Ɗyin mbu̱ tukari 14 - Mewar Alqawarang

Ye Gamndang nu̱ Nduki Du̱pu Won ndu̱ Ɗyin Vat qu̱m Vat (144,000)

¹ Tang nggu̱ɗi gumera, tang na Ye gamndang chingndan ɗyine dleng Sikhiyona ndu̱ nduki du̱pu won ndu̱ ɗyin vat qu̱m vat (144,000), wor ke nduki nu̱ bu̱laki dlu̱m Ye gamndang ndu̱ ɓu̱ Zhin nu̱ me guma wora.

² Tang tu̱k su̱qur nggur du̱mbu̱rkandi nu̱ke a quri a vi viɗi wa ɗyim nu̱ke a ɗari, kom wa pedlangndi nu̱ qur maɗyi. Yang su̱qur nang tu̱kkyang wa shipa su̱qur sumbulku nu̱ke nu̱ ghwatan kwa ɗyinan.

³ A qa taazi mewakandi ku gume zhakhɗyang, ndu̱ gume du̱ngdiku vatndi nu̱ nyifiri ku nang, ndu̱ gume ndukkudaandikwang. Nduk a nje nu̱ke ka ɗu̱maki shoga taazi nang ɓa, kope nduki du̱pu won ndu̱ ɗyin vat qu̱m vatndi nu̱ gwaki ɗanar mbu̱ larji nang ɗyenda.

⁴ Nduki nang ke nduki nu̱ke nu̱ su̱bu̱r var wor nu̱gha nu̱ ku̱nshe qaandi ndu̱ nusuku ɓa, wa shi khar shakhshakhndi ku. Wor kya mbu Ye gamndang a ɗu̱kya fu̱n. Wor nang a masa wor mbe yi ɓu̱ nduki, wor khaki wa boote dam nu̱ zu̱nki gumapaali mbu̱ dam nu̱ka vu̱rki ye Magham ndu̱ Ye gamndang.

⁵ Sar da nu̱ nduk tu̱k wollo mbu̱ me wor ɓa, ku̱me ɗya nu̱ song zop ku.

Zoɓar ɓu̱ nu̱ Ru̱ktiku Kunungndang

⁶ Tang na nu̱ ru̱kti ɓu̱ Magham nggur a jiiri mbu̱ khu̱kheeti, khubtan ndu̱ ru̱kti nu̱ Labar mbarkandi nu̱ke koɗokhsi ɓaandang. Ma woparan ye nduki nu̱ larji, wor ke, dlar maa ɓu̱ nduki kap, ndu̱ pooni nduki, ndu̱ me ghai, ndu̱ nduki.

⁷ Tu̱ da su̱quran nu̱ du̱mbu̱r tu̱ zu̱ za, “Sawa ma Magham tun vu̱r zhaaji yenda! Jiwa sarchi kumar ɓaran a khu̱dli. Ghar ma ghai yenda, chin nu̱ du̱ngki maa viɗi, ndu̱ maa yaghai, ndu̱ ɗyim chitndi, ndu̱ ge ku nu̱ ɓaghar ɗyimi!”

⁸ Tu̱ nu̱ ru̱kti ɓu̱ Magham nu̱ rapang mbu gaanje nu̱ gumapaalyang, a zu̱ran za, “Wa nggu̱ɗi, Babilon gwaanji wa nggu̱ɗi! Chin nu saki nduki nu̱ larji kap tu̱ kuya ku ndu̱ ɗyim anap zawar malkandi ɓaran maɗyi!”

⁹ Tu̱ yang nu̱ ru̱kti ɓu̱ Magham nu̱ kunungang, a mbu nu̱ rapndang. Nu̱ ru̱kti nang a ɓalar ndu̱ su̱qur du̱mbu̱rkandi a zu̱ran za, “Kap njif nu̱ gharki ghai ye dlu gaarang ndu̱ shipar ɓaran, tu̱ dlu̱ bakhti ɓaran ye me gumaran, aa dlu̱ ve kharan.

