Ɗyin mbu̱ tukari 19 - Mewar Alqawarang

Wa Kham Magham mbu̱ Viɗi

¹ Qu̱rse nang tang tu̱k ɗyi nggur nu̱ shipaki su̱qur du̱mbu̱rkandi nu̱ ɗa viki she tabar nduki khang mbu̱ viɗi, a zhaano ku a zu̱ran za, “Kham mi Magham! Ɗanari, ndu̱ zhaaji, ndu̱ zalale, wa kha Maghamndi ɓaarem.

² Jiwa kumar ɓaran ɗya zhire, ndu̱ shir zhire. Wa dla kumar nu̱ ɗyine man mu̱nggu̱l gwaanji nu̱ su̱bu̱rki larji nu̱ gha ndu̱ ɗye shir malkandi nu̱ zawar ɓaran. Magham wa dli gaɗe tom ɓu̱ maaviku ɓaran nu̱ ɗyine nda.”

³ Tu̱ gaɓ tu̱ ghwat zhanare ku, a zu̱ran ku za, “Kham ma Magham! Qu̱ndi ɓu̱ ɓai nu̱ vaki ghayang nu̱gha a yir viɗi yang me tu̱ɓ su̱ ɓa.”

⁴ Tu̱ ndukkudaandiku ɗyirap qu̱m vatndi nang nggu̱ɗ nu̱ yaghai ku su̱yen ndu̱ du̱ngdiku nu̱ nyifiri wor vatndang, tu̱ ghar ghai ye Magham ku, chin nu̱ke a nje kharan ɗyine zhakhɗyang. Tu̱ wopa ku za, “Amin! Kham mi Magham!”

⁵ Tu̱ su̱qur ɓalar nggur a vi she zhakhɗyang a zu̱ran za, “Kham ma Maghamndi ɓaarem, tun maaviku ɓaran, tun nu̱ kya tu̱k sawar ɓaran, woi ndu̱ gorki.”

Tu̱khu̱l Ɓu̱rti ɓu̱ Ye Gamndang

⁶ Kom tang tu̱k su̱qur nu̱ shipaki ɓu̱ tabar nduki khang, wa su̱qur ɗyim khangndi nu̱ke a ɗari, wa pedlangndi nu̱ shiki quri maɗyi. Tang tu̱k a woparan ku za, “Kham ma Magham! Jiwa Zhinkir gwaanji Maghamndi ɓaarem nu̱ zalale aa nu̱m kap kya kwaaɗari!

⁷ Ku̱ memu̱na rem kha ɓong, chem kasha, chem vu̱r zhaaji yenda! Jiwa sarchi ɓu̱rti ɓu̱ Ye gamndang wa shi. Nokhzi nu̱ke a ma ɓu̱rtanang wa daasa varan.

⁸ Wa vu̱r lukti linen yarangndi mbarkandi yenda, ma ku̱ sa.” (Lukti nu̱ linen nang a khar tlu̱nar jeembi ɓu̱ nduki ɓu̱ Magham.)

⁹ Tu̱ nu̱ ru̱ktang zu̱ ya za, “Bu̱lo nang, ‘Nduki nu̱ qaki wor ma tabar zu̱mndi ɗye ɓu̱rti ɓu̱ Ye gamndang ɗya nu̱ barka!’ ” Tu̱ zu̱ tu̱k za, “Nang ke ɓalar ɓu̱ Magham zhirekandi.”

¹⁰ Tang nggu̱ɗ nu̱ gume nda ma ghar ghai yenda, tu̱ yang zu̱ ya za, “Shi na ɓa! Nga mu̱dlo maava, su̱yen ndu̱ nyeezorku, nu̱ke a saida zhire nu̱ Yesu wutki. To ka gharkya ghai ye Magham!” Ku̱me zhire nu̱ Yesu wutki vu̱rki zalale zu̱r ɓalar nu̱ ɗa viki she Magham.

