2 Korintiyeku 2 - Mewar Alqawarang

¹ Ku̱me nang nga da ye memu̱nara nu̱ ɗyine ngam ɓu̱ ɗu̱ she nu̱ tu̱k ma su̱bu̱r mbonu ɓa.

² Mbu̱ nga su̱bu̱r memu̱na nu, ki ka mu̱nki mba, nga za ba tun nang su̱bu̱rki mbonwang ɓa goma?

³ Nga bu̱la lagarkati nang ye nu wanang, ku̱me nang shim a ɓa nga she nu tu̱ ndukiku nu̱ke tu̱ga shipaki ku̱ sa nga ma kasha su̱bu̱r mba ɓa. Nga maita kap ɓaanu chem ka ɓa shi kashar su̱yen.

⁴ Nga bu̱la lagarkati nang mbu̱ bonye ndu̱ su̱bu̱rti mbi maɗyikandi. Nga zhur ɗyim ghoori shirop shirop, yang nang shi wanang ma ku̱ memu̱na nu su̱bu̱r ɓa. Nga shi wanang ma ku̱ zu̱n nu nu̱ ɗyine nga ndola nu maɗyi.

Ndu̱m ma ye Njif nu̱ shiki Zop

⁵ Mbu̱ njif nggur wa shi ɗye su̱bu̱rti memu̱na, shi ya ɓa, a khar wa shi ye nu kap ɓaanu mbu̱ chem wa da lasai. Nang zu̱ nang ma ranna nu ɓa.

⁶ Bonye nu̱ njif nang zaki kha nduki khang chele ɓaanu wa kha wanang.

⁷ Leendang, ndu̱m ma nu̱ ve nda, tun du̱ng memu̱naran tu̱k, ma ku̱ su̱bu̱rti memu̱narang duk du̱mbu̱r ɓaran ɓa.

⁸ Ku̱me nang nga khutonu, wut ma ndolar yenda maɗyi.

⁹ Nga bu̱la lagarkati nang ye nu, ma na nga mbu̱ tun ka mbu zu̱r ɓang aa nyi sarchi.

¹⁰ Kap njif nun ndu̱mki nu̱ ve nda mbu̱ wa shi ɗyi ngguri, nga ndu̱m tu̱k. Yang ɗyi nang ndu̱mkyang, mbu̱ ɗyi nggur a nje ma ndu̱m nga, nga ndu̱m ku̱me tunu, barke ɓu̱ Masiya,

¹¹ ma ku̱ Sheɗan gwa ma lamba rem ɓa, nu̱ke chem wa zu̱n ɗye shir ɓaranang.

Damtar ɓu̱ Bulus mbu̱ ghai Tu̱rowas

¹² Sarchi nanga ɓa ki Tu̱rowas ma wopa Labar mbarkandi ɓu̱ Masiya, Zhinkir gwaanji wa qu̱n njiv ya,

¹³ yang nga damta maɗyi ku̱me nang gwa mu̱dla Titus nje ɓa. Nu̱ke wanangang, tang shi khar mu̱ndi ndu̱ wora, tang peeta nu̱ Makidoniya.

Rar Wute mbe Masiya

¹⁴ Nga kuna Magham, chin nu̱ka khaki nu̱ gume rem aakochi chem a ra wute mbe Masiya. A boote ndu̱ chem ma ɗyem chem a wopa Labar mbarkandi ɓu̱ Masiya aa fu̱n wa ɗye zhi mu̱nkandi nu̱ zhiran dlu̱ki aa fu̱n.

¹⁵ Jiwa chem a khar wa ɗye zhi mu̱nkandi nu̱ Masiya zoɓaki ye Magham, tu̱ zhiranang dlu̱ maari tu̱ ɗu̱ chele nduki nu̱ke a ɗana wor ndu̱ nduki nu̱ke a ɗyin njiv yir ma mu̱ti.

¹⁶ She nduki nu̱ke a ɗyin njiv mu̱ti, zhi ɓu̱ ɗye zhi mu̱nkandang ɗya zhi mu̱ti, nu̱ka tlaghaki nduku, yang she nduki nu̱ke a gwa ɗanari, zhi ɓu̱ ɗye zhi mu̱nkandang ɗya zhi nyifi nu̱ka vu̱rki nyifiri. Nu̱ dar kuɗar tlu̱nar nang a nje ɓa.

¹⁷ Ɓaarem nyem kha wa ɓeeni nduki nu̱ke a wopa Labar Mbarkandang ma gwa tun ɗyinan ɓa. Yang nu̱ke Magham ru̱kki remang, chem a zu̱kya zhire gume nda, ye khar ɓaarem nu̱ tlu̱narku ɓu̱ Masiya.