Ɗyin mbu̱ tukari 16 - Mewar Alqawarang

Ɗyekhtiku Mut nu̱ Shokhnar ɓu̱ Magham

¹ Tang tu̱k su̱qur ɓalar nggur du̱mbu̱rkandi a ɓalar mbu̱ rafti ɓu̱ Maghamang. A ɓalarang ye nu̱ ru̱ktiku ɓu̱ Magham mutndang. A zu̱ran ye wor za, “Ɗu̱ ma tun a mbata du̱ɓ mutndi nu̱ shokhnar ɓu̱ Magham nang nu̱ ɗyin larji.”

² Tu̱ nu̱ ru̱kti ɓu̱ Magham nu̱ gumapaalyang ɗu̱ tu̱ ɗa mbu̱t ɗyi nu̱ke a nje mbu̱ du̱ɓ ɓaranang nu̱ ɗyine larji. Tu̱ yang mbir malkandi ku nu̱ke khat maɗyi tu̱ ɗa vi ve var nduki nu̱ke lambe ɓu̱ dlu gaari nang a nje ve wora, nu̱ wor gharki ghai ye shipar ɓaranang tu̱k.

³ Tu̱ nu̱ ru̱kti ɓu̱ Magham nu̱ rapndang mbata ɗyi nu̱ke a nje mbu̱ du̱ɓ ɓaranang nu̱ mbu̱ ɗyim chitndi. Nu̱ mbataki tu̱ ɗyimang gaɓ ma tom wa tom ɓu̱ nduk nu̱ mu̱tki, tu̱ nu̱ nyifi ku nu̱ke a mbu̱ ɗyim chitndi ku kap mu̱ɗi.

⁴ Yang tu̱ nu̱ ru̱kti ɓu̱ Magham nu̱ kunungndang mbata ɗyi nu̱ke a nje mbu̱ du̱ɓ ɓaranang nu̱ mbu̱ gaawuku ndu̱ ye maa nu̱ke ɗyim ka ɓaghaki ku, tu̱ gaɓ ma tom.

⁵ Tang tu̱k nu̱ ru̱kti ɓu̱ Magham nu̱ke a zalale ndu̱ ɗyimku wa zu̱ za, “Kumar no shikyang torop to nu̱ke a nje leendang, yang to kya nje zhu, to shakhshakhndi, ku̱me ta kuma wanang.

⁶ Jiwa nduki wa mbu̱t tom ɓu̱ daatiku ɓaaro ndu̱ ɓu̱ annabiku. Yang wonji ta vu̱r tom ye wor ku̱ za ku, nang ke ɗye ɓi ɓaanda ɗo!”

⁷ Tang tu̱k su̱qur ɓalar nu̱ ɗa viki she du̱ku̱lang a zu̱ran za, “I, Zhinkir gwaanji Magham, nu̱ zalale aa nu̱m kap! Kumar ɓaa ɗye zhire, nu̱ shir zhire.”

⁸ Kom tu̱ nu̱ ru̱kti ɓu̱ Magham nu̱ vatndang mbata ɗyi nu̱ke a nje mbu̱ du̱ɓ ɓaranang nu̱ ɗyine fu̱ɗarang, tu̱ vu̱r zalale ye fu̱ɗarang ku̱ va nduki ndu̱ ɓai gu̱rgu̱rndi maɗyikandi.

⁹ Tu̱ gu̱rgu̱r fu̱ɗar maɗyikandang va nduki, tu̱ ndukyang wut ndu̱mndi ye dlu̱m Magham, chin nu̱ke zalale alobeku nang a mbu̱ kharan. Yang nu̱ nggoɗ memu̱na wor ku tu̱ vu̱r zhaaji yenda ɓa.

