Ɗyin mbu̱ tukari 8 - Mewar Alqawarang

Qu̱ndi Yitu̱m Lagarkati nu̱ Mut

¹ Nu̱ Ye Gamndang qu̱nki yitu̱m lagarkati nu̱ mutanang, tu̱ maa viɗ kha yit me bing bindi awe da.

² Kom tang na nu̱ ru̱kti ku ɓu̱ Magham mutndikwang chingndan gha ku gume Magham, tu̱ yang vu̱r domndiku mut ye wora.

³ Tu̱ nu̱ ru̱kti ɓu̱ Magham nggur a ɓa tu̱ ching gha gume du̱ku̱lang ndu̱ du̱ɓ ginarwe nu̱ka vaki ɗye zhi mu̱nkandang si. Tu̱ vu̱r ɗye zhi mu̱nkandi yenda khang ndu̱ bararku ɓu̱ nduki ɓu̱ Magham kap, ma ku̱ vu̱r ɗyiku nang ye Magham ɗyine du̱ku̱l ginarwe nu̱ke a gume zhakhɗyang.

⁴ Tu̱ qu̱ndi var ɗye zhi mu̱nkandang ji mbu̱ khar nu̱ ru̱kti ɓu̱ Maghamang su̱yen ndu̱ bararku ɓu̱ nduki ɓu̱ Maghamang tu̱ ɗu̱ gume Magham.

⁵ Tu̱ nu̱ ru̱kti ɓu̱ Maghamang da du̱ɓ var ɗye zhi mu̱nkandang, tu̱ nyel nu̱gha ndu̱ ɓai nu̱ke a ɗyin du̱ku̱lang, tu̱ ɗa mbuk nu̱ ɗyine larji. Tu̱ shi pedlangndi, ndu̱ qura ghu̱mndi maari, ndu̱ wuti maari, ndu̱ yakhtar maa vu̱ghai.

Domndiku Vat nu̱ Gumapaali

⁶ Kom tu̱ nu̱ ru̱ktiku ɓu̱ Magham mutndi nu̱ domndiku nang daasa ma pi domndikwang.

⁷ Tu̱ nu̱ ru̱kti ɓu̱ Magham nu̱ gumapaalyang pi domndi ɓaranang. Tu̱ yang gotormol ndu̱ ɓai a vi, longgaran ndu̱ tom, ta mbuk wor nu̱ vu̱ghai ɗyine larji. Tu̱ ɓaiyang va da mbu̱ kunung ɓu̱ larji nu̱gha, tu̱ va da mbu̱ kunung ɓu̱ qu̱farku ndu̱ kap wuzu̱ndiku nu̱ke a tleebi maaranang nu̱gha.

⁸ Ni nu̱ ru̱kti ɓu̱ Magham nu̱ rapndang piiki domndi ɓaran, tu̱ ɗyi nggur nu̱ shipaki dleng gwaanji a vi ndu̱ ɓai a dlu̱r ve nda, tu̱ mbuk nda nu̱ mbu̱ ɗyim chitndi. Tu̱ da mbu̱ kunung ɓu̱ ɗyim chitndang mbu̱m tu̱ kha ma tom.

⁹ Tu̱ da mbu̱ kunung ɓu̱ ɗyi nu̱ nyifiriku nu̱ mbu̱ ɗyim chitndi nu̱ gaɓki ma tomang mu̱t ku. Tu̱ da mbu̱ kunung ɓu̱ du̱mbu̱l ɗyim ku nu̱ke a ye maa nang su̱ya ku.

¹⁰ Kom tu̱ nu̱ ru̱kti ɓu̱ Magham nu̱ kunungang pi domndi ɓaran. Tu̱ anjinje gwaanji nggur nu̱ shipaki ghiindi ɓai toshilen a dlu̱ri, ta nggu̱ɗ viɗi nu̱ ɗyine da mbu̱ kunung ɓu̱ gaawu ku ndu̱ ye maa ɓaghar ɓu̱ ɗyim ku.

¹¹ Dlu̱m anjinje nang za “Ɗomokh”. Tu̱ da mbe kunung ɓu̱ ɗyimku nang gaɓ ɗyot, tu̱ nduki khang za ɗyimang tu̱ mu̱t ku, ku̱me ɗyotan.

¹² Ni nu̱ ru̱kti ɓu̱ Magham nu̱ vat piiki domndi ɓaranang, tu̱ ghwat da mbu̱ kunung ɓu̱ fu̱ɗari, ndu̱ da mbu̱ kunung ɓu̱ chere, kom ndu̱ da mbu̱ kunung ɓu̱ anjinjeku. Tu̱ da mbu̱ kunung ɓu̱ ɗyikunang kap tu̱ gaɓ zhum. Tu̱ da mbu̱ kunung mbu̱ piti fu̱ɗa kha ware yarang, kom da mbu̱ kunung ɓu̱ virkiri kha ware yarang tu̱k.

¹³ Nu̱ke nga nggu̱tki, tang tu̱k jijau nggur nu̱ke a jiiri mu̱na viɗi a qar nu̱ su̱qur du̱mbu̱rkandi a zu̱ran za, “Ɗye zhiyayi! Ɗye zhiyayi! Ɗye zhiyayi ye nduki nu̱ mbu̱ larji. Ku̱me su̱qur piiri domndiku ɓu̱ nu̱ ru̱kti kunungndi nu̱ke a ma piiran kwang!”