Ɗyin mbu̱ tukari 12 - Mewar Alqawarang

Nokhzang ndu̱ Su̱ti Gwaanji

¹ Tu̱ ɗye saidu gwaanji nu̱ke ɗya ɗye lazham a ɗal mbu̱ viɗi: tu̱ nusu nu̱ke lu̱paran ndu̱ fu̱ɗa, ndu̱ chera mbu̱ saaran, yang wa sa ɗye zhar nu̱ anjinjeku gwanggu̱m rap si.

² A ghu̱rɓan, yang nu̱ke a ma kha woyang tu̱ shi ghoori ku̱me bonye ndu̱ khaati khar woyang.

³ Tu̱ yang ɗye saidu ngguri a ɗal mbu̱ viɗi. Su̱ti nggur gwaanji vyang ndu̱ ɗyinku mut ndu̱ domndiku gwang, ndu̱ ɗye zhar ku wor mut ve ɗyinankwang.

⁴ Tu̱ yang koo da mbe kunung ɓu̱ anjinjeku nu̱ke a mbu̱ viɗi ndu̱ gaandan ta wos wor yaghai. Kom tu̱ Su̱tang ching nu̱ gume nokhzang, a ku̱r ku̱ nji nji woyang ɓara mbu̱ nokhzang wa khan dam.

⁵ Tu̱ yang kha woi ɓaran, woyang ɗya ye khusku, chin kya ma kwaaɗar ɗyine dlar maa ɓu̱ nduki kap ndu̱ zaaɓir vi nu̱ kwaaɗa. Tu̱ yang kauta woyang ɓara tu̱ ɗu̱ ndu̱ chin she Magham ndu̱ zhakhɗye ɓaran.

⁶ Tu̱ nokhzang ɗan ɓu̱ gaari, ye maa nu̱ Magham daasaki yenda, nang ke ye maa nu̱ke ku̱ ɗa khutlo nda me qaandi du̱pu da ndu̱ won rap ndu̱ ɗyin njong (1,260).

⁷ Tu̱ dakhlar a gu̱n mbu̱ viɗi. Makel ndu̱ nu̱ ru̱ktiku ɓaran a dakhlar ndu̱ Su̱tang, yang Su̱tang tu̱k a su̱yen ndu̱ nu̱ ru̱ktiku ɓaran tu̱ dakhlar ruɓi chele ɓaanda.

⁸ Yang du̱mbu̱r ɓu̱ Su̱tang kata tu̱ ɗa mbu̱t maa khar ɓaanda mbu̱ viɗi.

⁹ Tu̱ ɗa chiura mbukti ndu̱ Su̱ti gwaanjang nu̱ yaghai, chin ke, geema su̱ti nu̱ zhu, nu̱ ka qaki nda za Nu̱ mu̱na, ko Sheɗan, chin lambaki larji kap. Tu̱ ɗa chiura nda nu̱ yaghai mbu̱ larji su̱yen ndu̱ nu̱ ru̱ktiku ɓaran.

¹⁰ Tang tu̱k su̱qur ɓalar nggur du̱mbu̱rkandi nu̱ ɗa viki mbu̱ viɗi a zu̱ran za, “Leendangang, ɗanar, ndu̱ zalale ndu̱ kwaaɗar ɓu̱ Maghamndi ɓaarem, ndu̱ zalale ɓu̱ Masiya ɓaran a ɓa. Jiwa nu̱ dar zhaano ɓu̱ nyeezeremang, chin nu̱ka daki zhaano ɓaanda nu̱ gume Maghamndi ɓaarem virkir ndu̱ fu̱ɗarang a chiura nda nu̱ yaghai.

¹¹ Tu̱ yang zu̱m du̱mbu̱r ɓaran nu̱ ku̱nshe tom ɓu̱ Ye Gamndang, ndu̱ ɓalar nu̱ saidaki ku, jiwa nu̱ shim nyifi ɓaanda maɗyi nu̱ke ku̱ ku̱na vu̱rtan ɓa, aa ka tlagha kya wora.

¹² Ku̱me nang shi ma kashari, tun mbu̱ viɗku ndu̱ wor nu̱ke a nje kharan mban kap! Yang larji ndu̱ ɗyim chitndi ku tun ɗye zhiyaye! Jiwa Nu̱ Mu̱narang a zhur nu̱ she nu, yang nyeedlan ndu̱ shokhnar ku̱me wa zu̱n nu̱ ɗyine sarchi ɓaran wa shi bing!”

¹³ Nu̱ Su̱tang naki wa chiura nda nu̱ vu̱ghai, tu̱ nggaasi bu̱rta nokhzi nu̱ khaki woi ye khuskyang.

¹⁴ Tu̱ yang vu̱r khobki rap ɓu̱ jijau gwaanji ye nokhzang, ma ku̱ ji ku̱ ɗu̱ ye maa nu̱ daasaki yenda mbu̱ gaarang, maa nu̱ke ka ɗa nggu̱tki nda me sonyi kunung ndu̱ mbeeri ma ku̱ shakh nu̱ su̱tang.

¹⁵ Tu̱ Su̱tang a shirakh ɗyim wa gaawu mbu̱ men nu̱ gaanje nokhzang, ma ku̱ zo ɗyimang za ɗyin nokhzan ku̱ koo nda ɓara.

¹⁶ Tu̱ yang maa vu̱ghai shaata nokhzang, nu̱ ku̱nshe qu̱ndi men nu̱gha tu̱ za ɗyim nu̱ ɗa viki mbu̱ me su̱tang ɓara.

¹⁷ Tu̱ Su̱tang shi shokhna ndu̱ nokhzang maɗyi, tu̱ ji ma shi nji dakhlar ndu̱ ɓeeni pooni ɓu̱ nokhzang, wor ke, kap nduki nu̱ke a mbu bibiti ɓu̱ Magham, a maita zhire nu̱ Yesu wutki nang.

¹⁸ Tu̱ Su̱tang ching gha ɗyine wuɗyiri nu̱ me ɗyim chitndi.