Ɗyin mbu̱ tukari 15 - Mewar Alqawarang

Nu̱ Ru̱ktiku ɓu̱ Magham Mut ndu̱ Alobe Mut

¹ Tang na saidu gwaanji nggur mbu̱ viɗi, nu̱ke ɗya ɗye lazham tu̱k. Nu̱ ru̱ktiku ɓu̱ Magham wor mut kya nje ndu̱ bonyeku wor mut, wor nang ke lauɗar su̱ alobekwang, ku̱me ka wut shokhnar ɓu̱ Magham nu̱ wora.

² Tang na ɗyi nggur nu̱ shipaki gawu gu̱las, longgaran ndu̱ ɓai. Tang na nduki nu̱ zu̱mki loobo ɗyin dlu gaarang ndu̱ shipar ɓaran, ndu̱ lambe dlu̱man tu̱k, chingndan gha ku me gawu nu̱ gu̱lasang, khubtan ku ndu̱ sumbulku nu̱ Magham vu̱rki ye wora.

³ A qa taazi ɓu̱ Musa maavi ɓu̱ Magham, ndu̱ taazi ɓu̱ Ye gamndang, a zu̱ran ku za, “Tlu̱narku ɓaa gori, a khar ɗye lazham yerem to Magham Zhinkir gwaanji nu̱ zalale aa nu̱m kap! Njiv ɓaa ku ɗya shir jeembu, ndu̱ zhire tu̱k, to Kuji ɓu̱ maaku!

⁴ Ki ke ɓu̱ tu̱k sawar ɓaa ɓa, to Zhinkir gwaanji? Ki ke ɓu̱ vu̱r zhaaji ye dlu̱mor ɓa? To ɗyenda ke shakhshakh. Nduki kap ka ɗa ɓa, tu̱ ghar ghai yoro jiwa tlu̱nar jeembi ɓaaro a ɗal dam.”

⁵ Qu̱rse nang tang na wa qu̱n kalap zakandi nu̱ saidu nang nu̱gha, chin ke, rafti ɓu̱ Magham nu̱ mbu̱ viɗi.

⁶ Tu̱ nu̱ ru̱ktiku mutndi nu̱ alobeku mutndi nang a vi mbu̱ rafti ɓu̱ Maghamang, wa sa lukti linen ku shakhshakhndi a wuti, ndu̱ ɗye gu̱ndi mbu̱ var nu̱ ginarwe ve me mu̱na wora.

⁷ Tu̱ da chele du̱ngdiku ɓu̱ Magham wor vatndi nu̱ nyifirang vu̱r du̱ɓaku nu̱ shiki ndu̱ ginarwe wor mut ye nu̱ ru̱ktiku mutndi nang. Yang du̱ɓaku nu̱ ginarwyang nyeedlan ku ndu̱ shokhnar ɓu̱ Magham chin nu̱ke a nje nu̱ nyifiri aakochi koɗokhsi ɓa.

⁸ Tu̱ rafti ɓu̱ Maghamang nyel ndu̱ qu̱ndi nu̱ke a viri mbe zhaaji ɓu̱ Magham ndu̱ zalale ɓaran. Yang nduk a nje nu̱ ɗu̱maki viri nu̱ mbu̱ rafti ɓu̱ Maghamang ɓa kope nu̱ alobeku ɓu̱ nu̱ ru̱ktiku mutndi nang woɗaki ku.