Ɗyin mbu̱ tukari 21 - Mewar Alqawarang

Mewar Maa Viɗi ndu̱ Mewar Maa Vu̱ghai

¹ Kom tang na maa viɗi mewakandi ndu̱ maa vu̱ghai mewakandi. Maa viɗi nu̱ gumapaali ndu̱ maa vu̱ghai nu̱ gumapaali wa su̱ya ku kap, ɗyim chitndi nje tu̱k ɓa.

² Tang na Ghai Shakhshakhndi nang tu̱k, chin ke, Urshalima mewakandi, a zhurti mbu̱ viɗi she Magham. Wa daasa nda nu̱ gha wa wonkhar nu̱ke a ma ɓu̱rti mewa nu̱ shiki viri ku̱me zhimen.

³ Tang tu̱k su̱qur ɓalar du̱mbu̱rkandi a vi she zhakhɗyang a zu̱ran za, “Leendang maa khar ɓu̱ Magham a su̱yen ndu̱ nduki! Ka kha gha su̱yen ndu̱ wora, ka kha ma nduki ɓaran. Magham ndu̱ ɗyinan ka kha gha su̱yen ndu̱ wora, tu̱ kha ma Maghamndi ɓaanda tu̱k.

⁴ Ka pasha ɗyim ghoori ɓar kap mbu̱ yiti wora. Mu̱t nje tu̱k ɓa, khar yaaɓa nje ɓa, gho nje ɓa, yang bonye nje zum ɓa. Jiwa me shir ɗyiku nu̱ zhu wa peeta.”

⁵ Tu̱ njif nu̱ke a nje kharan ɗyine zhakhɗye nang zu̱ za, “Nggu̱ɗu, nga gaɓti ndu̱ aa nu̱m ku̱ kha mewa!” Tu̱ zu̱ ya tu̱k za, “Bu̱lo nang nu̱ gha, ku̱me nang ɗya ɓalar zhirekandi, yang bai bai su̱ ɓa.”

⁶ Tu̱ gaɓ tu̱ zu̱ tu̱k za, “Wa woɗa shiri! Nga ke Alfa ndu̱ Omega, Nggarsan ndu̱ Lauɗarsan. Kap njif nu̱ke a tu̱k khuzhumndi, ngga vu̱r zalale yenda ku̱ za ye maa ɓaghar ɗyim nu̱ka vu̱rki nyifiri mu̱nki.

⁷ Njif nu̱ raki wute nang kap ka gwa ɗye mbu̱ ge khara, tang kha ma Maghamndi ɓaran, tu̱ kha ma yi ɓang tu̱k.

⁸ Yang nu̱ sawarku, ndu̱ nu̱ song shir zhireku, ndu̱ nu̱ tlu̱nar ɗye zhaane ku, ndu̱ nu̱ tlaghar mu̱tiku, ndu̱ nu̱ zawarku, ndu̱ nu̱ ɓu̱tli ghaiku, ndu̱ nu̱ ghaari ghai ye mu̱lu̱mku, ndu̱ kap nu̱ wolloku. Ka gwa ɗye ɓi ɓaanda mbu̱ giɗim ɓai gu̱rgu̱rndi nu̱ ɓai solfa, nang ke mu̱ti nu̱ rap.”

Mewar Urshalima

⁹ Tu̱ da chele nu̱ ru̱ktiku mutndi nu̱ du̱ɓaku nu̱ nyeelki ndu̱ alobeku mutndi nu̱ gana nang a ɓa sha tu̱ zu̱ ya za, “A ɓo, wut nga Wonkhar nu̱ke a ma ɓu̱rti mewa, chin ke nokhzi Ye gamndang.”

¹⁰ Tu̱ da nga mbu̱ Jiimba tu̱ ɗu̱ ndu̱ nga ɗyine dleng kirkandi gwaanji, tu̱ wut Urshalima ya, chin Ghai Shakhshakhndi nang a zhurti mbu̱ viɗi she Magham.

¹¹ Ghayang a wuti ndu̱ yarang ɓu̱ zhaaji ɓu̱ Magham, yarang ɓaran wa kha wa ndogdi nu̱ zhaaji, wa jaspa, a wuti yaryar wa ɗyim mbu̱ ndooga.

¹² Garuk a nje gwaanji kirkandi, ndu̱ me vi ku gwaanggu̱m rap, ndu̱ nu̱ ru̱ktiku ɓu̱ Magham gwaanggu̱m rap chingndan me virikwang. Wa bu̱la dlu̱m me shamku gwaanggu̱m rapndi ɓu̱ nduki nu̱ Israila nu̱ ɗyine me virikwang.

