Afiseku 5 - Mewar Alqawarang

Khar mbu̱ Yarangi

¹ Nu̱ke tun wa kha ma qusonggi ɓu̱ Magham yang a shimndo nu, shi ma ɗyi nu̱ ka shikyang mbu̱ khar viti ɓaanu.

² Tun shi khar viti ɓaanu mbe ndola ba wa nu Masiya ndolaki rem, tu̱ vu̱r ɗyinan ku̱me chem, vu̱rti nu̱ke zhiran mu̱ni, yang ɗya sadke nu̱ dlaki ye Magham.

³ Sar da ku̱ njig nu tu̱ nduk da dlu̱monu ndu̱ ɓalar zawa ndu̱ aa nyi tlu̱nar su̱bu̱rti ndu̱ khape ɓa, ku̱me ɗyiku nang nu̱ shipa nduki ɓu̱ Magham ɓa.

⁴ Wanang tu̱k ku̱ shi nu me ku̱rji ndu̱ ɓalar bamndi ndu̱ ɗye mu̱si galkandi ɓa, ku̱me nu̱ shipa ɓa. Me ɓu̱ nang tun ki kuna Magham.

⁵ Tun wa zu̱n nu̱ ɗyine shwat, nu̱ zawa, ndu̱ nu̱ tlu̱nar zop, ndu̱ me khape (nu̱ke chin ndu̱ nu̱ ghaari ghai ye mu̱lu̱m da ku), ɓu̱ gwa maa mbu̱ kwaaɗar ɓu̱ Masiya ndu̱ ɓu̱ Magham, sar da ɓa.

⁶ Ku̱ nduk lamba nu ndu̱ ɓalar bamndi ɓa. Ai, shokhnar ɓu̱ Magham ka ɓa nu̱ ɗyine nu̱ zhangndi tu̱kti maa ku ku̱me pooni solarku nang.

⁷ Ku̱me nang ku̱ tun taba nu ndu̱ pooni nduki ku nang ɓa.

⁸ Nu̱ke ɗau fara tun a mbu̱ zhumi, yang leendang tun wa gwa yarang nu̱ ku̱nshe Zhinerem gwaanji. Tun shi pooni khar ɓu̱ nduki nu̱ mbu̱ yarangi,

⁹ (ku̱me yarang ke nu̱ vu̱r boote maɗyikandi mbe tlu̱nar mbarkandi, ndu̱ khar dambi, ndu̱ ɓalar zhire)

¹⁰ gang ma kya ɗyi nu̱ke Zhinkir gwaanji ka tu̱kki mu̱ndan.

¹¹ Shakh ma ɗyinonu ndu̱ tlu̱narku bamndi nu̱ke a mbu̱ zhum nu̱ke nduki a shiran, tun yang pota su̱ wora.

¹² Jiwa ɗya ɗye kawa ku̱ nduk zu̱ su̱ pooni ɗyiku nu̱ke nu̱ song sawar Magham ku ka shiki ku mbu̱ tuka.

¹³ Yang aa nyi tun nu̱ yarang a wutki ka vi ye dalangi,

¹⁴ ku̱me yarang ke nu̱ wut tun ye dalangi. Nang ke ɗyi nu̱ saki tu̱ zu̱ za, “Ju, to nu̱ke ta ɗyeniri! Ju ɓar mbe mu̱ti! Masiya ka vu̱r yarang yoro.”

¹⁵ Ku̱me nang tun ku̱r vaanu maɗyi mbe khar viti nu̱ke tun a mban. Ku̱ shi nu khar ɓaanu wa nggu̱bu̱ng ku ɓa, shi ma wa nu̱ kaɗari ku.

¹⁶ Tun shi boote ndu̱ aa nyi zalale nun gwaki tun shi ɗyi mbarkandi, ku̱me qaandi virkirku nu̱ke chem a mban ku nang maatlin.

¹⁷ Ku̱me nang ku̱ kha nu ma nggu̱bu̱ngku ɓa, zu̱n ma ɗyi nu̱ke Magham a shim ku̱ shi nu.

