ Nga zu̱ni, yang nga maita shwat mbe Zhinerem gwaanji Yesu nu̱ ɗyine ɗye zu̱m nje nu̱ke zopan me ɗyinan ɓa. Mbu̱ yang njif nggur wa da nu̱ ɗyine ɗyen zopan, nang ɗo, ɗyen wa kha zopan she nda.

¹⁵ Mbu̱ mu̱dlo wa ka su̱bu̱r memu̱naran ku̱me ɗye zu̱mndi nu̱ke ta zu̱mndan, nang wa wut nu̱ ɗyine no wut ndola yenda ɓa. Ku̱ ɗye zu̱mndi ɓaaro kha ma ɗye su̱yar mu̱dlo nu̱ Masiya mu̱tki ku̱me chin ɓa.

¹⁶ Ku̱ ɗyi no naki mbar shoro kha ma ɗye pu̱zi she ɓeeni nduki ɓa.

¹⁷ Jiwa kwaaɗar ɓu̱ Magham ɗya ɓalar zu̱mndi ndu̱ zar ɓa, ɗya ɓalar dambi, ndu̱ qaandi memu̱na, ndu̱ ɓong memu̱na mbe Jiimbi shakhshakhndi.

¹⁸ Ku̱me nu̱ ghaari ghai ye Masiya ve njiv nang kap, ɗya nu̱ mu̱ndi memu̱na Magham, wa ka gwa dlu̱r she nduki tu̱k.

¹⁹ Ku̱me nang ku̱ shi mi ɗyi nu̱ke chem ka ɗu̱maki shiran ma a ɓa mi ndu̱ khar mu̱nkandi ndu̱ par du̱mbu̱r ye yen.

²⁰ Gu̱ɗa na tlu̱nar ɓu̱ Magham nu̱gha ku̱me ɓalar ɗye zu̱m ɓa. Aa nyi ɗye zu̱m zopan shwat ɓa, yang nu̱ shi mbar ku̱ ɗyi nu̱ke chem a zu̱mndan kha ma ɗye ji sar ɓa.

²¹ Wa shi mbar ku̱ nji na dlu ɓa, yang za na ɗyim anap ndu̱ shir aa nyi tun zum ɓa, mbu̱ ka sa nggu̱di ɓu̱ mu̱dlo.

²² Bu ku̱ kwaari nu̱ke a memu̱naro ɗyine ɓalar nang kha chele ɓaaro ndu̱ Magham. Njif nu̱ke memu̱naran nu̱ wut yenda za chin wa shi zop ɗyine ɗyi nyin daki za torop ɓa, ɗya nu̱ barka.

²³ Yang njif nu̱ke memu̱naran rap rap ɗyine ɗyi nu̱ke chin a zu̱mndan, a dutkya kumar ɓu̱ Magham ye ɗyinan mbu̱ wa zu̱mi, ku̱me ɗyi nu̱ke a shiranang a shiran mbe maito ɓa. Yang ɗyi nu̱ nduk shiki kap nu̱ke shi ku̱me chin wa maita ɗyen ɓa, ɗya sola.