1 Korintiyeku 8 - Mewar Alqawarang

Ɗye Zu̱mndi nu̱ Sadkaki ye Mu̱lu̱mku

¹ Ɗyine ɓalar ɓu̱ ɗye zu̱mndi nu̱ shiki sadke su̱ ye mu̱lu̱mku, chem wa zu̱n nu̱ ɗyine chem wa shi zu̱ndi kap ɓaarem. Yang zu̱ndi wa ka sa nduk tu̱ ka shi gwaari ɗyin, ɓu̱ ndola yang ka sakya nduk tu̱ shaata aaki.

² Kap njif nu̱ tamanki za chin wa zu̱n aa nu̱m, nu̱ zu̱n ɗyi nu̱ shipaki ku̱ zu̱n nji dong ɓa.

³ Yang njif nu̱ke a ndola Magham, Magham wa zu̱n nda.

⁴ Ɗyine ɓalar ɗye zu̱mndi nu̱ka vu̱rki ye mu̱lu̱mku nang, chem wa zu̱n nu ɗyine, mbu̱ larji nang kap, mu̱lu̱m ɗya aa nu̱m ɓa, chem wa zu̱n Magham kaada, yang Maghamndi nggur a nje tu̱k ɓa.

⁵ Aa nu̱ke ɗyiku a nje nu̱ka qaki wor za “maghamndiku” aa viɗi aa vu̱ghai, nu̱ke maghamndiku ndu̱ ɗye ghaari ghaiku a nje khang,

⁶ yang kap ndu̱ nang, ɓaarem she rem, Magham kaada. Chin ke Zhinkir nu̱ke aa nu̱m a ɓa she nda, chem kha ndu̱ nyifiri ku̱me chin, Zhinerem gwaanji kaada tu̱k, chin Yesu Masiya, chin nu̱ke aa nu̱m a vi nu̱ ku̱nshe nda, chem a shikya khar ɓaran.

⁷ Yang aaki zu̱nki zhire nang ɓa, ɓeeni nduki wa su̱n vaanda nu̱ mu̱lu̱mku nu̱ke ma ɓar leendang a daran ku za mbu̱ wor wa zu̱m ɗye zu̱mndi nu̱ vu̱rki ye mu̱lu̱m, yel ɗya ɗye zu̱mndi ɓu̱ mu̱lu̱m. Ku̱me konyi ɓaanda kata, tu̱ ku̱s tamandan ku za wor wa shi zop nu̱ ku̱nshe zu̱mndi ɗye zu̱mndang.

⁸ Ɗye zu̱m ɓu̱ sa chem kha bing ndu̱ Magham ɓa. Mbu̱ nyem zu̱m ɓa chem kata ɓa, yang mbu chem wa zu̱m chem ɓu̱ paata ɓa.

⁹ Yang shi ma laya laya ku̱ gwar zalale nang sa tun a ɓa ndu̱ ɗye nggu̱di ɓu̱ nduki nu̱ke khukhutan mbe maito ɓaanda ɓa.

¹⁰ Leendang mbu̱ njif nggur wa na ro, to nu̱ke ta shi zu̱ndi, ta zu̱m ɗye zu̱mndi mbu̱ maa ghaari ghai ye mu̱lu̱mku, alapa nang ɓu̱ sa wor tu̱ zu̱m ɗye zu̱mndi nu̱ vu̱rki ye mu̱lu̱mku ɓa goma, nu̱ke khukhutan ku?

¹¹ Ta na zu̱ndi ɓaarang a ɓa ndu̱ nggu̱di ɓu̱ mu̱dlo nu̱ Masiya mu̱tki ku̱me chin.

¹² Mbu̱ tun wa shi wanang tun wa shi zop ye nyeezonu nu̱ke khukhutan mbe konyi ɓaanda, yang tun shikya ye Masiya tu̱k. Tun a sa wor nu̱ mbu̱ damtar ku̱me ɓu̱ ɗu̱ma shakh chele ɓu̱ ɗyi mbarkandi ndu̱ ɗyi malkandi ku ɓa.

¹³ Ku̱me nang mbu̱ ɗyi nu̱ke nga zu̱mndan ka sa mu̱dla tu̱ shi zop, ngam ɓu̱ nji dlu̱ sar da ɓa ma ku̱ sa nga mu̱dla tu̱ shi zop ɓa.