Ɗyin mbu̱ tukari 2 - Mewar Alqawarang

Bu̱lar ma Yir she Tabar ɓu̱ nu̱ Mbu Yesu ku nu̱ke a Afisa

¹ “Bu̱lo ye nu̱ ru̱kti ɓu̱ tabar nu̱ mbu Yesu ku nu̱ke a Afisa. No za, Wonji ɓalarku nu̱ ɗa viki she njif nu̱ khubki anjinjeku mutndi nu̱ mbu̱ kharan nu̱ zu̱mang, tu̱ ki yir chele ɓu̱ tokhol ɓai wor mutndang.

² Nga zu̱n ɗye shir ɓaaro, ndu̱ khang tlu̱nar ɓaaro ndu̱ kaɗanyi mbe maito nu̱ke ta shiran mbu̱ bonyeku. Nga zu̱n no ka dlu̱ yen ndu̱ nu̱ mu̱narku ɓa. Ta buu nduki nu̱ ka qaki var wor za wor pudeku nggwa, yang wanang ku ɓa, ta gwa ɗya nu̱ wollo ku.

³ Nga zu̱n ta kaɗanyi mbe gu̱ndi memu̱nar mbu̱ bonyeku ku̱me dlu̱ma, no nggum ɓa.

⁴ Yang wonji damtar ɓang ndu̱ to, ta njig wuti ndolar ɓaa nu̱ gumapaalyang.

⁵ Kor ɓakh ɓu̱ maa chingndi ɓaa nu̱ke ta nggu̱tki si! Nggoɗu to gaɓ ye ɗyi nu̱ke ta san gumapaalyang. Mbu̱ yang no nggoɗ ɓa, ngga ɗa ɓa tang da tokhol ɓai ɓaarang ɓar ye maa khar ɓaran.

⁶ Yang wonji ma nang kunakiro: Ta shi ɗyi mbarkandi no zhangki ɗye shirku ɓu̱ Nikolatiyekwang gha ba wa nu̱ke nga zhangki.

⁷ Nu̱ dlu̱mdi tu̱kti maa, ku̱ tu̱k ɗyi nu̱ke Jiimbyang a zu̱ran ye tabarku ɓu̱ nu̱ mbu Yesu ku! Kap njif nu̱ raki wute nang, ngga vu̱r zalale nji ye qu̱far Nyifiri yenda nu̱ke a nje viɗ zhena ɓu̱ Magham mbu̱ viɗi.

Zoɓar ye Tabar ɓu̱ nu̱ Mbu Yesu nu̱ke a Su̱mirna

⁸ “Bu̱lo ye nu̱ ru̱kti ɓu̱ tabar ɓu̱ nu̱ mbu Yesu ku nu̱ke a Su̱mirna no za, Wonji ɓalarku nu̱ ɗa viki she njif nu̱ke chin ke nu̱ gumapaali ndu̱ chin kya gana, chin mu̱tki tu̱ gaɓ tu̱ kha ndu̱ nyifiri.

⁹ Nga zu̱n bonyeku nu̱ke ta mban ndu̱ nungndi ɓaaro, yang to gu̱naran (mbu̱ Jiimba). Nga zu̱n pooni su̱bu̱rti dlu̱m nu̱ke nduki nu̱ka qaki vaanda za wor Yakhudeku yang wanang ɓa, ɗya kib ghaari ghai ɓu̱ Sheɗan ku.

¹⁰ Tu̱k na sawar bonye nu̱ke to ka ɓa zaki ɓa. Jiwa, nga zu̱ran yoro Nu̱ Mu̱nar nang ka mbuk ɓeeni nduki chele ɓaanu nu̱ mbu̱ zhaaru̱m ma buuro nu, yang to ka za bonye nang me qaandi gwang. Yang ku̱ fet na memu̱na ɓar mbe maito ɓaa ɓa aa to ka khu̱l ye mu̱ti, ku̱me ngga vu̱r ɗye zhar nu̱ nyifiri yoro.

¹¹ Nu̱ dlu̱mdi tu̱kti maa, ku̱ tu̱k ɗyi nu̱ke Jiimbyang a zu̱ran ye tabarku ɓu̱ nu̱ mbu Yesu! Njif nu̱ raki wute, mu̱ti nu̱ rap ɓu̱ vu̱r bonye ye nda sar da ɓa.

Zoɓar ye Tabar ɓu̱ nu̱ Mbu Yesu nu̱ke a Pagamum

¹² “Bu̱lo ye nu̱ ru̱kti ɓu̱ tabar ɓu̱ nu̱ mbu Yesu ku nu̱ke a Pagamum no za, Wonji ɓalarku nu̱ ɗa viki she njif nu̱ khubki kaskar nu̱ men rapndi nyamnyamndang.

¹³ Nga zu̱n to kharan ye maa nu̱ke Sheɗan a kwaaɗar ɓaran. Yang kap ndu̱ nang ta ching gha ɗyin dlu̱ma nu̱ zhire, sar da no gaɓ nu̱ gana mbe maitar nga ɓa. Aa mbu̱ qaandi virkir ɓu̱ Antipas, nu̱ saidaki nga nu̱ zhire. Chin nu̱ tlaghaki nda ku mbu̱ ghai ɓaanu maa khar ɓu̱ Sheɗan.

