Ɗyin mbu̱ tukari 11 - Mewar Alqawarang

Nu̱ Saiduku ɓu̱ Magham Wor Rap

¹ Tu̱ vu̱r saaɓir buu maari ya nu̱ shipaki zhuɗum, tu̱ zu̱ ya tu̱k za, “Ɗu to ɗa buu rafti ɓu̱ Magham ndu̱ du̱ku̱lang, to shiga nduki nu̱ke a ghaari ghai mban.

² Yang ku̱ buu na dalang nu̱ gumapaali mbu̱ rafti ɓu̱ Maghamang ɓa, njig maaranang ku̱me wa vu̱r ɓar ye nduki nu̱ke nu̱ zu̱n Magham ku ɓa. Wor nang ke nduki nu̱ke ka ɓa khalki ghai shakhshakhndi nang nu̱ mbu̱ saari wora me chere ɗyin vat qu̱m rap (42).

³ Ngga vu̱r zalale ye saiduku ɓanga wor rap nu̱ saki lukti gho mu̱ti ku, yang ka wopa ɓalar ɓang ku me qaandi du̱pu da ndu̱ won rap ndu̱ ɗyin njong (1,260).”

⁴ Saiduku rapndi nang wor ke qu̱far Zaitun ku rap ndu̱ tokhol ɓai ku rap nu̱ke a nje chingndan gume Zhinkir gwaanji ɓu̱ larji kap.

⁵ Mbu̱ke njif nggur wa shim ku̱ vu̱r bonye ye wora, ɓai ka ɗa vi mbu̱ me wor tu̱ tlagha nu̱ kare ndu̱ worang. Ndu̱ wanang ka tlagha aaki nu̱ke a shim vu̱r bonye ye wora.

⁶ Wa vu̱r zalale ye wor ku̱ za maa viɗi nu̱gha ma ku̱ shi roma mbu̱ sarchi nu̱ke a zu̱r ɓalar ɓang ku ɓa. Zalale a nje kha wor ma ku̱ gaɓ ndu̱ ɗyimkwang tu̱ kha ma tom, kom ndu̱ ku̱ vu̱r bonye ye larji ndu̱ aa nyi pooni anoba, aa nyi sarchi nu̱ shimki ku.

⁷ Yang qu̱rse wa woɗa wopa ɓalar nu̱ vu̱rki ye wor ku̱ wopa kwang, dlu gaari nggur nu̱ke a ma viri ɓar mbu̱ ge gargha mboɓongndi nu̱ke koɗokhsi ɓa ndang ka ɓu̱tl nu̱ ve wora. Tu̱ zu̱m du̱mbu̱r ɓaanda, tu̱ tlagha wora.

⁸ Ka njig man var wor nu̱ yiti njiv nu̱ mbu̱ ghai gwaanji nu̱ katlki Zhin wor gwaanji gha me qu̱farang. Wa ka ku̱r ghai nang ndu̱ Sodom, ndu̱ Masar.

⁹ Nduki ndu̱ aa nyi pooni nduki, ndu̱ me ghai, ndu̱ dlar maa, ka zhang ku̱ pa mu̱tiku nang gha, tu̱ zu̱ yiti ye mu̱tiku nang me qaandi kunung ndu̱ mbeeri.

¹⁰ Nduki nu̱ larji ka kasha mu̱ti ɓu̱ saiduku rapndi nang. Ka qa tabar ku, tu̱ ru̱k ndu̱ vu̱rtiku ye yen a kasha mu̱ti ɓu̱ annabiku rapndi nu̱ ɗa ɓa ki ndu̱ bonye ye nduki nu̱ larji nang.

¹¹ Yang qu̱rse qaandi kunung ndu̱ mbeeri nang, tu̱ khu̱kheeti nyifiri na viki she Magham tu̱ vi nu̱ mbe wora tu̱ ji tu̱ ching gha nu̱ saari wora. Tu̱ sawar maɗyikandi ku̱s nduki nu̱ naki wora.

¹² Tu̱ yang annabiku rapndi nang tu̱k su̱qur ɓalar du̱mbu̱rkandi nu̱ ɗa viki viɗi a zu̱ran za, “A dla man fan!” Tu̱ dlan viɗi ku mbu̱ ku̱zapti, nu̱ zhangndi ku ɓaanda a naran.

¹³ Yang ba ye sarchi ni tu̱ maa vu̱ghai shi yakhtar maɗyikandi, tu̱ da mbe gwang ɓu̱ ghayang gu̱ɗa, tu̱ nduki du̱pu mut mu̱ɗi. Tu̱ nduki nu̱ ɗanaki tu̱k sawar maɗyi, tu̱ vu̱r zhaaji ye Magham nu̱ viɗi.

¹⁴ Ɗye zhiyaye nu̱ rap wa peeta, yang wonji ɗye zhiyaye nu̱ kunung a ɓar fan ndu̱ fan.

Piiri Domndi nu̱ Mut

¹⁵ Tu̱ nu̱ ru̱kti ɓu̱ Magham nu̱ mut pi domndi ɓaran. Tang tu̱k su̱qur ɓalarku khang du̱mbu̱rkandi mbu̱ viɗi a zu̱ran ku za: “Kwaaɗar ɓu̱ larjyang wa kha ma kwaaɗar ɓu̱ Zhinerem gwaanji ndu̱ ɓu̱ Masiye ɓaran, yang ka shi kwaaɗar aakochi koɗokhsi ɓa!”

¹⁶ Tu̱ ndukkudaandiku ɗyirap qu̱m vatndi nu̱ke a nje kharan ɗyine zhakhɗye ku ɓaanda gume Maghamang, kurpa gha nu̱ mbu̱ yiti wora gume Magham, tu̱ ghar ghai yenda.

¹⁷ Tu̱ ku̱s zu̱ranku za, “Chem wa kuna ro, to Zhinkir gwaanji Magham nu̱ zalale aa nu̱m kap, to nu̱ke a nje leendang, to kya nje zhu tang, jiwa ta da zalale ɓaa gwaanji ta nggaasi kwaaɗar ɓaaro.

¹⁸ Nduki nu̱ke nu̱ zu̱n Magham ku ɓa a shokhnar ku, yang sarchi shokhnar ɓa maɗyikandi aa ɓa leendang, sarchi nu̱ke ka kumaki mu̱tiku aa ɓa. Ka vu̱r ɗye ɓiiri ye annabiku nu̱ke ɗya maaviku ɓaaro, ndu̱ daatiku ɓaaro, kom ndu̱ nduki nu̱ke a sawa dlu̱moro, kap woi ndu̱ gorki. Ma su̱ya nduki nu̱ su̱yaki larji.”

¹⁹ Tu̱ qu̱n rafti ɓu̱ Magham nu̱ke a mbu̱ viɗi nu̱gha, kom tu̱ na Akwachi alqawar ɓaranang. Tu̱ shi wuti maari, ndu̱ ghu̱mndi maari, ndu̱ pedlangndi, ndu̱ yakhtar maa vu̱ghai, ndu̱ gotormolku rututundi.