Ɗyin mbu̱ tukari 5 - Mewar Alqawarang

Ye Gam ndu̱ Lagarkati Ɗyiklakandi

¹ Tang na lagarkati ɗyiklakandi nu̱ke chin nu̱ke kharan ɗyine zhakhɗyang khubki nu̱ mbu̱ kharan nu̱ zu̱ma. Lagarkati ɗyiklakandi nang bu̱laran mbu ndu̱ dam, yang gu̱ndan ɗyiɗying ndu̱ yitu̱m mut saran si.

² Tang na nu̱ ru̱kti ɓu̱ Magham gwaanji du̱mbu̱rkandi, a wopar ndu̱ su̱qur gwaanji a zu̱ran za, “Ki ka ɗu̱maki tu̱ kwatl yitu̱m nang nu̱gha tu̱ qu̱n lagarkatang nu̱gha tu̱ka?”

³ Yang nduk a nje mbu̱ viɗi, ndu̱ maa vu̱ghai, ndu̱ mbu̱ vu̱ghai nu̱ khu̱lki ku̱ qu̱n lagarkati ɗyikhlakandang nu̱gha, tu̱ nggu̱t mbu̱ ɗyi nu̱ke a mban ɓa.

⁴ Tang shi gho maɗyikandi nu̱ke nduk nje nu̱ khu̱lki ma ku̱ ɗu̱ma qu̱n lagarkati ɗyikhlakandang nu̱gha tu̱ nggu̱t ɗyi nu̱ke a mban ɓa ndang.

⁵ Tu̱ yang da chele ɓu̱ ndukkudaandiku nang shi ɓalar ya za, “Shi na gho ɓa! Nggu̱ɗu! Mu̱zamndi nang, nu̱ ɗa viki me sham ɓu̱ Yakhuda, pooni ɓu̱ Dauda wa ra wutyang. Zalale a nje kha nda ma ku̱ kwatl yitu̱m mutndi nang ndu̱ ku̱ qu̱n lagarkati ɗyikhlakandang nu̱gha.”

⁶ Tang na Ye Gamndi ba wa quran dlaran, chingndan tala ɗyine zhakhɗyang, kararan ndu̱ nu̱ nyifi ku vatndi nang nu̱ ndukkudaandikwang. Domndi ɓaranang mut ndu̱ yitiku mut, nu̱ke ɗya jiimbiku mutndi ɓu̱ Magham nu̱ ru̱kki wor nu̱ mbu̱ larji kap.

⁷ Tu̱ Ye Gamndi nang ɗu̱ tu̱ ɗa dlu̱ lagarkati ɗyikhlakandi nang ɓar mbu̱ khar nu̱ zu̱me ɓu̱ njif nu̱ke a nje kharan ɗyine zhakhɗyang.

⁸ Nu̱ dlu̱ki, tu̱ nu̱ nyifi ku vatndi nang ndu̱ ndukkudaandiku ɗyirap qu̱m vatndang qan nu̱ gume Ye gamndang. Aa nyi da chele ɓaanda wa khuɓ sumbul ndu̱ du̱ɓ ginarwe nyeedlan ndu̱ ɗye zhi mu̱nkandi chin ke barar ɓu̱ nduki ɓu̱ Magham.

⁹ Tu̱ qa mewar taazi ku, a zu̱ran ku za, “Ta khu̱l ma ku̱ dlu̱ na lagarkati ɗyikhlakandang to qu̱n yitu̱m ɓaran kwang nu̱gha. Jiwa wa tlagha nu̱gha zhu, yang nu̱ ku̱nshe tom ɓaaro ta dli ɗyin nduki ye Magham mbe aa nyi me sham, ndu̱ me ghin, ndu̱ me ghai, ndu̱ aa nyi nduki.

¹⁰ Ta gaɓ ndu̱ wor ma kwaaɗari ndu̱ kuruku ma ku̱ shi tlu̱nar ɓu̱ Maghamndi ɓaarem, ka shi kwaaɗar ku ɗyine larji.”

¹¹ Nang nggu̱tki, tang tu̱k su̱qur nu̱ ru̱ktiku ɓu̱ Magham khang nu̱ dukki aru ndu̱ aru ndu̱ aru ku̱na shiga. Chingndan ku wa kara zhakhɗyang, su̱yen ndu̱ nu̱ nyifi kwang, ndu̱ ndukkudaandikwang,

¹² a taazi ku ndu̱ su̱qur gwaanji. A zu̱ran ku za, “Ye Gamndi nu̱ dlaki quran nu̱ghang wa khu̱dli, ma ku̱ dlu̱ zalale ndu̱ gu̱nari, ndu̱ kaɗari, ndu̱ du̱mbu̱ri, ndu̱ gorkiri, ndu̱ zhaaji, ndu̱ khamndi!”

¹³ Tang tu̱k aa nyi tun nu̱ Magham shiki mbu̱ viɗi ndu̱ vu̱ghai, ndu̱ mbu̱ vu̱ghai, ndu̱ mbu̱ gaawu gwaanji, ɗyiku nu̱ nyifiri nu̱ke a mbu̱ maaku nang kap a qa taazi ku. A zu̱ran ku za, “Ma yir she njif nu̱ke kharan ɗyine zhakhɗyang nu̱ Ye gamndang. Bu ku̱ khamndi, ndu̱ gorkiri, ndu̱ zhaaji, ndu̱ zalale, kha nda aakochi koɗokhsi ɓa!”

¹⁴ Tu̱ nu̱ nyifi ku vatndi nang tlogha za, “Amin!” Tu̱ ndukkudaandikwang qan nu̱ gume nda tu̱ ghar ghai yenda ku.