¹⁴ Yang kap ndu̱ nang ɗyiku a nje koɗom nu̱ke ngga zu̱ki nu̱ ɗyinoro: Nduki a nje chele ɓaanu nu̱ke a mbu shogar ɓu̱ Balaam. Chin nu̱ shogaki ye Balak ku̱ zala qusa Israila ku̱ shi solarku nu̱ ku̱nshe zu̱mndi ɗye zu̱mndi nu̱ shiki sadke ni ye mu̱lu̱mku, kom nu̱ shir zawar ku tu̱k.

¹⁵ Nduki a nje tu̱k nu̱ke a mbu shogar ɓu̱ Nikolatiyeku chele ɓaanu.

¹⁶ Nggoɗ ma leendang! Mbu̱ wanang ɓa, ngga ɗa ɓa ɗau tang dakhla wor ndu̱ kaskar nu̱ka viki mbu̱ myang.

¹⁷ Nu̱ dlu̱mdi tu̱kti maa, ku̱ tu̱k ɗyi nu̱ke Jiimbyang a zu̱ran ye tabarku ɓu̱ nu̱ mbu Yesu. Aaki raki wute nang, ngga vu̱r ɓeena manne tukakandi yenda. Ngga vu̱r ndogdi ɓongndi yenda tu̱k nu̱ bu̱laki mewar dlu̱m nu̱ ɗyinan yang nduk a nje nu̱ zu̱nki dlu̱m nang ɓa, kope njif nu̱ dlu̱ki ndogdang ɗyenda.”

Zoɓar ye Tabar ɓu̱ nu̱ Mbu Yesu nu̱ke a Tiyatira

¹⁸ “Bu̱lo ye nu̱ ru̱kti ɓu̱ tabar ɓu̱ nu̱ mbu Yesu ku nu̱ke a Tiyatira no za, Wonji ɓalarku nu̱ ɗa viki she Yi ɓu̱ Magham, chin nu̱ke yitan shipaki dlu̱r ɓai, saaran wa ghuri nu̱ khiiki nu̱gha.

¹⁹ Nga zu̱n ɗye shirku ɓaaro, ndu̱ ndolar nu̱ maito ɓaaro. Nga zu̱n tlu̱nar nu̱ke ta shiran ndu̱ sar memu̱nar mbe kanaɗyi ɓaaro. Nga zu̱n tlu̱nar nu̱ke ta shiran leendang wa duk nu̱ gumapaalyang.

²⁰ Yang kap ndu̱ nang wonji ɗyi nu̱ke a nje khara ɗyinoro: ta khar kaɗanyi ndu̱ Jezebel nokhzi nu̱ka qaki varan za chin a mbu̱ annabi. Nu̱ ku̱nshe shogar ɓaran a zala pudeku ɓanga tu̱ ku̱s zawarku ndu̱ zu̱mndi ɗye zu̱mndi nu̱ shiki sadke su̱ ye mu̱lu̱mku.

²¹ Nga vu̱r sarchi yenda ma ku̱ nggoɗi ku̱ njig me mu̱nggu̱l nu̱ke a shiran yang a shimndan ɓa.

²² Yang wonji ngga sa tu̱ qan khaati gu̱rgu̱rndi, tang sa nduki nu̱ shiki zawar ndu̱ chin tu̱ za bonye maɗyikandi. Ngga shi nang leendang mbu̱ nu̱ nggoɗ ku mbe tlu̱nar malkandiku nu̱ke a shiran su̱yen ndu̱ chin ɓa.

²³ Ngga tlagha nduki nu̱ke a mbu shogar ɓaran nu̱gha, nu̱ mbu Yesu ku kap ka zu̱n nu̱ ɗyine nga ke nu̱ laɓ mbu̱ kwaari ndu̱ memu̱na aaki. Yang ngga ɓi aaki ku̱rku̱r ndu̱ tlu̱nar ɓaran.

²⁴ Yang ɓeeni nduki chele ɓaanu nu̱ke a Tiyatira nu̱ke nu̱ mbu shogar malkandi ɓaran nang ɓa. Yang nu̱ shoga ɗyiku nu̱ke a qaran za ashiriku kirkandi ɓu̱ Sheɗan ɓa (Nga zu̱ran ye nu, ngam ɓu̱ du̱ng taɗar ngguri nu̱ ɗyinonu ɓa.)

²⁵ Yang khuɓ ma ɗyi nu̱ke a kha nu mbari kope nga gaɓi.

²⁶ Aaki raki wute, tu̱ zu̱m guma ndu̱ shir ɗyi nu̱ke nga ndolaran ma yir ye lauɗar san, ngga vu̱r zalale yenda ɗyine dlar ghaiku.

²⁷ ‘Ka shi kwaaɗar ɗyine wor ndu̱ zaaɓir vi, ka wul wor nu̱gha wa kayang nu̱ du̱nki ndu̱ daɓti.’ Ba wa nang dlu̱ki zalale she Aba ɓanga.

²⁸ Ngga vu̱r pazar ɗatli maari yenda tu̱k.

²⁹ Kap nu̱ dlu̱mdi tu̱kti maa, ku̱ tu̱k ɗyi nu̱ke Jiimbyang a zu̱ran ye tabarku ɓu̱ nu̱ mbu Yesu!