Ɗyin mbu̱ tukari 13 - Mewar Alqawarang

Dlu̱ gaari nu̱ Ɗa Viki mbu̱ Gaawu gwaanji

¹ Tang na dlu gaari nggur a viri mbu̱ gaawu gwaanji. Domndi gwang a nje ve dlu gaarang, ndu̱ ɗyinku wor mut. Ɗye zhar a nje ve aa nyi domndi da, yang dlu̱m a nje bu̱laran nu̱ wuti ndu̱mndi ye Magham ve ɗyinkwang kap.

² Dlu gaari nang nakyang wa shipa nggaasan, yang saarankwang gor gori ndu̱ ghosi kirkandi ku wa dlu gaari ngguri nu̱ka qaki nda za beyar, menang wa me mu̱zam. Tu̱ Su̱tang vu̱r du̱mbu̱r ɓaran yenda, ndu̱ zhakhɗye ɓaran, ndu̱ zalale ɓaran maɗyikandi.

³ Yang da chele ɗyinku ɓu̱ dlu gaari nang, ruɓarang maatlin nu̱ke wa khu̱l ku̱ tlagha nda, tu̱ yang mbiɗi. Tu̱ larji kap shi lazham, tu̱ mburi nda ku.

⁴ Tu̱ nduki ghar ghai ye Su̱ti nang ku̱me wa vu̱r zalale ɓaran ye dlu gaari nang. Tu̱ ghar ghai ku tu̱k ye dlu gaarang, a zu̱ran ku za, “Ki kha ki wa dlu gaari nanga na? Ki ka ɗu̱maki dakhla nda?”

⁵ Tu̱ vu̱r zalale ye dlu gaari nang tu̱ gwa men tu̱ ku̱s ɓalarku nu̱ gwaari ɗyin ndu̱ wuti ndu̱mndi ye Magham, tu̱ tlogha yenda ku̱ kha ndu̱ zalale kwaaɗar me chere ɗyin vat qu̱m rap.

⁶ Tu̱ yang dlu gaari nang qu̱n men tu̱ nggaasi ɓalarku nu̱ wuti ndu̱mndi ye Magham, a pu̱z dlu̱man, ndu̱ ye maa khar ɓaran, ndu̱ wor nu̱ke kharan mbu̱ viɗ kap.

⁷ Tu̱ njigti nda ku̱ dakhla nduki ɓu̱ Magham ku̱ ra wora. Tu̱ vu̱r zalale yenda tu̱k ɗyine aa nyi pooni nduki, ndu̱ nduki, ndu̱ me ghaiku, ndu̱ dlar maa ɓu̱ nduki.

⁸ Nduki nu̱ke kharan mbu̱ larji kap ka ghar ghai ye dlu gaari nang, nang ke kap nduki nu̱ke nu̱ bu̱la dlu̱m wor nu̱ mbu̱ Lagarkati Nyifiri ɓu̱ Ye gamndi nu̱ dlaki nu̱ ghang ma ji sarchi du̱ngndi larjyang ɓa.

⁹ Nu̱ dlu̱mdi tu̱kti maa kap, ku̱ tu̱ki!

¹⁰ Njif nu̱ shimki nda ndu̱ tlu̱nar maava, ka ɗu̱kya ndu̱ chin ma tlu̱nar maava. Njif nu̱ shimki ku̱ tlagha nda nu̱ gha ndu̱ kaskari, ka tlagha nda ndu̱ kaskari. Ɗyinang a shimkya daati ɓu̱ Magham ku̱ kha nu̱ kanaɗyi ndu̱ gu̱ndi memu̱nar du̱mbu̱rkandi ndu̱ maito ɓu̱ nu̱ mburi Magham.

Dlu gaari nu̱ ɗa viki vu̱ghai

¹¹ Tang na dlu gaari nggur tu̱k, nu̱ke a viri vu̱ghai. Domndi ɓaran rap wa ye gamndi, tu̱ yang shi ɓalar wa geema Su̱tang.

¹² Tu̱ shi boote ndu̱ zalale ɓu̱ dlu gaari nu̱ gumapaali nang me ɓaran. Tu̱ sa larji ndu̱ nduki nu̱ke a mban kap ku̱ ghar ghai ye dlu gaari nu̱ gumapaalyang, yang chin ke ba dlu gaari nu̱ gwaki ruɓar maɗyikandi tu̱ mbiɗang.

¹³ Dlu gaari nu̱ rapndi nang wa shi ɗye lazham gwaanjiku, nu̱ke wa ɗu̱ma qa ɓai viɗi tu̱ ɗa zhur nu̱ yaghai mbu̱ yiti aaki.

¹⁴ Tu̱ lamba nduki nu̱ke a nje kharan mbu̱ larji kap ndu̱ ɗye lazham nu̱ vu̱rki zalale ni yenda ku̱ shi me ɓu̱ dlu gaari nu̱ gumapaali nang. Tu̱ dlu gaari nu̱ rapang ze wor za ku̱ du̱ng shipar nggur ma vu̱r zhaaji ye dlu gaari nu̱ ruɓaki nda ndu̱ kaskar tu̱ yang shaanang.

¹⁵ Tu̱ vu̱r zalale ye dlu gaari nu̱ rapndi nang ku̱ vu̱r dar nyifiri ye shipar ɓu̱ dlu gaari nu̱ gumapaalyang, ma ku̱ shi ɓalari, ma ku̱ sa ku̱ tlagha nduki nu̱ zhangki ghaari ghai gha yenda kap.

¹⁶ Tu̱ dlu gaari nu̱ rapndi nang sa ku̱ shi bakhti ye nduki kap aa ve khar wor nu̱ zu̱ma, aa me guma wora, woi ndu̱ gorki, nu̱ gu̱narku ndu̱ nu̱ nungndiku, maava ndu̱ ye rafa.

¹⁷ Shi wanang ma ku̱ aaki masa ɗyi nggur ɓa yang ku̱ masa ɓar ɓa kope lambe nang a nje ve nda, bakhtang chin ke, dlu̱m dlu gaarang kom ndu̱ lambe dlu̱man.

¹⁸ Ɗyi nang a shimkya kaɗari. Aaki nu̱ dar mbu̱ tunu ka ɗu̱ma fet mbu̱ lambe ɓu̱ dlu gaari nang, ku̱me bakhtang ɗya dlu̱m njif ngguri. Yang lambyang ɗya won njong nu̱ ɗyin njong qu̱m njong (666).