Ɗyin mbu̱ tukari 22 - Mewar Alqawarang

¹ Kom tu̱ nu̱ ru̱kti ɓu̱ Magham wut gaawu ya nu̱ka vu̱rki ɗyim nyifiri, yaryar wa gu̱las, yang a kuɗar she zhakhɗye ɓu̱ Magham ndu̱ ɓu̱ Ye gamndang.

² Chele njiv gwaanji nu̱ mbu̱ ghayang tu̱k, ve aa nyi me gu̱mndi ɓu̱ gaawang qu̱far nyifiri a nje nu̱ka khaki qusonggi sar gwaanggu̱m rap mbu̱ sonyi, ka kha sar da aa nyi chera. Yang dlu̱mndi qu̱farang shi ma shaana dlar maa ku nu̱ larji kap.

³ Ɓu̱ gwa ɗyi nggur nu̱ Magham miiki barke ɓaran mbu̱ ghai nang ɓa. Zhakhɗye ɓu̱ Magham ndu̱ ɓu̱ Ye gamndang ka kha gha mbu̱ ghayang. Maaviku ɓaran yang ka ghar ghai yenda.

⁴ Ka na mbu̱ yitan ku, yang dlu̱man a nje bu̱laran me guma wora.

⁵ Virkir nje tu̱k ɓa, ɓu̱ gang pitile ku ɓa yang yarang fu̱ɗa ɓa, ku̱me Magham Zhinkir gwaanji ka vu̱rki yarang ye wora. Ka shi kwaaɗar ku koɗokhsi ɓa.

⁶ Tu̱ nu̱ ru̱ktang zu̱ ya za, “Ɓalar nang ɗya zhire, ɗyen wanang shwat. Zhinkir gwaanji Maghamndi ɓu̱ Jiimbiku ɓu̱ annabiku, a ru̱kki ndu̱ nu̱ ru̱kti ɓaran sha ma ku̱ wut ɗyi nu̱ke a ma ɗaatli ɓu̱ shoɓ ɓa ye maaviku ɓaran.”

Yesu a Ɓari

⁷ “Yang wonji, nga ɓar ɗau! Nduki nu̱ke a mbu ɓalar zu̱r ɓu̱ Magham nu̱ke a mbu̱ lagarkati nang ɗya nu̱ barka ku.”

⁸ Nga, Yokhana, nga tu̱kki, tang na ɗyiku nang. Nang woɗaki tu̱ktan ndu̱ naran, tang nggu̱ɗ nu̱ gume nu̱ ru̱kti nu̱ wutki ɗyiku nang ya, ma ghar nga ghai yenda.

⁹ Tu̱ yang zu̱ ya za, “Shi na ɓa! Nga mu̱dlonu maava, to ndu̱ nyeezor annabiku, ndu̱ kap nduki nu̱ke a mbu ɓalar nu̱ mbu̱ lagarkati nang. Ghor ghai ye Magham!”

¹⁰ Tu̱ zu̱ ya tu̱k za, “Za na ɓalar nu̱ke a mbu̱ lagarkati zu̱r ɓu̱ Magham nang nu̱gha ɓa, ku̱me sarchi wa shi bing nu̱ke ɗyiku nang kap ka ɗatli.

¹¹ Nu̱ tlu̱nar zop ku̱ zu̱m guma ndu̱ tlu̱nar zop ɓaran, nu̱ tlu̱nar ɗye zhaana ku̱ zu̱m guma ndu̱ shir ɗye zhaane ɓaran tu̱k. Yang nu̱ tlu̱nar ɗyi mbarkandi ku̱ zu̱m guma ndu̱ shir ɗyi mbarkandi ɓaran, nu̱ khar viti shakhshakhndi tu̱k ku̱ zu̱m guma ndu̱ khar viti shakhshakhndi ɓaran.”

¹² “Wonji, nga ɓar ɗau! Ngga ɗa ɓa ndu̱ ɗye ɓi ɓang khara, tang vu̱r ye aaki ku̱rku̱r ndu̱ ɗyi nu̱ tlu̱naki.

¹³ Nga ke Alfa Nga ke Omega, Nga ke Guma Nga ke Gana, Nga ke Nggarsan Nga ke Lauɗarsan.

¹⁴ “Nduki nu̱ shiɓki luktiku ɓaanda nu̱ gha, ma ku̱ gwa zalale nji qu̱far nyifiri, tu̱ vi ku nu̱ mbu̱ ghayang ve me viri, ɗya nu̱ barka ku.

¹⁵ Yang nduki nu̱ke a dam ɗya nduki nu̱ke zopan, ndu̱ nu̱ ɓu̱tli ghai ku, ndu̱ nu̱ zawar ku, ndu̱ nu̱ tlaghar mu̱ti ku, ndu̱ nu̱ ghaari ghai ye mu̱lu̱m ku, ndu̱ nu̱ shimndi wollo ndu̱ shir wollo.

¹⁶ “Nga, Yesu, nga ru̱kki nu̱ ru̱kti ɓanga ma ku̱ zu̱ ɗyiku nang yoro ma yir she tabar ɓu̱ nu̱ mbu Yesu ku. Nga ke dlu̱dlarsi Dauda, nga tom ɓaran tu̱k. Nga ke pazar ɗatli maa, nu̱ ka shiki wuti.”

¹⁷ Jiimba ndu̱ Wonkhar nu̱ke a ma ɓu̱rti a zu̱ran ku za, “A ɓo!” Yang kap njif nu̱ tu̱kki, ku̱ zu̱ tu̱k za, “A ɓo!” Kap njif nu̱ke a tu̱k khuzhumndi ku̱ ɗa ɓa, kap njif nu̱ke a gangndan ku̱ dlu̱ ɗyim nu̱ka vu̱rki nyifiri mu̱nki.

Lauɗarsi Ɓalari

¹⁸ Nga, Yokhana, nga dut dlu̱mdi aaki nu̱ tu̱kti ɓalar zu̱r ɓu̱ Magham nu̱ mbu̱ lagarkati nang. Nu̱ ɗyine, mbu̱ke nduk wa shaata ɗyi nggur nu̱ ɗyinan, Magham ka shaata alobeku nu̱ bu̱laki nu̱ mbu̱ lagarkati nang yenda.

¹⁹ Mbu̱ yang nduk wa kata ɗyi nggur nu̱gha mbu̱ ɓalar zu̱r ɓu̱ Magham nu̱ke a mbu̱ lagarkati nang, Magham ka da me shakhti ɓaran ɓara mbu̱ ye qu̱far nyifiri, ndu̱ ghai shakhshakhndang. Ba wa nu̱ wutki mbu̱ lagarkati nang.

²⁰ Chin nu̱ saidaki ɗyiku nang kap wa zu̱ za, “I, nga nja ɓar ɗau!” Amin. A ɓo, Zhinkir gwaanji Yesu!

²¹ Bu ku̱ mu̱nkir ɓu̱ Zhinerem gwaanji Yesu kha gha su̱yen ndu̱ nduki ɓu̱ Magham kap. Amin!