Galatiyeku 5 - Mewar Alqawarang

Masiya wa Dli Ɗyinerem

¹ Masiya dli ɗyineremang ma ku̱ kha mi vaarem zu̱ran. Ku̱me nang tun ching gha shaanggu̱ɗang, vu̱r nu vaanu ma tlu̱nar maava tu̱k ɓa.

² Gwa ma dlu̱mdonu ya mbari! Nga Bulus kya ɓalar nang ye nu, mbu̱ tun wa dla vaanu nu̱ ve dlarsi ma gwa dlu̱r she Magham, Masiya nu̱ kha ndu̱ boota ye nu shwat ɓa.

³ Nga maataran ye nu tu̱k mbu̱ tun a shim gwa dlu̱r she Magham nu̱ ku̱nshe mbu Bibiti nu̱ zu̱ki za ku̱ nduk dla san nu̱gha, wa ku̱s ku̱ mbu nu ɓeeni bibitikwang kap.

⁴ Tun nu̱ke tun a shim gwa nu khar waare sola gume Magham nu̱ ku̱nshe mbu Bibitang, tun wa vi ɓar mbe mbu Masiya. Tun wa zhang mu̱nkir ɓu̱ Magham gha.

⁵ Yang ɓaarem, chem wa sa memu̱narem nu̱ ɗyine Magham ka sa chem gwa khar waare sola gume nda. Nang ke ɗyi nu̱ke chem a buran nu̱ ku̱nshe Jiimbi shakhshakhndi nu̱ke a tlu̱nar mbe maitar Masiya nyem shiki.

⁶ Jiwa mbu̱ chem a mbe Masiya Yesu, aa chem wa dla sarem, aa nyem dla ɓa kap da. Ɗyi nu̱ damtaki si, chin ke maitar Masiya nu̱ka saki chem wut ndolar ye aaki.

⁷ Tun a ɗar mbarkandi gumapaali. Yang ki zhaki nu̱ gume nu mbe mburi zhiryang na?

⁸ Pooni lambar nang, a vi she Magham nu̱ qaki nu shwat ɓa.

⁹ Ba wa nu̱ nduki ka zu̱ki ku za, “Yis koɗomma ka saki tu̱ lokhɓar tun zhi.”

¹⁰ Yang kap ndu̱ nang nga maita nu. Khar ɓaarem mbe tlu̱nar ɓu̱ Zhinkir gwaanji saki tang maita nu̱ ɗyine tun ɓu̱ da ɓalar ɓu̱ njif nggur tu̱ duk ɓang ɓa. Yang njif nu̱ke a ɓar ndu̱ rokhdlar nang ka gwa kumari, aa nu̱zhin ɗya ki.

¹¹ Nyeezaku, mbu̱ nga shikya waazu dlarsi ma ɓar meeni, nu̱m saki tu̱ nduki ki vu̱r bonye ya? Mbu̱ nga jiikya su̱ ku̱ aaki dla san nu̱gha, tu̱ga ɓalar mu̱ti ɓu̱ Masiya ɗyin qu̱far kaatli nu̱ke nga shiran nang ɓu̱ kha ma ɗye damta ɓa.

¹² Ai, nga shim tu̱ga ku̱ nduki nu̱ke a rokhdla nun mbu̱ yen nang zu̱m guma ku, tu̱ mi su̱ wor nu̱gha guma da!

¹³ Nyeezaku, ɓaanu qa nu ma ku̱ ɗyinonu vi. Yang shi ma laya laya ma ku̱ vi ɗyin nun gwaki nang kha ma njiv mbu shimndi ɓu̱ manva ɓa. Me ɓu̱ nang bu ku̱ sa tun shi tlu̱nar wuti ndolar ye yen.

¹⁴ Ku̱me Bibitang kap a ɗyine ɓalar da, chin ke, “Ndolo nu̱ bing ɓaaro wa vaaro.”

¹⁵ Yang mbu̱ tun wa kha wa dlu gari ku, tun a dakhla yen, tun a ku̱ti, tun a nji yen, gaɓ ma nu̱ mbu̱ konyi ɓaanu ɗo, mbu̱ wanang ɓa tun ka su̱ya yen nu̱gha!

Jiimbi shakhshakhndi ndu̱ Shimndi ɓu̱ Manva

¹⁶ Ɗyi nu̱ke nga zu̱ranang chin ke, ku̱ njig ma Jiimbi shakhshakhndi tu̱ mbu ndu̱ tunu. Mbu̱ tun wa shi wanang tun ɓu̱ mbu su̱ me ɓu̱ shimndi ɓu̱ manva ɓa.

¹⁷ Ku̱me shimndi ɓu̱ manva nu̱ka dlu̱ yen ndu̱ Jiimba ɓa. Yang tu̱k Jiimbyang nu̱ka dlu̱ yen ndu̱ shimndi ɓu̱ manva zum ɓa. Ɗyiku rapndi nang nu̱ka dlu̱ yen shwat ɓa. Nang ke ɗyi nu̱ saki nun ka ɗu̱ma shi ɗyi nu̱ke tun a shim ku̱ shi nu ɓa.

¹⁸ Mbu̱ yang Jiimba kya mbu ndu̱ tunu, tun a mbu̱ bu̱n Bibitang ɓa.

¹⁹ Ɗye shir malkandiku ɓu̱ manva ba ye dalangi: Zawari, ndu̱ tlu̱nar zop, ndu̱ ɗye zhaaneku,

²⁰ ndu̱ ghaari ghai ye mu̱lu̱mku, ndu̱ me muzu, ndu̱ zhangndi yen, ndu̱ dakhlari, ndu̱ zhiri ɓu̱ yen. Kom ndu̱ shokhnari, ndu̱ ndolar ɗyin, shakhti ɗyin, ndu̱ shakhti rafa rafa,

²¹ ndu̱ zhiri, ndu̱ me kuyari, ndu̱ zar kuzhi bu ɗyin ndu̱ pooni ɗyiku nu̱ shipaki ɗyiku nang. Nga wuro nu, ba wa nang shiki ye nu gumang, nu̱ ɗyine pooni nduki nu̱ka shiki ɗyiku nang ɓu̱ vi nu̱ mbu̱ kwaaɗar ɓu̱ Magham ɓa.

²² Yang ɗye shir mbarkandi ku ɓu̱ Jiimba chin ke, ndola, ndu̱ kasha, ndu̱ qaandi memu̱na, ndu̱ kanaɗyi, ndu̱ mbarkiri, ndu̱ shir ɗyi toropndi, ndu̱ shir zhire,

²³ ndu̱ katar ɗyin, ndu̱ ku̱si ɗyin. Ai, Bibitang nu̱ nggu̱tl ɗyiku nang ɓa.

²⁴ Nduki ɓu̱ Masiya Yesu wa katl ɗye shirku ɓu̱ me manva gha su̱yen ndu̱ ɗyi malkandiku zum zum nu̱ke manva a shimndan.

²⁵ Ma nu̱ke Jiimbyang vu̱rki nyifi yerem, ku̱ njig mi tu̱ Jiimbyang mbu ndu̱ chem mbu̱ khar viti ɓaarem kap.

²⁶ Ku̱ kha mi ma nu̱ gwaari ɗyin ndu̱ nggangndi dakhla, ndu̱ zhiri ɓu̱ yen ɓa.