Ɗyin mbu̱ tukari 9 - Mewar Alqawarang

Domndi nu̱ Qurmun

¹ Tu̱ nu̱ ru̱kti ɓu̱ Magham nu̱ qurmun pi domndi ɓaranang. Tang na anjinje a nggu̱ɗ viɗi ta ɓa vu̱ghai, tu̱ vu̱r ɗye qu̱ndi me ge gargha mboɓongndi nu̱ke me tu̱ɓti su̱ ɓa ndang yenda.

² Sarchi nu̱ qu̱nki me ge gargha mboɓongndang nu̱gha, tu̱ qu̱ndi nggur a vi nu̱ke wa qu̱ndi ɓai shechiri gwaanji tu̱ qu̱ndang sa fu̱ɗa ndu̱ maa viɗi tu̱ kha zhum.

³ Tu̱ mbegdi zhoolarku ɗa vi mbu̱ qu̱ndang, ta zhur nu̱ mbu̱ larji, tu̱ vu̱r zalale ye wor ma ku̱ ghi nduk wa ghu̱rɗarku.

⁴ Tu̱ ze wor za ku̱ su̱bu̱r wuzu̱ndi ku ndu̱ qu̱farku ndu̱ ɓanar ɗyi nggur nu̱ larji ɓa, kope nduki nu̱ke yitu̱m ɓu̱ Magham a nje me guma wor ɓa.

⁵ Nu̱ vu̱r zalale ye wor ku̱ tlagha nduk ɓa, yang ku̱ vu̱rkya ba bonye ye wor me chere qurmun. Yang gu̱rgu̱r ɓu̱ bonye nu̱ke ka za kyang a khar wa ghu̱rɗa ghiiki nduku.

⁶ Mbu̱ chereku qurmundi nu̱ke ɗyiku nang ka ɗatlki yang nduki ka shim ku̱ mu̱t nda, yang ɓu̱ mu̱t ku ɓa, ka laɓ tu̱ga wor wa mu̱ɗi, yang mu̱ti ka zhang da wor gha.

⁷ Mbegdiku nang wa shipa pu̱rsiku nu̱ daasaki wor nu̱gha ma dakhlari. Ɗyi nggur a nje nu̱ saki nu̱ mbu̱ ɗyin wor nu̱ shipaki ɗye zhar nu̱ shiki ndu̱ ginarwe, yang mbu̱ yiti wor wa shipa ɓu̱ nduku.

⁸ Ghosi ɓaanda wa shipa ghosi ɗyin nusuki, yang dliindi wor nang wa no za ɗya dliindi mu̱zam.

⁹ Pili kanggar memu̱na a nje kha wora nu̱ shipaki pili kanggar memu̱nar nu̱ vi, khobki wor a ghu̱mndi wa su̱qur pu̱rsiku nu̱ gu̱nki ɗye ghaari nduki nu̱ gaanje wor a ɗarku ma yir me dakhlari.

¹⁰ Gaandi a nje ve wora, nu̱ ghiiri ku wa ɓu̱ ghu̱rɗarku, yang mbu̱ gaandi wora zalalya nje ma ku̱ vu̱r bonye ye nduku me chere qurmun.

¹¹ Kujiri a nje nu̱ke a kwaaɗar ɗyine wora, chin ke nu̱ ru̱kti nu̱ vu̱rki zalale yenda ɗyine me ge gargha mboɓongndang. Dlu̱man ndu̱ me Yakhuda ke “Abadon”, ndu̱ me Gu̱rik ɗya “Apoliyon” mban za, “Nu̱ Su̱bu̱rti”.

¹² Ɗye zhiyaye nu̱ gumapaali wa peeta, qu̱rse nang ɗye zhiyaye nggur a nje nu̱ke a ɓar san rap.

Domndi nu̱ Njong

¹³ Kom tu̱ nu̱ ru̱kti nu̱ njong pi domndi ɓaran. Tang tu̱k su̱qur ɓalar a viri ve domndiku nu̱ ve ngginggeetli vatndi ɓu̱ du̱ku̱l ginarwe nu̱ke a gume Maghamang.

¹⁴ Tu̱ su̱qur ɓalar nang ze nu̱ ru̱kti nu̱ njongang nu̱ke domndang a kha ndang za, “Nggo nu̱ ru̱ktiku vatndi nu̱ke a nje gu̱ndan ku me gaawu gwaanji nu̱ Yufuretusang gha!”

¹⁵ Tu̱ ngga nu̱ ru̱ktiku vatndi nu̱ daasaki wor ma sarchi nang ndu̱ fu̱ɗar nang ndu̱ chere nang kom ndu̱ sonyi nang gha ma ku̱ tlagha da mbe kunung ɓu̱ yi ɓu̱ nduki nu̱ gha kap.

¹⁶ Yang wonji sojeku khang ɗyine pu̱rsiku. Nga tu̱k khang ɓu̱ sojeku nang, wa khu̱l miliyon won rap.

¹⁷ Mbu̱ nar ɗyiku tukakandi nu̱ yita naki nang: Nga na pu̱rsiku ndu̱ nu̱ lu̱bar wor nang nakyang mbu̱ zhine wanang ku. Wa sa pili kanggar memu̱na ɗyiman vyang zhurut wa no za ɗya ɓai, ndu̱ ɗyim zargine du̱lfu̱ndu̱ngdi wa ku̱ safaya, ndu̱ solfa nu̱ke ɗyiman wa shipa ɗyim lokhɗo. Yang ɗyin pu̱rsikwang wa shipa ɗyin mu̱zamndiku, ɓai ndu̱ qu̱ndi ndu̱ ɓai ɓongndi nu̱ke ɗu̱ng a viri mbu̱ me pu̱rsikwang.

¹⁸ Bonyeku kunungndi nang tlaghaki da mbu̱ kunung ɓu̱ nduki, alobe nu̱ ɓai, ndu̱ qu̱ndi, kom ndu̱ solfa nu̱ke a viri mbu̱ me pu̱rsiku nang.

¹⁹ Jiwa zalale ɓu̱ pu̱rsiku nang a mbu̱ me wor ndu̱ gaandi wora. Gaandi worang wa su̱tiku nu̱ ɗyinku tu̱ yang ka shi boote su̱ ku ma vu̱r bonye ye nduki.

²⁰ Yang ɓeeni nduki nu̱ke a nje mbu̱ larji nu̱ke nu̱ mu̱t mbu̱ alobe na ɓa rong ku̱me nu̱ tlagha wor nu̱gha ɓa, wa zhang nggoɗ memu̱na wor ma ku̱ shakh ku ndu̱ ɗyi nu̱ khar wor shiki. Nu̱ njig ghaari ghai ye khu̱kheetiku ɓa, yang nu̱ njig ghaari ghai ye mu̱lu̱mku nu̱ shiki ndu̱ ginarwe, ndu̱ ghuri, ndu̱ vi vyangndi, ndu̱ ndogdi, ndu̱ qu̱farku ɓa. Aa nu̱ke nu̱ka na maa ku ɓa, nu̱ka tu̱k ɓala ku ɓa yang nu̱ka ɗu̱ aa fu̱n ku ɓa.

²¹ Nu̱ nggoɗ memu̱na wor tu̱ njig tlaghar mu̱ti nu̱ke a shiran ku, ndu̱ ghwaati ghai, ndu̱ ɗye shir nu̱ zawarku bam bamndi ɓa, ndu̱ muuriku nu̱ke a shiran ku.