Ɗyin mbu̱ tukari 3 - Mewar Alqawarang

Bu̱lar ma Yir she Tabar ɓu̱ nu̱ Mbu Yesu nu̱ke a Sardis

¹ “Bu̱lo ye nu̱ ru̱kti ɓu̱ tabar ɓu̱ nu̱ mbu Yesu ku nu̱ke a Sardis no za, Wonji ɓalar nu̱ ɗa viki she njif nu̱ khubki jiimbiku mutndi ɓu̱ Magham, ndu̱ anjinjeku mut khubtan kha ndang. Nga zu̱n ɗye shir ɓaaro. Nduki a na wa to nu̱ nyifi, yang to mu̱tan!

² Ju nu̱ viɗi! To pa du̱mbu̱r ye ɓeena ɗyiku nu̱ke a nje yang wa shi bing mu̱ti, ku̱me nang gwa ɗye shirku ɓaaro nyeedlan gume Maghamndi ɓang ɓa.

³ Ku̱me nang kor ɗyi no tu̱kki to dlang. Nggoɗ to njig solar nu̱ke ta shiran to mbu zhire ni. Mbu̱ yang no nakha ɓa, ngga ɗa ɓa ba wa nu̱ke nu̱ muuru ka shiki, ngga ɗa ɓa yang tom ɓu̱ zu̱m sarchi nu̱ke ngga ɗa ɓa ki ɓa.

⁴ Yang ma ɓar leendang nduki a nje koɗom chele ɓaanu mbu̱ Sardis nu̱ shiki khar viti mbarkandi. Ka shi yir ku ndu̱ nga nu̱ luktiku ɓongndi saran ve wora, ku̱me wa khu̱l ku̱ shi wanang ku.

⁵ Njif nu̱ raki wute nang ka sa lukti ɓongndi wa wora. Shwat ngam ɓu̱ fet dlu̱man ɓar mbu̱ Lagarkati nyifi ɓa. Yang sarchi nang chingki gha gume Zhinkir ɓanga ndu̱ nu̱ ru̱ktiku ɓaran, ngga saida dlu̱man.

⁶ Nu̱ dlu̱mdi tu̱kti maa, ku̱ tu̱k ɗyi nu̱ke Jiimba a zu̱ran ye tabarku ɓu̱ nu̱ mbu Yesu ku!

Bu̱lar ma Yir she Tabar ɓu̱ nu̱ Mbu Yesu nu̱ke a Filadelfiya

⁷ “Bu̱lo ye nu̱ ru̱kti ɓu̱ tabar ɓu̱ nu̱ mbu Yesu ku nu̱ke a Filadelfiya no za, Wonji ɓalar na ɓa ki she njif shakhshakhndi nu̱ zhire. Chin nu̱ke a ku̱s ɗye qu̱ndi kwaaɗar ɓu̱ Kuji Dauda, nu̱ke mbu̱ wa qu̱n tunu nu̱gha nduk a nje nu̱ke ka zaki nu̱ gha ɓa, mbu̱ yang wa za nu̱ gha, nu̱ qu̱ndan nu̱gha nje ɓa.

⁸ Nga zu̱n ɗye shirku ɓaaro. Wonji, nga qu̱n me viri nu̱ gume ro nu̱ke nduk a nje nu̱ke ka ɗu̱maki zaran nu̱gha ɓa. Nga zu̱n du̱mbu̱r ɓaa kata. Yang kap ndu̱ nang ta mbu zu̱r ɓanga, no keela zu̱ndi nga ɓa.

⁹ Wonji, ngga sa nduki nu̱ke a mbu̱ kib tabar ɓu̱ Sheɗan, nu̱ka qaki vaanda ku za wor Yakhudeku yang a shikya wollo ku ku̱me ɗyen wanang ɓa. Ngga sa wor tu̱ ɗa ɓa tu̱ nggu̱t nu̱ yaghai gume ro ma ku̱ zu̱n ku nu̱ ɗyine nga ndola ro.

