Ɗyin mbu̱ tukari 10 - Mewar Alqawarang

Nu̱ Ru̱kti ɓu̱ Magham ndu̱ Lagarkati Ɗyikhlakandi Koɗommandang

¹ Kom tang na nu̱ ru̱kti ɓu̱ Magham nggur gwaanji du̱mbu̱rkandi a zhurti viɗi. Yang lu̱paran ndu̱ ku̱zapti, ndu̱ kobyong mu̱na ɗyinan, mbu̱ yita nang wa fu̱ɗari, saaranang wa zaureku nu̱ke ɗya shaadli ɓai.

² Lagarkati ɗyikhlakandi koɗommandi nggur a nje me kharan qu̱ndan. Yang wa sa saaran nu̱ zu̱ma nu̱ ɗyine ɗyim chitndi, tu̱ sa saaran nu̱ gu̱ɗawang nu̱ yaghai.

³ Tu̱ shi zhaano ndu̱ su̱qur du̱mbu̱rkandi wa ghoori ɓu̱ mu̱zam. Qu̱rse zhanwang, tu̱ pedlangndiku mutndang gaɗa.

⁴ Yang nu̱ pedlangndi mutndi ku nang shiki ɓala, tang daasa ma ku̱ bu̱la nga nu̱ gha, tang yang tu̱k su̱qur ɓalar nu̱ ɗa viki viɗi a zu̱ran za, “Zo ɗyi nu̱ pedlangndi mutndi nang zu̱ki nu̱gha! Yang bu̱la na ɓa!”

⁵ Kom tu̱ nu̱ ru̱kti ɓu̱ Magham nang naki chingndan ɗyine ɗyim chitndi ndu̱ maa yaghayang da bu̱nan nu̱ zu̱ma nu̱ viɗi.

⁶ Tu̱ ku̱mnda ndu̱ dlu̱m njif nu̱ke a nje koɗokhsi ɓa ndang. Chin nu̱ du̱ngki maa viɗku ndu̱ ɗyiku nu̱ke a mban kap, ndu̱ maa vu̱ghai ndu̱ ɗyiku nu̱ke a mban kap ndu̱ ɗyim chitndi ndu̱ ɗyiku nu̱ke a mban kap. Tu̱ nu̱ ru̱ktang zu̱ za, “Su̱bu̱rti sarchi nje tu̱k ɓa!

⁷ Yang mbu̱ qaandi virkirku nu̱ke nu̱ ru̱kti ɓu̱ Magham nu̱ mutndang shiki bing pi domndi ɓaran ɗyi tukakandi ɓu̱ Magham ka nyedli ba wa nu̱ wopaki ye maaviku ɓaran annabiku.”

⁸ Kom tu̱ su̱qur ɓalar nang tu̱kki viɗang gaɓ tu̱ shi ɓalar ya. A za, “Ɗu to ɗa da lagarkati ɗyikhlakandi koɗomandi nu̱ke a nje du̱ngkandi qu̱ndan mbu̱ khar nu̱ ru̱kti nu̱ chingki gha ɗyine ɗyim chitndi ndu̱ maa vu̱ghayang.”

⁹ Tang ɗu̱ she nu̱ ru̱ktang tang ze nda nga za ku̱ vu̱r lagarkati ɗyikhlakandi koɗommandang ya. Tu̱ yang nu̱ ru̱ktang zu̱ ya za, “Dlu to nji, ka kha ɗyot ve mboro, yang nyer mbu̱ me wa ɗyim ɗyiri.”

¹⁰ Tang dlu̱ ye lagarkati ɗyikhlakandi koɗommandang kha nda, tang nji ɓara. Tang tu̱k nyer mbu̱ mya wa ɗyiiri, yang nang ɗu̱kaki ɓara, tu̱ kha ɗyot mbya.

¹¹ Tu̱ zu̱ ya ye sarchi ni za, “Wa ku̱s ku̱ zu̱ na ɗyi nu̱ Magham zu̱ki yor tu̱k ɗyine ndukiku khang, dlar maa ku zum zum, ndu̱ me ghaiku zum zum, kom ndu̱ kujiku.”