Ɗyin mbu̱ tukari 4 - Mewar Alqawarang

Zhakhɗye mbu̱ Viɗi

¹ Qu̱rse nang, nang gharki yita nu̱ viɗi, tang na me vi qu̱ndan. Su̱ qur nang tu̱kki gumapaalyang nu̱ shipaki pi domndi a zu̱ran za, “A dlo nu̱ fan, ngga wut ɗyi nu̱ke shwat ka ɓa ɗatlki qu̱rse nang yoro.”

² Fan ndu̱ fan tang gwa vara mbu̱ Jiimba, tang na zhakhɗye kwaaɗar nggur nu̱ke njif nggur a nje kharan ɗyinan mbu̱ viɗi.

³ Njif nu̱ke a nje kharan ɗyine zhakhɗye nang a wuti wa ndogdiku nu̱ zhaaji jaspa nu̱ke ɗyiman vyang kom ndu̱ karneliya nu̱ke ɗyiman kharau. Kobyong nu̱ke a wuti wa ndogdi emeral nu̱ke ɗyiman wa ɗyim kalma wa kara zhakhɗye kwaaɗarang nu̱gha.

⁴ Yang tu̱k zhakhɗyeku nggur wor ɗyirap qu̱m vat a nje kararan ndu̱ zhakhɗye nang ndu̱ ndukkudaandiku wor ɗyirap qu̱m vat kharan ɗyinan ku. Ndukkudaandiku nang wa sa luktiku ɓongndi ndu̱ ɗye zhar nu̱ ginarwe ve ɗyin wora.

⁵ Wuti maari ndu̱ su̱qur ghu̱mndi maari kom ndu̱ pedlangndi a viri she zhakhɗyang. Yang tu̱k tokhol ɓaiku mut a nje nu̱ke a dlu̱r gume zhakhɗyang, nang ke jiimbi mutndi ɓu̱ Magham.

⁶ Gume zhakhɗyang ɗyi nggur a nje nu̱ shipaki ɗyim gaawu gwaanji nu̱ gu̱las, nu̱ke a wuti wa ɗye nari. Yang nu̱ nyifi ku wor vat a nje nu̱ke var wor kap yiti guma ndu̱ gana.

⁷ Nu̱ nyifi nu̱ gumapaalyang wa shipa mu̱zam, nu̱ rapanang wa shipa getl, nu̱ kununganang mbu̱ yitan wa shipa ɓu̱ nduku, nu̱ vatanang wa shipa jijau nu̱ke a jiiri.

⁸ Khobki njong kya ve aa nyi da chele ɓu̱ nu̱ nyifiku vatndi nang, vaanda kap yitiku mbu ndu̱ dam kap ndu̱ mbu̱ khobki wora. A taazi ku virkir ndu̱ fu̱ɗar laada su̱ ɓa a ɗyinan ku za, “To shakhshakh, To shakhshakh, To shakhshakh, Zhinkir gwaanji Magham nu̱ zalale aa nu̱m kap! Chin kya nje zhu, chin kya nje leendang, chin kya nje a ɓari.”

⁹ Aa nyi sarchi nu̱ke nu̱ nyifiku vatndi nang, qaki taazi vu̱rti zhaaji, ndu̱ vu̱rti gorki, ndu̱ wuti kunar ye njif nu̱ke a nje kharan ɗyine zhakhɗyang, nu̱ke ɗya nu̱ nyifi aakochi koɗokhsi ɓa. Yang ye sarchi nu̱ qaki taazi ku nang kap,

¹⁰ tu̱ ndukkudaandiku ɗyirap qu̱m vatndi nang ka nggu̱ɗ nu̱ gume njif nu̱ke a nje kharan ɗyine zhakhɗyang. Tu̱ ka ghar ghai yenda ku, chin nu̱ke a nje ndu̱ nyifiri aakochi koɗokhsi ɓa. Tu̱ ka du̱ng ɗye zhar ku ɓaanda nu̱ vu̱ghai gume zhakhɗyang, a zu̱ran ku za,

¹¹ “Zhinkir gwaanji ndu̱ Maghamndi ɓaarem, ta khu̱dli, ku̱ dlu̱ na zhaaji, ndu̱ gorkiri, ndu̱ zalale. Jiwa to du̱ngki aa nu̱m ndu̱ aa nu̱m, yang nu̱ ku̱nshe shimndi ɓaaro du̱ngki wora tu̱ kha ma nu̱ nyifiri ku.”