¹⁰ Nu̱ke ta khutlo ɓalar ɓanga mbe gu̱ndi memu̱nar mbe kanaɗyi no shiki, ngga kangga mbe sarchi bonye nu̱ke a ɓari ɗyine larji ma buu nduki nu̱ke a mban.

¹¹ Nga ɓar fan ndu̱ fan. Tun khuɓ maito ɓaanu ɓang ɓang, ma ku̱ njif nggur lawa ɗye zhar nu̱ke tun ka gwaki ɓar ɓa.

¹² Aaki raki wute ngga gaɓ ndu̱ chin ma zaure mbu̱ rafti ɓu̱ Zhinkir ɓanga. Njif nang ɓu̱ njig ye maaran sar da ɓa. Nga bu̱la dlu̱m Maghamndi ɓanga kom ndu̱ dlu̱m ghai ɓu̱ Maghamndi ɓanga mewar Urshalima, nu̱ke ka ɗa shurki mbu̱ viɗi she Maghamndi ɓanga. Nga bu̱la mewar dlu̱ma nu̱ ɗyine nda tu̱k.

¹³ Nu̱ dlu̱mdi tu̱kti maa, ku̱ tu̱k ɗyi nu̱ke Jiimba a zu̱ran ye tabarku ɓu̱ nu̱ mbu Yesu ku!

Bu̱lar ma Yir she Tabar ɓu̱ nu̱ Mbu Yesu nu̱ke a Lawudikiya

¹⁴ “Bu̱lo ye nu̱ ru̱kti ɓu̱ tabar ɓu̱ nu̱ mbu Yesu ku nu̱ke a Laudikiya no za, Wonji ɓalar nu̱ ɗa viki she njif nu̱ka qaki nda za Amin. Chin wutki parakh zhire ɓu̱ Magham, yang Magham shi aa nu̱m kap nu̱ ku̱nshe nda.

¹⁵ Nga zu̱n ɗye shirku ɓaaro, to ndotlu̱tla ɓa yang gu̱rgu̱r ɓa. Nga shim tu̱ga mbu̱ to ndotlu̱tla ɓa to kha gu̱rgu̱r!

¹⁶ Yang nu̱ke to lu̱p, to ndotlu̱tla ɓa yang gu̱rgu̱r ɓa, ngga kwaator ɓar mbu̱ mya.

¹⁷ Jiwa ta zu̱ no za, ‘Nga nu̱ gu̱na, nga shi yele, nang mbu̱ɗ aa nu̱m ɓa.’ Yang no zu̱n ɓa to bootaran, to ɗye zhiyaye, to nungndan, so nggaran, yang to puguman tu̱k.

¹⁸ Nga vu̱r sawari yoro, ku̱ masa na ginarwe sha, ginarwe nu̱ shiɓki nu̱ gha ndu̱ ɓai, ma ku̱ gwa na gu̱nari, ndu̱ luktiku ɓongndi to san ve vaaro ma ku̱ za na kawar ɓu̱ so nu̱ke a nje nggaran nang. Moso kuzhi khaati yiti sha to san ve yitoro, ma ku̱ yitor na maari.

¹⁹ Ngga wukya nduki nu̱ke nga shimndan tang ɗu̱r wora. Ku̱me nang kho ndu̱ zhire to nggoɗ khar viti ɓaaro.

²⁰ Wonji nga! Nga nje chingndan me viri nga ghwaatan. Aaki tu̱kki nga tu̱ qu̱n me virang nu̱gha, ngga ɗa vi tang zu̱m su̱yen ndu̱ chin, tu̱ zu̱m su̱yen ndu̱ nga tu̱k.

²¹ Kap njif nu̱ raki wute, ngga sa nda tu̱ kha gha su̱yen ndu̱ nga wudle zhakhɗye kwaaɗar ɓanga, ba wa nang raki wute tang kha gha su̱yen ndu̱ Zhinkir ɓang wudle zhakhɗye kwaaɗar ɓaran.

²² Nu̱ dlu̱mdi tu̱kti maa, ku̱ tu̱k ɗyi nu̱ke Jiimba a zu̱ran ye tabarku ɓu̱ nu̱ mbu Yesu ku!”