Ɗyin mbu̱ tukari 18 - Mewar Alqawarang

Nggu̱di ɓu̱ ghai Babilon

¹ Qu̱rse nang, tang na nu̱ ru̱kti nggur a zhurti viɗi. Yang zalale a nje kha nda maɗyi, wonji zhaaji ɓaran wa shi yarang mbu̱ larji kap.

² Tu̱ shi qar ndu̱ su̱qur gwaanji tu̱ zu̱ za, “Wa nggu̱ɗi! Babilon gwaanji wa nggu̱ɗi! Wa kha ma ye maa khar ɓu̱ tu̱du̱kku ndu̱ khu̱kheetiku malkandi, ndu̱ maa tukar ɓu̱ aa nyi ɗyikti malkandi, nu̱ke ɗya ɗye zhaana.

³ Jiwa dlar maa ɓu̱ nduki kap wa za ɗyim anap nu̱ zawar malkandi ɓaran maɗyi. Kujiku nu̱ larji wa shi zawar ndu̱ chin. Tu̱ nu̱ gomarku nu̱ larji shi gu̱nar ve nda nu̱ ku̱nshe wuti me yele ɓaran nu̱ peetaki gha.”

⁴ Tang tu̱k su̱qur nggur nu̱ ɗa viki viɗi a zu̱ran za, “A vi ma ɓar mbe nda, nduki ɓanga, ma ku̱ vi nun mbu̱ solarku ɓaran ɓa, ma ku̱ alobeku ɓaran gwa nu ɓa.

⁵ Jiwa solarku ɓaran wa taba nu̱ ɗyine yen tu̱ khu̱l maa viɗi, yang Magham wa kor ndu̱ zop ku ɓaran.

⁶ Shi ma yenda ba wa nu̱ shiki ye nu, ɗyi nu̱ shiki ye nu kap, tun shi yenda rap mbu̱ yen. Ɗye zar nu̱ ghiiki nu̱ gha tu̱ vu̱r ye nwang, ghi ma pooni nu̱ dukki ɓaranang du̱mbu̱r yenda sar rap.

⁷ Vu̱r ma bonye yenda maɗyi ndu̱ chiti mbi, ku̱rku̱r ndu̱ zhaaji nu̱ tu̱kti mu̱ndi nu̱ vu̱rki ye varan, mbu̱ memu̱naran. A kham ɗyinan za, ‘Nga kuji nusukandi ɗyine zhakhɗye kwaaɗar ɓanga. Nga ku̱ɗuwan ɓa, yang sar da chiti mbu ɓu̱ gwa nga ɓa.’

⁸ Ku̱me nang mbu̱ qaandi da ka ghwaati nda ndu̱ alobeku: mu̱ti, ndu̱ khar yaaɓa, kom ndu̱ meeri. Ka va nda nu̱ gha tu̱k ndu̱ ɓai, jiwa chin Zhinkir gwaanji Magham nu̱ke a ma kuma ndang, ɗya nu̱ zalale aa nu̱m.

⁹ “Sarchi nu̱ kujiku nu̱ larji nu̱ shiki zawar ndu̱ chin, tu̱ zu̱m ɗye yele ɓaranang ku su̱yen ndu̱ chin, nu̱ naki qu̱ndi ɓu̱ ɓai nu̱ke a va nda nu̱ gha ka shi ghoori ndu̱ khar yaaɓar ku ku̱me chin.

¹⁰ Ka ching ku gha ɓakh ndu̱ chin ku̱me a sawa ku̱ za nda bonye nang ndu̱ chin ɓa. Ka ki zu̱ran ku za, ‘To ɗye zhiyaye! To ɗye zhiyaye, ai ghai gwaanji nang, to Babilon! Ai Babilon ghai gwaanji nu̱ zalala! Wa kuma ba mbu̱ awe kaada!’

¹¹ “Nu̱ gomarku nu̱ larji ka shi ghoori tu̱ yaaɓa nda ku̱me nduk a nje nu̱ke a masa ɗye gomarku ɓaanda tu̱k ɓa.

¹² Wa ginarwe ɓaanda, ndu̱ ghuri, ndu̱ ndogdiku nu̱ zhaaji, ndu̱ ndogdi ɗye mbu̱ quri, ndu̱ kapar linen mbarkandi ku. Ndu̱ kapar nu̱ke ɗyiman vyang ndu̱ Siliki ndu̱ kapar vyangndi wa karbilau, ndu̱ qu̱farku nu̱ zhiiri mu̱nkandi zum zum. Kom ndu̱ ɗyiku zum zum nu̱ shiki ndu̱ dliindi zhuwandi. Kom ndu̱ ɗyiku nu̱ shiki ndu̱ khu̱ɓti qu̱far nu̱ me mu̱zhindi kap. Kom ndu̱ ɗyi nu̱ shiki ku ndu̱ vi ɓongndi, ndu̱ vi chitndi, ndu̱ ɗyiku nu̱ shiki ndu̱ ndogdi nu̱ke a wuti.