¹⁰ Tu̱ nu̱ ru̱kti ɓu̱ Magham nu̱ qurmun ndang mbata ɗyi nu̱ke a nje mbu̱ du̱ɓ ɓaranang nu̱ ɗyine zhakhɗye ɓu̱ dlu gaarang. Tu̱ zhum maari za ɗyin kwaaɗar ɓaranang, tu̱ nduki ku̱t dliindi wor ku̱me bonye,

¹¹ tu̱ wut ndu̱mndi ye dlu̱m Magham ku tu̱k ku̱me bonye nu̱ke a mban ku ndu̱ mbirku nu̱ke a ve var wora. Yang tu̱ zhang nggoɗ memu̱na wor ku gha ma ku̱ njig tlu̱nar malkandiku nu̱ke a shiran kwang.

¹² Tu̱ nu̱ ru̱kti ɓu̱ Magham nu̱ njongndang nggoɗ ɗyi nu̱ke a mbu̱ du̱ɓ ɓaranang nu̱ mbu̱ gaawu gwaanji nu̱ Yufuretus. Tu̱ gaawu nang ghwari, ma ku̱ ngga njiv ye kujiku na viki ɗokhatla.

¹³ Yang tang na khu̱kheetiku malkandiku wor kunung nu̱ shipaki guɓakhɓoku. Dandang a vi mbu̱ me geema su̱tang, tu̱ da a vi mbu̱ me dlu gaarang, tu̱ da tu̱k a vi mbu̱ me annabi kotame nang.

¹⁴ Khu̱kheetiku nang ɗya jiimbiku nu̱ka shiki ɗye lazhamku. Wor ke nu̱ yir she kujiku nu̱ larji kap, tu̱ taba wor ma dakhlar ye fu̱ɗar gwaanji ɓu̱ Magham nu̱ zalale aa nu̱m kap.

¹⁵ “Wonji, nga ɓar wa nu̱ muuri! Barkya ve njif nu̱ khaaki daasaran nu̱ ɗye sarku ɓaran khanda, ma ku̱ shi nji yir san nggaran chin tu̱k kawa chele ndukiku ɓa!”

¹⁶ Tu̱ khu̱kheetiku nang ɗa taba kujiku nang nu̱ ye maa da, nu̱ ye maa nu̱ ka qaki za dleng Armagedon ndu̱ me Yakhuda.

¹⁷ Tu̱ nu̱ ru̱kti ɓu̱ Magham nu̱ mutndang nggoɗ ɗyi nu̱ke a mbu̱ du̱ɓ ɓaranang nu̱ mbu̱ khu̱kheeti. Tu̱ su̱qur du̱mbu̱rkandi nggur a vi she zhakhɗye mbu̱ rafti ɓu̱ Maghamang, a zu̱ran za, “Wa woɗa shiri!”

¹⁸ Tu̱ wuti maari, ndu̱ ghu̱mndi maari, ndu̱ pedlangndi, kom ndu̱ yakhtar maa vu̱ghai malkandi poonang nu̱ke nu̱ shir nda sar da ɓa maa nu̱ shiki nduk nu̱ larji. Ɗya yakhtar maa vu̱ghai maɗyikandi.

¹⁹ Tu̱ ghai gwaanji nang shakh san kunung, yang ghaiku nu̱ mbu̱ dlar maa ku kap tu̱ gu̱ɗa ɓara. Tu̱ Magham kor ndu̱ Babilon gwaanji, tu̱ sa ku̱ za ɗyim anap mbu̱ ɗyekhti nu̱ shokhnar ɓaran ɗyiɗyingndi.

²⁰ Tu̱ aa nyi chenjes ɗa ɓara, tu̱ dlengku su̱ya.

²¹ Tu̱ gotormolku gwaanji gwaanji, nu̱ke taɗar ɓaanda wa khu̱l kilo ɗyin qurmun tu̱ ɗa nggu̱ɗ viɗi nu̱ ɗyine nduki tu̱ ndukyang pu̱z Magham ku ku̱me bonye gotormolang, nu̱ke bonyang wa shi maatlin maɗyi!