Ɗyin mbu̱ tukari 17 - Mewar Alqawarang

Man mu̱nggu̱l Gwaanji ndu̱ Dlu gaarang

¹ Tu̱ da chele nu̱ ru̱ktiku ɓu̱ Magham mutndang nu̱ du̱ɓaku mutndi nang a ɓa sha tu̱ zu̱ za, “A ɓo, ngga wut kumar nu̱ke a ma shiran ye man mu̱nggu̱l gwaanji nang yoro, chin ke kharan ɗyin ɗyim ku khangndi.

² Kujiku nu̱ larji wa shi zawar ndu̱ chin, tu̱ nduki nu̱ larji yang kuya ndu̱ ɗyim anap nu̱ zawar nu̱ shiki ku ndu̱ chin.”

³ Tu̱ Jiimbi a zhur nu̱ ɗyina, tu̱ nu̱ ru̱ktang da nga tu̱ ɗu̱ ndu̱ nga mbu̱ gaari. Tang na nusu far kharan ɗyine dlu gaari nggur nu̱ke ghosi varanang vyang. Yang dlu̱mku nu̱ wuti ndu̱mndi ye Magham a nje bu̱laran ve varan. Ɗyinankwang mut ndu̱ domndiku gwang.

⁴ Nokhzi nang wa sa lukti nu̱ke ɗyiman wa shipa karbilau, kom ndu̱ ɗyiman vyangndi tu̱k, wa shi viri kare a wuti ndu̱ ɗyiku nu̱ shiki ndu̱ ginarwe, ndu̱ ndogdiku nu̱ zhaaji, ndu̱ ndogdi ɗye mbu̱ qur ku. Wa khuɓ ɗyekhti nu̱ shiki ginarwe nyeedlan ndu̱ ɗye zhaane ku ndu̱ ru̱knar zawar ɓaran.

⁵ Nang ke dlu̱m kwaaɗar nu̱ bu̱laki nu̱ me gumaran, ƊYI TUKAKANDI “BABILON GWAANJI MANKIR ƁU̱ MAN MU̱NGGU̱LKU KAP NDU̱ ƊYE ZHAANE KU NU̱ LARJI KAP.”

⁶ Tang na nu̱ke nokhzi nang wa kuya ndu̱ tom ɓu̱ nduki ɓu̱ Magham ndu̱ tom ɓu̱ nduki nu̱ tlaghaki wor ku̱me saidar Yesu nu̱ shiki ku. Nang naki nda, tu̱ shi lazham ya maɗyi.

⁷ Tu̱ yang nu̱ ru̱kti ɓu̱ Maghamang zhamndi nga za, “Ta lazham ɗyen ku̱me nu̱ma? Ngga zu̱ mbu̱ ɗyi tukakandi nu̱ke a nje ɗyine nokhzi nang yoro, kom ndu̱ ɗyi nu̱ke a nje ɗyine dlu gaari nu̱ nokhzang lu̱baki nda nang, chin dlu gaari nu̱ke ɗyinan mut ndu̱ domndi gwang ndang.

⁸ Chin dlu gaari no naki nang, wa kha zhu, yang leendang a nje ɓa, ka ɗa dlan dam mbu̱ ge gargha mboɓongndi nu̱ke me tu̱ɓ si ɓandi nang ma yir ye maa nu̱ke a ma tlagha nda nu̱ gha. Nduki nu̱ke kharan mbu̱ larji, wor nu̱ke nu̱ bu̱la dlu̱m wor nu̱ mbu̱ Lagarkati Nu̱ Nyifiri ɓa, ka shi lazham nar dlu gaarang, ku̱me wa kha zhu, yang leendang a nje ɓa, yang ka ɗa gaɓ gana fan tu̱k.

⁹ “Ɗyi nang a shimkya kaɗari ndu̱ dar mbu̱ tunu. Ɗyinku mutndi nang ɗya dlengku mut, nu̱ke nokhzang kharan ɗyinan.

¹⁰ Yang ɗyinku mutndi nang wor ke kujiku mutndi nu̱ke qurmun chele ɓaanda wa mu̱ɗi, da a nje, dandang nu̱ ɗa ɓa dong ɓa. Yang kap sarchi nu̱ ɗa ɓa ki wa ku̱s ku̱ kha gha me sarchi koɗomma.

¹¹ Chin dlu gaari nu̱ke a nje zhu, yang a nje leendang ɓa ndang, ke nu̱ miyasi, yang a vi chele mutndikwang, a yir ye maa nu̱ke ka mu̱tki.

¹² “Domndiku gwangndi no nakyang, ɗya kujiku gwangndi nu̱ke dong nu̱ dlu̱ kwaaɗar ku ɓa, yang ka ɓa gwa zalale ku tu̱ shi kwaaɗarkwang me awe da ndu̱ dlu gaarang.

¹³ Yang wor gwangndi nang a ku̱rkya ɗyi da ku, ka vu̱r zalale ɓaanda ndu̱ kwaaɗar ɓaanda ye dlu gaari nang.

¹⁴ Ka shi dakhlar ndu̱ Ye gamndang ku. Yang Ye gamndang ka zu̱m loobo ɗyine wora. Ku̱me chin ke zhinkir gwaanji ɓu̱ zhinkirku ndu̱ kuji ɓu̱ kujiku, yang su̱yen nu̱ chin ka kha ɗya nduki nu̱ qaki, nduki datkandi ndu̱ nu̱ mbu nda ku nu̱ zhire.”

¹⁵ Tu̱ nu̱ ru̱kti ɓu̱ Maghamang zu̱ ya za, “Ɗyim ku no naki nang, ye maa nu̱ke man mu̱nggu̱lang kharan sang, ɗya nduki, ndu̱ vu̱ti nduki khang, ndu̱ dlar maa ku ndu̱ me ghaiku tu̱k.

¹⁶ Dlu gaarang ndu̱ domndiku gwangndi no naki nang, ka ɓa zhang yen nu̱ man mu̱nggu̱lang ka lukshandan gha ku tu̱ njig nda san nggaran, ka nji dlu ɓaran ɓar ku, tu̱ vaanda nu̱ gha ndu̱ ɓai.

¹⁷ Jiwa Magham wa sa nu̱ mbu̱ memu̱na wor ku, ku̱ me wor kha da, tu̱ vu̱r zalale ɓaanda ye dlu gaari nang ma ku̱ shi kwaaɗar kope ɓalar ɓu̱ Magham wa nyedli ma ku̱ nyel shimndi ɓaran.

¹⁸ Yang nokhzi no naki nang, chin ke ghai gwaanji nu̱ke a kwaaɗar ɗyine kujiku nu̱ larji nang.”