¹³ Ɗye masar ɓaanda nu̱ gwa masa ɓa, wa ɗyiku nu̱ shiki ndu̱ sinamon, ndu̱ ɗye ɗu̱khti kimbili ku, ndu̱ ɗye zhi mu̱nkandi nu̱ka vaki ndu̱ ɓai. Ndu̱ mur, ndu̱ lubban, ndu̱ ɗyim anap, ndu̱ mor Zaitun, ndu̱ buɗuk ɓu̱tokhndi, ndu̱ ye alkame. Nu̱ dleeku, ndu̱ ndu̱ɓangku, pu̱rsiku ndu̱ ɗye dar shipitiku ɓaanda, ndu̱ maaviku tu̱k, chin ke nyifi ɓu̱ nduki.

¹⁴ “Tu̱ nu̱ gomarkwang ze nokhzang za, ‘Kap ɗyiku mbarkandi no saki nyifi ɓaa nu̱ ɗyinan wa su̱ya, gu̱nar ɓaa ru̱m ndu̱ ɗye viri kare ɓaaro wa su̱ya ku rong maa kaani. Ta ma gwa wor sar da tu̱k ɓa!’

¹⁵ Nu̱ gomarku nu̱ shiki gu̱nar nu̱ ku̱nshe gomar ndu̱ nokhzang, ka ching gha ku ɓakh, ku̱me a sawa ku̱ sa wor nu̱ mbu̱ bonye nu̱ke a ma zaran ɓa. Ka ki ghoori ku, aa yaaɓa nda,

¹⁶ A zu̱ran ku za, ‘Ɗye zhiyaye! Ai ghai gwaanji nang ɗya ɗye zhiyaye! Njif nu̱ka gu̱nki kapar gu̱ndi nu̱ linen mbarkandi, ndu̱ lukti nu̱ke ɗyiman wa karbilau vyangndi ndu̱ ɗyim vyangndi tu̱k, ka ki wuti ndu̱ ginarwe, ndu̱ ndogdiku nu̱ zhaaji ndu̱ ndogdi ɗye mbu̱ qur ku nang!

¹⁷ Yang gu̱narku ɓaran nang wa su̱ya ba mbu̱ awe da!’ “Aa nyi gorkir nu̱ chiri du̱mbu̱l ɗyim ndu̱ kap nduki nu̱ka viki, ndu̱ nu̱ tlu̱nar ku mbu̱ du̱mbu̱lang. Kom ndu̱ ɓeeni nduki nu̱ka gwaki ɗye khar viti ɓaanda nu̱ ku̱nshe gomar ndu̱ ɗyin me ɗyim chitndi, ka ching gha ku ɓakh.

¹⁸ Ka ki zhaano ku, sarchi nu̱ naki qu̱ndi ɓai nu̱ke a va ghayang nu̱gha, a zu̱ran ku za, ‘Sar da ghai nggur a nje nu̱ khaki wa ghai gwaanji nang mu?’

¹⁹ Ka wos ghai nu̱ mu̱na ɗyin wor a ghoori ku, ndu̱ yaaɓari, a yaasa me wora, a zu̱ran ku za, ‘Ɗye zhiyaye! Ai ghai gwaanji nang ɗya ɗye zhiyaye! Ghai nu̱ke nu̱ du̱mbu̱l ɗyimku gwaanji gwaanji kap khaki ma nu̱ yele ku ku̱me gu̱nar ɓaran! Yang tu̱ aa nu̱m kap su̱ya ba mbu̱ awe kaada!

²⁰ Shi kashari ɗyine nda, to mbu̱ viɗi! Shi ma kashari ɗyine nda, tun nduki ɓu̱ Magham ndu̱ pudeku ndu̱ annabiku! Jiwa Magham wa kuma nda ku̱me ɗyi nu̱ shiki ye nu.’ ”

²¹ Kom tu̱ nu̱ ru̱kti ɓu̱ Magham du̱mbu̱rkandi da vu̱nar khiiri gwaanji, tu̱ mbuk nu̱ mbu̱ ɗyim chitndi. Tu̱ zu̱ za, “Ka mbuk Babilon ghai gwaanji nang gha ndu̱ du̱mbu̱r ba wanang, nduk ɓu̱ na nda sar da tu̱k ɓa.

²² Sar da nduk ɓu̱ tu̱k ghwaati sumbul mbe nda, ndu̱ nu̱ qar taaza, ndu̱ nu̱ pi pooni ɗyiku nu̱ shipaki pelnggum, ndu̱ nu̱ pi domndiku ɓa. Sar da nduk ɓu̱ na nu̱ tlu̱nar khar mbe nda tu̱k ɓa. Sar da nduk ɓu̱ tu̱k su̱qur vu̱nar a khi ye gur mbe nda tu̱k ɓa.

²³ Sar da nduk ɓu̱ na yarang ɓu̱ pitila mbe nda tu̱k ɓa. Sar da ɓu̱ tu̱k su̱qur nu̱ zhin ɓu̱rti mewakandi ndu̱ nokhzan mbe nda ɓa. Jiwa zhu nu̱ gomar ɓaa ku ke nduki rututundi mbu̱ larji kap, nduki kap wa ngga njiva gha ku̱me ɓu̱tli ghai ɓaaro.

²⁴ Wa gwa tom ɓu̱ annabiku mbe nda ndu̱ ɓu̱ nduki ɓu̱ Magham, i, tom ɓu̱ nduki nu̱ tlaghaki mbu̱ larji kap.”