Njif nggur ɗyine Pu̱rsi Ɓongndi

¹¹ Tang na maa viɗi qu̱ndan, tang na pu̱rsi ɓongndi. Ka qa nu̱ lu̱bar nda za Nu̱ Shir zhire ndu̱ zhire. Nu̱ zhire ka shiki kumar ndu̱ dakhlar ɓaran.

¹² Yitankwang wa ghiindi ɓai, ɗye zharku khang a nje mu̱na ɗyinan. Yang dlu̱m a nje bu̱laran, yang nduk a nje nu̱ zu̱nki dlu̱m nang ɓa kope chin ɗyenda.

¹³ Yang lukti nu̱ sakyang yoɓtan mbu̱ tom. Yang dlu̱man za “Ɓalar ɓu̱ Magham.”

¹⁴ Tu̱ tabar ɓu̱ nu̱ dakhlarku nu̱ mbu̱ viɗi mburi nda, wa sa luktiku nu̱ kapar linen ɓongndi khatkhatndi a ɗyin pu̱rsi ɓongndiku.

¹⁵ Tu̱ kaskar nu̱ke menang nyamnyam maɗyi a vi mbu̱ men. Ka zu̱m loobo ɗyine dlar maa ku ndu̱ kaskar nang. Ka shi kwaaɗar ɗyine wor tu̱k ndu̱ zaaɓir vi nu̱ kwaaɗa, tu̱ khatl ye anap ku nu̱gha tu̱k ye maa ɗyooti ye anap nu̱ shokhnar maɗyikandi ɓu̱ Magham Nu̱ zalale aa nu̱m kap.

¹⁶ Ve lukti ɓaran, ndu̱ ɗyin bolan wa bu̱la dlu̱m nang nu̱ si za: “KUJI ƁU̱ KUJIKU, NDU̱ ZHINKIR ƁU̱ ZHINKIRKU.”

¹⁷ Tang na nu̱ ru̱kti ɓu̱ Magham chingndan mbu̱ fu̱ɗari. Tu̱ qa kap ɗyiktiku nu̱ke a jiiri viɗi mbu̱ khu̱kheeti nu̱ su̱qur gwaanji za, “A ɓa ma, tun taba nu̱ ye maa da ma tu̱khu̱l zu̱mndi gwaanji ɓu̱ Maghamang.

¹⁸ A ɓa ma tun nji dlu kujiku, ndu̱ gorkir sojeku, ndu̱ nduki wangndi, ndu̱ pu̱rsiku, ndu̱ nu̱ dlar pu̱rsiku, ndu̱ dlu ɓu̱ ndukiku kap, maava ndu̱ nduki nu̱ke ɗya maava ɓa, woi ndu̱ gorki!”

¹⁹ Tang na dlu gaari nang ndu̱ kujiku nu̱ larji ndu̱ sojeku ɓaanda wa taba ku, ma ku̱ dakhla nda chin nu̱ke a nje kharan ɗyine pu̱rsang, ndu̱ sojeku ɓaran.

²⁰ Tu̱ yang ku̱s dlu gaarang su̱yen ndu̱ annabi kotame nu̱ shiki ɗye lazhamku me ɓaranang, tu̱ lamba nduki nu̱ke bakhti ɓu̱ dlu gaarang a nje ve worang. Ndu̱ nduki nu̱ gharki ghai ye shipar ɓaranang nu̱ ku̱nshe ɗye lazhamku nu̱ shikyang. Tu̱ ku̱s dlu gaari nang su̱yen ndu̱ annabi nu̱ wollo nang tu̱ mbuk mbu̱r ɓaanda nu̱ nyifi mbu̱ giɗim ɓai nu̱ solfa.

²¹ Tu̱ tlagha ɓeeni nu̱ dakhlarku ɓaanda nu̱ gha ndu̱ kaskar nu̱ ka viki mbu̱ me njif nu̱ke a nje kharan ɗyine pu̱rsi nang. Tu̱ ɗyiktiku nji dlu ɓaanda tu̱ mu̱n mbu̱ wor si.