Ɗyin mbu̱ tukari 1 - Mewar Alqawarang

Nggarsan

¹ Lagarkati nang ɗya ɗyin mbu̱ tukar nu̱ Magham vu̱rki ye Yesu Masiya ku̱ wut ɗyi nu̱ke a ma ɗaatli nu̱ shopti ɓa ye maaviku ɓaran; tu̱ yang Yesu ru̱k nu̱ ru̱kti ɓaran nu̱ she Yokhana ku̱ zu̱ zoɓar nang yenda.

² Tu̱ saida ɗyiku nyin naki kap. Nang ke zu̱r mbu̱ ru̱kti nu̱ ɗa viki she Magham ndu̱ zhire nu̱ Yesu Masiya wutki yenda.

³ Barkya ve njif nu̱ nggu̱tki mbu̱ bu̱lar nu̱ke a mbu̱ lagarkati nang, yang barkya ve nduki nu̱ nggaki dlu̱mdi wor ma tu̱k zoɓar nu̱ke ɗya zu̱r ɓu̱ Magham nang. Tu̱ yang ku̱s ɗyi nu̱ke a nje bu̱laran mbu̱ lagarkatang nu̱ mbu̱ memu̱naran! Jiwa sarchi shir ɓu̱ ɗyiku nang wa shi bing ɓari.

Zoɓar Qaandi ye Tabar ɓu̱ nu̱ Mbu Yesu ku mbu̱ Ghai ku Mut

⁴ Nga Yokhana, Nga bu̱lar ye tabar ɓu̱ nu̱ mbu Yesu ku nu̱ mbu̱ ghai ku mut nu̱ke a mbu̱ dlar ghai Asiya. Kha ma ndu̱ mu̱nkir ndu̱ qaandi memu̱nar na viki she Magham nu̱ke chin kya nje leendang, chin kya nje zhu, chin ka khaki mbu̱ sarchi nu̱ke a ɓari. Kom ndu̱ she jiimbiku mutndi nu̱ke a gume zhakhɗye ɓu̱ Maghamang,

⁵ ndu̱ she Yesu Masiya, chin nu̱ke ɗya nu̱ saidu zhire. Chin nu̱ke ɗya Ye gomir nu̱ gumapaali nu̱ jiiki ɓar mbe mu̱ti, a kwaaɗar ɗyine kujiku nu̱ larji tu̱k. Chin nu̱ ndolaki rem, tu̱ lawa rem mbe solarku ɓaarem nu̱ ku̱nshe mbu̱ti tom ɓaran.

⁶ Chin gaɓki ndu̱ chem, chem kha ma kwaaɗari ndu̱ kuruku ma tlu̱nar ye Magham ndu̱ ɓaran nu̱ Zhin. Ku̱me nang bu ku̱ Yesu Masiya dlu̱ zhaaji ndu̱ kwaaɗar koɗokhsi sar da ɓa! Amin.

⁷ Nggu̱ɗu, a nja ɓar mbu̱ ku̱zapti, yang aa nyi yiti ka na nda, kap nu̱ nduki nu̱ zhokhki ndang. Nduki nu̱ larji kap yang ka shi yaaɓarku ku̱me chin. Ku̱ kha wanang shwat! Amin.

⁸ “Nga ke Alfa, Nga ke Omega,” Zhinkir gwaanji Magham zu̱ki nang, “Chin nu̱ke a leendang, nu̱ke a zhu, nu̱ke a ɓari, nga ke nu̱ zalale aa nu̱m kap.”

Nar Ɗyin mbu̱ Tukar ɗyine Masiya

⁹ Nga, Yokhana, khatonu ndu̱ mu̱dlonu mbe bonye ndu̱ kwaaɗari ndu̱ kaɗanyi mbe sar memu̱nar nu̱ke ɗya ɓaarem mbe Yesu. Nga ɗyin chenjesi Patu̱mos ku̱me ɓalar ɓu̱ Magham nu̱ saidar Yesu.

¹⁰ Ye fu̱ɗar ɓu̱ Maghamang, nga mbe Jiimba, tang tu̱k su̱qur maɗyikandi nu̱ shipaki pi domndi.

¹¹ Tu̱ su̱qurang zu̱ za, “Bu̱lo ɗyi no naki nu̱ mbu̱ lagarkati ɗyikhlakandang, to ru̱k ye tabarku ɓu̱ nu̱ mbu Yesu ku nu̱ mbu̱ ghai mutndang. Wor ke, tabar nu̱ Afisa, ndu̱ nu̱ Su̱mirna, ndu̱ Pagamum, ndu̱ Tiyatira, ndu̱ Sardis, ndu̱ Filadelfiya, kom ndu̱ nu̱ Laudikiya.”

¹² Tang mbu̱m ma na nga su̱qur nu̱ke a ɓalarang ya. Nang mbu̱mki tang na tokhol nu̱ ginarwe mut.

¹³ Chele tokhol ɓaikwang tang na njif nggur nu̱ shipaki Yi ɓu̱ nduku ndu̱ lukti zururundi ve nda nu̱ khu̱lki ɗyin saaran, ndu̱ malai nu̱ ginarwe a nje gu̱ndan ve memu̱naran.

¹⁴ Mbu̱ ɗyinan ndu̱ ghosi ɓaran ɓong khat khat wa lefu̱ndi, yitanku nang wa no za dlu̱r ɓai.

¹⁵ Saaranku a qu̱ndi ɓui ɓui wa ghuri nu̱ke a dlu̱ri mbu̱ ɓai shechiri. Su̱quran nang wa ɗyimku nu̱ke a zhar nu̱ du̱mbu̱r.

¹⁶ Wa khuɓ anjinjeku mut mbu̱ kharan nu̱ zu̱ma, kaskar nu̱ke men rap nyamnyamndi a viri mbu̱ men. Mbu̱ yitanang a wuti wa fu̱ɗar nu̱ chingki nu̱ tala.

¹⁷ Nang naki nda tang nggu̱ɗ nu̱ gume nda wa nga mu̱tan. Tu̱ yang sa kharan nu̱ zu̱ma nu̱ ɗyina, tu̱ zu̱ za, “Tu̱k na sawa ɓa. Nga ke nu̱ gumapaali, nga ke nu̱ gana.

¹⁸ Nga ke Nu̱ Nyifiri! Nga mu̱ɗi, yang wonji ɗo leendang, nga nje ndu̱ nyifiri koɗokhsi ɓa aakochi, ɗye qu̱ndi ɓu̱ mu̱ɗi ndu̱ nu̱ maa khar ɓu̱ mu̱ti a nje khara.

¹⁹ Ku̱me nang, bu̱lo, ɗyiku nu̱ke to naki, ɗyin leendang, kom ndu̱ ɗyiku nu̱ke ɓu̱ ɗa ɓa gaandan.

²⁰ “Wonji ɗyi tukakandi nu̱ mbu̱ anjinjeku mutndi no naki mbu̱ khara nu̱ zu̱mang, kom ndu̱ mbu tokhol ɓai ku nu̱ ginarwe wor mutndang. Wor anjinje mutndi nang, ɗya nu̱ ru̱ktiku ɓu̱ tabarku ɓu̱ nu̱ mbu Yesu ku mutndang, yang tu̱k tokhol ɓai ku nu̱ ginarwe wor mutndi nang, ɗya tabar ɓu̱ nu̱ mbu Yesu ku wor mutndang.”