¹⁸ Ku̱ kuya nu ndu̱ ɗyema ɓa, ku̱me nang ɗya njiv su̱bu̱rti nduki. Me ɓu̱ nang tun kha nyeedlan ndu̱ Jiimbi shakhshakhndi,

¹⁹ tun shi ɓalar ye yen ndu̱ ɓalarku nu̱ke a mbu̱ Zabura, ndu̱ taazi khamndi ku, ndu̱ taaziku nu̱ mbu̱ Jiimba. Tun ki qa taazi khamndi ku ndu̱ Zabure ye Zhinkir gwaanji ndu̱ memu̱na nu kap.

²⁰ Tun ki kuna Magham Zhinki mbu̱ dlu̱m Zhinerem gwaanji Yesu Masiya aakochi mbu̱ anyi tunu.

²¹ Vu̱r ma ɗyinonu ye yen mbe sawar Masiya.

Khar ɓu̱ Khusku ndu̱ Nokhzan mbu̱ Ɓu̱rti

²² Tun nusuku ɓu̱rkandi, vu̱r ma ɗyinonu ye zhime nu, ba wa nun ka shiki ye Zhinkir gwaanji.

²³ Ku̱me khuskyang ke ɗyin nokhzan, ba wa nu̱ke Masiya ke ɗyin tabar ɓu̱ nu̱ mbu̱ Yesu, nu̱ke wor ke man varan. Yang chin nu̱ ɗyinan ke nu̱ ɗanar ɓu̱ man varanang.

²⁴ Ba wa nu̱ke tabar ɓu̱ nu̱ mbu Yesu ka vu̱rki ɗyin wor ye Masiya, wanang tu̱k ku̱ nusuku vu̱r ɗyin wor ye zhime wora mbe aa nyi tunu.

²⁵ Khuzuku, ndola ma nusuku ɓaanu ba wa nu̱ Masiya ndolaki tabar ɓu̱ nu̱ mbu Yesu tu̱ vu̱r ɗyinan ku̱me chin.

²⁶ Ma ku̱ vu̱r nji nda shakhshakh ye Magham nu̱ ku̱nshe ɓalar ɓaran qu̱rse wa gaɓ ndu̱ chin tu̱ kha shakhshakh nu̱ ku̱nshe shiɓti nda nu̱ gha nu̱ shiki ndu̱ ɗyimi.

²⁷ Shi wanangang ku̱me sarchi nu̱ke chin ka ɓa daki tabar ɓu̱ nu̱ mburi nda kwang ye varan, ku̱ kha ndu̱ zhaaji maɗyi waare ru̱gna ndu̱ ɗyi nu̱ke mbar ma na ɓa, ku̱ kha shakhshakh waare beeko.

²⁸ Wanang tu̱k wa ku̱s ku̱ khuzuku ndola nusuku ɓaanda ba wa nu̱ke a shim man vaanda. Ai, njif nu̱ke a shim nokhzan a shimkya varan.

²⁹ Ku̱me nduk a nje nu̱ zhangki man varan gha sar da ɓa ɗo, nduk ka zu̱mi tu̱ ɗang varan maɗyi ba wa nu̱ke Masiya ka ɗangki tabar ɓu̱ nu̱ mburi nda ku.

³⁰ Jiwa chem me barku ɓaran.

³¹ Ba wa nu̱ke a nje bu̱laran za, “Nduk ka njig man ndu̱ zhin, tu̱ gonta nu̱ nokhzan wor rapndang ka kha ma man var da.”

³² Ɗyi nang ɗya ɗyi gwaanji tukakandi. Yang nga shikya ɓalar ɓu̱ Masiya ndu̱ tabar ɓu̱ nu̱ mburi nda ku.

³³ Yang kap ndu̱ wanang, ɓalar nang wa su̱ɓa nu tu̱k. Bu ku̱ aaki chele ɓaanu ndola nokhzan wa varan, tu̱ nokhzang tu̱k vu̱r zhaaji ye zhimen.