Ɗyin mbu̱ tukari 7 - Mewar Alqawarang

Nduki Du̱pu Won ndu̱ Ɗyin Vat Qu̱m Vat nu̱ Israila (144,000)

¹ Qu̱rse nang, tang na nu̱ ru̱kti ku ɓu̱ Magham wor vat chingndan ve ngginggeetli vat nu̱ larji, a nggu̱tl khu̱kheeti vatndi nu̱ larji nang ku̱ pi nu̱ vu̱ghai, ndu̱ ɗyim chitndi, ndu̱ qu̱fa ɓa.

² Tang na nu̱ ru̱kti ɓu̱ Magham nggur nu̱ ɗa viki ɗokhatla, khubtan ndu̱ yitu̱m ɓu̱ Magham nu̱ nyifi. Tu̱ qa nu̱ ru̱kti ku vatndi nu̱ Magham vu̱rki zalale ye wor ku̱ su̱bu̱r larji ndu̱ ɗyim chitndi nu̱gha nang ndu̱ su̱qur du̱mbu̱rkandi.

³ Tu̱ nu̱ ru̱ktang zu̱ za, “Ku̱ su̱bu̱r nu larji nu̱gha ɓa, yang ɗyim chitndi ɓa, yang qu̱farku zum ɓa, kope chem wa sa yitu̱m nu̱ ve me guma pudeku ɓu̱ Maghamndi ɓaarem.”

⁴ Yang tang tu̱k khang ɓu̱ nduki nu̱ saki yitu̱m ye wor mbu̱ me ghaiku gwaanggu̱m rapndi ɓu̱ Israila, wor du̱pu won ndu̱ ɗyin vat qu̱m vat (144,000).

⁵ Mbu̱ me sham ɓu̱ Yakhuda, wa sa yitu̱m ye nduki du̱pu gwanggu̱m rap (12,000), me sham ɓu̱ Roben, du̱pu gwanggu̱m rap (12,000), me sham ɓu̱ Gad, du̱pu gwanggu̱m rap (12,000).

⁶ Me sham ɓu̱ Asha, du̱pu gwanggu̱m rap (12,000), me sham ɓu̱ Naptali, du̱pu gwanggu̱m rap (12,000), me sham ɓu̱ Manase, du̱pu gwanggu̱m rap (12,000).

⁷ Me sham ɓu̱ Simiyon, du̱pu gwanggu̱m rap (12,000), me sham ɓu̱ Lawi, du̱pu gwanggu̱m rap (12,000), me sham ɓu̱ Isakar, du̱pu gwanggu̱m rap (12,000).

⁸ Kom ndu̱ me sham ɓu̱ Zebulun, du̱pu gwanggu̱m rap (12,000), me sham ɓu̱ Yusufu, du̱pu gwanggu̱m rap (12,000), me sham ɓu̱ Banyami, du̱pu gwanggu̱m rap (12,000).

Tabar gwaanji ɓu̱ Ndukiku mbu̱ Lukti Ɓongndi

⁹ Qu̱rse nang, nang nggu̱tki tang na tabar ɓu̱ nduki khang ku̱na shiga. A vi mbu̱ aa nyi pooni dlar maa ku, ndu̱ pooni nduki, ndu̱ nduki, ndu̱ me ghaiku, chingndan gha ku gume zhakhɗyang kom ndu̱ gume Ye gamndang. Wa sa luktiku ɓongndi, khubtan nu̱ me bu̱n qu̱far jipu̱no mbu̱ khar wora.

¹⁰ Tu̱ da su̱qur wor nu̱ viɗi a zu̱ran ku za, “Ɗana ɗya ɓu̱ Maghamndi ɓaarem, chin nu̱ke a nje kharan ɗyine zhakhɗyang kom ndu̱ Ye gamndang!”

¹¹ Tu̱ nu̱ ru̱ktiku ɓu̱ Maghamang kap ching gha ku tu̱ kara zhakhɗyang ndu̱ ndukkudaandikwang, ndu̱ nu̱ nyifi ku vatndang. Tu̱ kurpa yaghai ku nu̱ mbu̱ yiti wora gume zhakhɗyang, tu̱ ghar ghai ye Magham ku,

¹² a zu̱ran ku za, “Amin! Khamndi, ndu̱ zhaaji, ndu̱ kaɗari, ndu̱ kunari, ndu̱ gorkir, ndu̱ zalale, ndu̱ du̱mbu̱r ku̱ kha Maghamndi ɓaarem aakochi koɗokhsi ɓa! Amin!”

¹³ Kom tu̱ da chele ndukkudaandikwang zhamndi nga za, “Wor nu̱ke a mbu̱ lukti ɓongndiku nang ɗya nu̱ kiya? Yang a vi ku fu̱na?”

¹⁴ Tang tlogha nga za, “Ta zu̱ni, ku̱man.” Tu̱ yang zu̱ ya za, “Ndukiku nang wora viki mbe bonye maɗyikandi. Wa shiɓ luktiku ɓaanda nu̱ gha ndu̱ tom ɓu̱ Ye gamndang, tu̱ kha ɓong ku.

¹⁵ “Nang ke ɗyi nu̱ saki, Tu̱ ching gha ku gume zhakhɗye ɓu̱ Maghamang, a tlu̱nar yenda ku virkir ndu̱ fu̱ɗar mbu̱ rafti ɓaran. Chin nu̱ke a nje kharan ɗyine zhakhɗyang ka za wor nu̱gha ndu̱ kalap ɓaran tu̱ kangga wora.

¹⁶ Ɓu̱ tu̱k meeri ku tu̱k sar da ɓa; ɓu̱ tu̱k khuzhum ku tu̱k sar da ɓa. Fu̱ɗa ɓu̱ va wor ɓa, yang aa nyi gu̱r gu̱r zum ɓa!

¹⁷ Jiwa Ye Gamndi nu̱ke a chele zhakhɗyang ka khaki ma nu̱ khutlo ɓaanda, ka ɗu̱ ndu̱ wor ye maa nu̱ke ɗyim nyifiri ka ɓaghaki. Magham ka pasha koonyi ɗyim gho ɓaanda ɓar kap mbu̱ yiti wora.”