¹³ Me viri kwang, kunung a ɗokhatla, kunung a kona, kunung a yela, kom kunung a mugu.

¹⁴ Sar saari garuk ghayang shakhtan san gwaanggu̱m rap, tu̱ bu̱la dlu̱m pudeku gwaanggu̱m rapndi ɓu̱ Ye gamndang nu̱ ɗyinan.

¹⁵ Yang saaɓir buu maari nu̱ shiki ndu̱ ginarwe a nje kha nu̱ ru̱kti ɓu̱ Magham nu̱ shiki ɓalarang ya, yang a ma buukya ghayang, ndu̱ me viranku, ndu̱ garukan tu̱k.

¹⁶ Yang dlar maa nu̱ke ghayang a si buran ku̱rku̱r ve aa nyi maa, kirti ɓaran ndu̱ dlamdlam ɓaran kap wayen. Tu̱ nu̱ ru̱ktang buu ghayang ndu̱ saaɓir buuri maarang, tu̱ gwa kilomite du̱pu rap ndu̱ won rap (2,200), qaandi ɓaran ndu̱ dachi ɓaran ndu̱ chingndi ɓaran kap wayen.

¹⁷ Tu̱ nu̱ ru̱kti ɓu̱ Maghamang buu garkyang tu̱k, tu̱ gwa dlombu̱roman wa khu̱l mite ɗyin njong qu̱m qurmun (65), ba wa nu̱ke nduk ka buuki tun ku̱rku̱r.

¹⁸ Du̱n garkyang ndu̱ ndogdi nu̱ zhaaji nggur nu̱ka qaki za jaspa, tu̱ du̱n ghayang tu̱k ndu̱ ginarwe me ɗyinan, yaryar wa gu̱las.

¹⁹ Wa ku̱dma su̱ garuk ghayang nu̱ gha ndu̱ aa nyi pooni ndogdi nu̱ zhaaji. Ndogdi nu̱ gumapaali ɗya jaspa ve su̱ du̱ndang, nu̱ rapan safaya, nu̱ kunungan agat, nu̱ vatan emaral,

²⁰ nu̱ qurmun ɗya onis, nu̱ njong karneliyan. Kom nu̱ mut kirisolat, nu̱ miyasi beril, nu̱ mu̱dlam topaz, nu̱ gwang daimon, nu̱ gwaanggu̱m da jasin, nu̱ gwaanggu̱m rap ametis.

²¹ Yang me vi ku gwaanggu̱m rapndi nang shi wor ndu̱ ndogdi nu̱ zhaaji ku wor gwaanggu̱m rap, shi aa nyi me vi da ndu̱ ndogdi nu̱ zhaaji da. Shi njivku nu̱ mbu̱ ghayang ndu̱ ginarwa me ɗyinan, a wuti wa ɗye nari.

²² Nang na rafti ɓu̱ Magham mbu̱ ghayang ɓa, ku̱me Zhinkir gwaanji Magham nu̱ zalale aa nu̱m kap ndu̱ Ye Gamndang ke raftang.

²³ Yarang ɓu̱ fu̱ɗa ndu̱ chera ɓu̱ kha ndu̱ boota mbu̱ ghayang ɓa, ku̱me zhaaji ɓu̱ Magham kya vu̱r yarang yenda, Ye gamndang ke pitile ɓu̱ ghayang.

²⁴ Nduki nu̱ larji ka shi yir mbu̱ yarang ɓu̱ ghayang, yang kujiku nu̱ larji ka ɗa ɓa ndu̱ gu̱nar ɓaanda nu̱ mbu̱ ghayang.

²⁵ Sar da fu̱ɗa nje nu̱ke ka khiiki me vi ghayang nu̱gha ɓa yang virkir nje ɓa.

²⁶ Ka ɗa ɓa ndu̱ zhaaji ndu̱ gorkir ɓu̱ dlar maa ku nu̱ mbu̱ larji kap mbu̱ ghayang.

²⁷ Ɗyi nu̱ke zopan ɓu̱ vi nu̱ mbu̱ ghai nang sar da ɓa, yang nu̱ shir ɗye kawa, ndu̱ nu̱ wollo ɓu̱ vi nu̱ mban zum ɓa. Kope nduki nu̱ke dlu̱m wor a nje bu̱laran mbu̱ Lagarkati Nyifiri ɓu̱ Ye gamndang.