¹⁰ Chin ma ka za ɗyim anap nu̱ shokhnar ɓu̱ Magham, nu̱ mbataki mbu̱ wang ɓaran nu̱ mbu̱ ɗyekhti shokhnar ɓu̱ Magham. Ka vu̱r bonye yenda maɗyi ndu̱ var ɓai nu̱ solfa nu̱ke zhiran ɗu̱ng, gume nu̱ ru̱ktiku ɓu̱ Magham shakhshakhndi kom ndu̱ gume Ye gamndang tu̱k.

¹¹ Qu̱ndi ɓu̱ ɓai nu̱ke a vu̱r bonye ye wor sang, ka ki yir viɗi aakochi koɗokhsi ɓa. Virkir ndu̱ fu̱ɗari, mas kha nduki nu̱ gharki ghai ye dlu gaarang nu̱ shipar ɓaran ɓa, kom ndu̱ nduki nu̱ shiki lambe dlu̱man nang.”

¹² Nang a shimkya kanaɗyi mbe gu̱ndi memu̱nar du̱mbu̱rkandi ɓu̱ nduki ɓu̱ Magham, nu̱ke a mbu bibiti ɓaran, a khar zhire mbe maitar Yesu nu̱ shiki ku.

¹³ Tang gaɓ tang tu̱k su̱qur ɓalar nggur viɗi a zu̱ran za, “Bu̱lo nang. Barkya ve nduki nu̱ke ka mu̱tki ku mbu̱ tlu̱nar ɓu̱ Zhinkir gwaanji ji ɗyin leendang!” Jiimbyang za, i “Shwat! Ka mas ku mbe bonye ɓaanda, ku̱me tlu̱nar ɓaanda ka mbu wora!”

Ku̱mndi ɓu̱ Larji

¹⁴ Nang nggu̱tki gumera fara, tang na ku̱zapti ɓongndi, ndu̱ njif nggur nu̱ shipaki Yi ɓu̱ nduku kharan ɗyine ku̱zaptang, ɗye zhar nu̱ ginarwe a nje ve ɗyinan, kom nu̱ dlau nyamnyamndi mbu̱ kharan.

¹⁵ Tu̱ nu̱ ru̱kti ɓu̱ Magham nggur a vi mbu̱ rafti ɓu̱ Maghamang tu̱ shi qar ndu̱ su̱qur du̱mbu̱rkandi ye njif nu̱ke a nje kharan ɗyine ku̱zaptang. A zu̱ran za, “A do dlau ɓaarang, to nggaasi dlaran, ku̱me sarchi ni wa shi, ɗye boote dam ɓu̱ larji wa zu̱n maɗyi.”

¹⁶ Tu̱ njif nu̱ke a nje kharan ɗyine ku̱zapti nang chiura dlau ɓaranang nu̱ ɗyine larji, tu̱ dla boote ɓu̱ larji nu̱gha.

¹⁷ Tu̱ nu̱ ru̱kti ɓu̱ Magham nggur a vi mbu̱ rafti ɓu̱ Magham nu̱ke a mbu̱ viɗi, dlau a nje kha nda tu̱k nu̱ke menang nyamnyam maɗyi.

¹⁸ Kom tu̱ nu̱ ru̱kti nggur a vi tu̱k rong maa kaani, chin kya nggu̱t ɓai nu̱ke a ɗyin du̱ku̱lang, a vi she du̱ku̱lang. Tu̱ qa nu̱ ru̱kti nu̱ dlau naandang ndu̱ su̱qur du̱mbu̱rkandi, tu̱ ze nda za, “A zoɓo dlau ɓaaro to dla dlakhsau anapang ɓar mbu̱ dam anap nu̱ke a larjyang, ku̱me yenkwang wa zu̱ni.”

¹⁹ Tu̱ nu̱ ru̱kti ɓu̱ Maghamang chiura dlau ɓaranang nu̱ ɗyine larji, tu̱ ku̱rta ye anapkwang ɓar ve qu̱farkwang, tu̱ taba wor nu̱ mbu̱ maa gwaanji nggur nu̱ka ɗyotki ɗyim anap nu̱ shokhnar ɓu̱ Magham.

²⁰ Tu̱ ɗyot ɗyim anapang ye maa nu̱ke a qu̱rse ghayi, tu̱ tom ki kuɗar ye maa ɗyooti ɗyim anapang, ɓakhan wa khu̱l bing kilomite won kunung, yang kirtan wa khu̱l khaatli saari njong.