Ɗyin mbu̱ tukari 20 - Mewar Alqawarang

Sonyi Du̱pu

¹ Kom tang na nu̱ ru̱kti ɓu̱ Magham a zhurti yaghai mbu̱ viɗi, ɗye qu̱ndi me ge gargha mboɓongndi nu̱ke tu̱ɓ si ɓa ndang a nje kha nda, kom ndu̱ yakhli gwaanji nggur ku̱san me kharan.

² Tu̱ ku̱s geema su̱tang, chin su̱ti nu̱ zhu nang, chin ke nu̱ mu̱narang, ndu̱ Sheɗan tu̱k, tu̱ gu̱n nda gha me sonyi du̱pu.

³ Tu̱ mbukti nda nu̱ mbu̱ ge gargha mboɓongndi nu̱ke tu̱ɓ si ɓaandang. Tu̱ za menang nu̱gha, tu̱ khi nu̱ gha tu̱ dlu̱rɗa nu̱ gha, ma ku̱ lamba dlar maa ku tu̱k ɓa, kope gaanje sonyi du̱pu (1,000) nang wa peeta. Qu̱rse nang ka ngga nda gha me sarchi koɗomma.

⁴ Kom tang na zhakhɗye ku, ndu̱ nduki nu̱ vu̱rki zalale kumar ye wora kharan ɗyinang. Yang tang na nyifiku ɓu̱ nduki nu̱ ɗakhki ɗyin wor nu̱gha ku̱me wa saida Yesu, ndu̱ ɓalar ɓu̱ Magham. Wor ke nduki nu̱ke nu̱ ghar ghai ye dlu gaari nang ɓa, yang nu̱ shi ye shipar ɓaranang zum ɓa. Nu̱ dlu̱ bakhti ɓu̱ dlu gaari nang nu̱ ve me guma wor ɓa yang ve khar wor ɓa. Wor a gaɓki tu̱ kha ndu̱ nyifiri tu̱k, tu̱ shi kwaaɗar ku su̱yen ndu̱ Masiya me sonyi du̱pu.

⁵ (Ɓeeni nduki nu̱ mu̱tki nu̱ kha ndu̱ nyifiri ku tu̱k dong ɓa, kope qu̱rse nu̱ sonyi du̱pu nang nyeelki.) Nang ke jiiri mbe mu̱ti nu̱ gumapaali.

⁶ Nduki nu̱ gwaki jiiri mbe mu̱ti nu̱ gumapaali nang, ɗya nu̱ barka ku yang shakhshakh ku tu̱k. Zalale kha mu̱ti nu̱ rap ɗyine wor ɓa, ka kha ma kuruku ɓu̱ Magham ndu̱ ɓu̱ Masiya, ka shi kwaaɗar ku ndu̱ chin tu̱k me sonyi du̱pu.

Rar Sheɗan

⁷ Qu̱rse sonyi du̱pu nang wa peeta, ka ngga Sheɗan gha ye maa nu̱ khiiki nda gha,

⁸ yang ka ɗa vi tu̱ lamba dlar maa ku nu̱ke a nje lakhtaran ve ngginggeetli vatndi ɓu̱ larji kap, wor ke, Gog ndu̱ Magog. Sheɗan ka taba wor ma dakhlari, khang ɓaanda ka kha wa wuɗyiri nu̱ me ɗyim chitndi.

⁹ Tu̱ lakhta ku nu̱ mbu̱ larji, tu̱ kara maa khar ɓu̱ nduki ɓu̱ Magham, nang ke, ghai nu̱ke Magham a ndolaranang. Tu̱ yang ɓai a vi viɗi tu̱ va wor nu̱gha.

¹⁰ Yang chin Nu̱ Mu̱nar nu̱ lambaki worang, tu̱ mbukti nda nu̱ mbu̱ giɗim ɓai gu̱rgu̱rndi nu̱ ɓai solfa, ye maa nu̱ mbukki dlu gaari nang nu̱ mban su̱yen ndu̱ annabi kotame nang. Ka za bonyeku fara virkir ndu̱ fu̱ɗari, aakochi koɗokhsi ɓa.

Lauɗarsi Kumari

¹¹ Kom tang na zhakhɗye nggur gwaanji ɓong, ndu̱ njif nggur kharan ɗyinan. Tu̱ maa vu̱ghai ndu̱ maa viɗi ɗa ɓar gume nda, ku̱me maa nje ku̱me wor ɓa.

¹² Tang na nduki nu̱ mu̱tki ku, woi ndu̱ gorki, chingndan ku gume zhakhɗyang yang tu̱ qu̱n lagarkatiku nu̱gha. Kom tu̱ qu̱n lagarkati nggur tu̱k nu̱gha, chin ke, Lagarkati nu̱ Nyifiri. Tu̱ kuma nduki nu̱ mu̱tki ɗyine ɗyi nu̱ shiki ku, ba wa nu̱ke a nje bu̱laran mbu̱ lagarkatikwang.

¹³ Tu̱ ɗyim chitndi a pula nduki nu̱ mu̱tki nu̱ke a mbe nda. Mu̱ɗi ndu̱ ye maa khar ɓu̱ mu̱tiku tu̱k, tu̱ ɗa vi ndu̱ mu̱tiku ɓaanda. Tu̱ kuma aa nyi nduk da viɗ ɗyine ɗyi nu̱ tlu̱naki.

¹⁴ Kom tu̱ mbuk Mu̱ɗi ndu̱ ye maa khar ɓu̱ mu̱tiku nu̱ mbu̱ giɗim ɓai. Giɗim ɓai nang ke, mu̱ti nu̱ rap.

¹⁵ Kap njif nu̱ke dlu̱man a nje mbu̱ Lagarkati Nyifiri ɓa, wa mbukti nda nu̱ mbu̱ giɗim ɓai.