1 Korintiyeku 15 - Mewar Alqawarang

Jiiri ɓu̱ Masiya Ɓar Mbe Mu̱ti

¹ Yang leendang, nyeezaku, nga shim ku̱ kor nga Labar mbarkandi nang zu̱ki ye nwang ye nu, chin labar nun dlu̱ki, tun ching nu̱ ɗyinanang.

² Tun gwa ɗanar ku̱men, mbu̱ tun wa khuɓ ɓalar nang zu̱ki ye nu mbari, mbu̱ wanang ɓa maito ɓaanu wa kha bam.

³ Ɗyi nu̱ dukki ndu̱ boota maɗyi mbu̱ ɗyiku nang zu̱ki ye nu, chin ke ɓalar nang dlu̱ki za, Masiya wa mu̱t ku̱me solar ɓaarem, ba wa nu̱ Bu̱lar ɓalar ɓu̱ Magham zu̱ki.

⁴ Wa pa nda gha, wa ji ndu̱ chin ye fu̱ɗar nu̱ kunung, ba wa nu̱ke a nje bu̱laran,

⁵ wa wut varan ye Kefas, kom tu̱ wut varan ye Gwaanggu̱m rapndang tu̱k.

⁶ Qu̱rse nang wa wut varan mbu̱ sarchi da ye nyeezerem nu̱ke khang ɓaanda wa duk won qurmun, khang chele nduki nang a nje ku ndu̱ nyifiri, aa nu̱ke ɓeenan wa mu̱t ku.

⁷ Qu̱rsan wa wut varan ye Yaqub, kom ndu̱ pudeku Gwaanggu̱m rapndang tu̱k.

⁸ Ye lauɗarsan kap, tu̱ wut varan ya, aa nu̱ke ngaa khar wa woi nu̱ khaki mbu̱ sarchi nu̱ke nu̱ khu̱l ɓa.

⁹ Nga ke kataran kap chele pudeku ɓu̱ Yesu, nang khu̱l ku̱ qa nga pude ɓu̱ Yesu ɓa, ku̱me nga vu̱r bonye ye tabar ɓu̱ nu̱ mbu Magham.

¹⁰ Yang mu̱nkir ɓu̱ Magham saki tang kha wa nu̱ke nga si leendang, mu̱nkir ɓaran nu̱ kha bam ɓa. Nga shi tlu̱nar nu̱ dukki ɓu̱ pudeku nang kap, aa nu̱ke ɗya nga shiki ɓa, ɗya mu̱nkir ɓu̱ Magham nu̱ke a su̱yen ndu̱ nga.

¹¹ Yang aa wor wopaki ɓalarang, aa nga shiki, chem a zu̱kya ɗyi dandi nang, yang nang ke ɗyi nun maitaki.

Jiiri mbe mu̱ti Fu̱ɗar wuri

¹² Yang nang ɗo, mbu̱ chem a wopa jiiri ɓu̱ Masiya ɓar mbe mu̱ti, nu̱m saki tu̱ ɓeeni nduki chele ɓaanu ka zu̱ za nduki nu̱ mu̱tki ɓu̱ ji mbe mu̱ti ku ɓa ndang na?

¹³ Mbu̱ nduki nu̱ mu̱tki ɓu̱ ji ku ɓa, nang wa wut nu̱ ɗyine Masiya ndu̱ ɗyinan nu̱ ji mbe mu̱ti ɓa.

¹⁴ Yang mbu̱ Masiya nu̱ ji mbe mu̱ti ɓa, wopar Labar mbarkandi nu̱ke chem a shiran wa kha bam, tun wa maita bam tu̱k.

¹⁵ Yang tu̱k chem wa shi kotama nu̱ ɗyine Magham, ku̱me chem wa saida za Magham wa ji ndu̱ Masiya ɓar mbe mu̱ti, yang wanang ɓa, mbu̱ mu̱tiku ɓu̱ ji ɗo ɓa.

¹⁶ Ku̱me mbu̱ mu̱tiku ɓu̱ ji ɓa, nu̱ ji ndu̱ Masiya zum ɓa.

¹⁷ Mbu̱ yang nu̱ ji ndu̱ Masiya ɓa, maito ɓaarem bam, chem a mbu̱ solar ɓaarem rong maa kaani.

¹⁸ Nang yang nduki nu̱ mu̱tki mbe Masiya, wa su̱ya ku bam ɗo.

¹⁹ Mbu̱ sar memu̱nar nu̱ke chem a shiran mbe Masiya nang, ku̱me nyifi nu̱ke ka lauɗan fan larji ɗyenda, tu̱ga chem wa duk aaki khar ma ɗye zhiyaye.

²⁰ Yang wa ji ndu̱ Masiya ɓar mbe mu̱ti shwat, nang wutki nu̱ ɗyine ka ɓa ji ndu̱ nduki nu̱ mu̱tki ku.

²¹ Nu̱ke mu̱ti a vi nu̱ ku̱nshe nduku, jiiri mbe mu̱ti a vi she nduk tu̱k.

²² Ba wa nu̱ke nduki kap a mu̱ti ku̱me ɗyi nu̱ Adamu shiki, wanang tu̱k, nduki kap ka ji mbe mu̱ti ku̱me ɗyi nu̱ Masiya shiki.

²³ Yang jiirang ka kha njeetlan gaanje yen, Masiya khaki nu̱ gumapaali, kom nduki nu̱ke ɓaran ye fu̱ɗar nu̱ke ka ɗa gaɓki.

²⁴ Kom lauɗar san ka ɗa ɓa, sarchi nu̱ke ka gaɓki ndu̱ kwaaɗar ye Magham qu̱rse wa su̱ya khu̱kheeti malkandiku nu̱ke a kwaaɗarku kap, ndu̱ nu̱ kwaaɗar ku, ndu̱ zalale ku.

²⁵ Ku̱me wa ku̱s ku̱ Masiya shi kwaaɗari, kope Magham wa khatl nu̱ zhangndi ɓaranku kap nu̱ mbu̱ saaran.

²⁶ Nu̱ zhangndi nu̱ke ka su̱yaki nda nu̱ gha ye lauɗar san kap ɗya mu̱ɗi.

²⁷ Jiwa “Magham wa sa aa nu̱m nu̱ mbu̱ bu̱nan.” Yang nu̱ zu̱ki za, “Aanu̱mang,” nu̱ wut za chin Magham nu̱ vu̱rki zalale yenda ɗyine aa nu̱m kapang, a mbu̱ bu̱nan ɓa.

²⁸ Sarchi nu̱ Magham gaɓki ndu̱ aa nu̱m nu̱ mbu̱ bu̱n Yi ɓaran, tu̱ Woyang tu̱k khan mbu̱ bu̱n Magham nu̱ gaɓki ndu̱ aa nu̱m nu̱ mbu̱ bu̱nanang, ma ku̱ Magham kha chin ke aa nu̱m ndu̱ aa nu̱m kap.

²⁹ Yang mbu̱ jiiri mbe mu̱ti nje ɓa, ɓu̱ nduki nu̱ shiki baptisme ye wor me ɓu̱ mu̱tiku ka shi kikimndana? Mbu̱ ɓu̱ ji ndu̱ mu̱tiku ɓa, nu̱m saki tu̱ shi baptisme ye nduki me ɓaanda na?

³⁰ Yang tu̱k nu̱m saki chem ki sa ɗyinerem nu̱ mbu̱ bonye aakocha na?

³¹ Nga me mu̱ti aakochi nyeezaku. Tu̱kti ndu̱ tun nu̱ke nga shiran ku̱me Masiya Yesu Zhinerem gwaanji saki tang zu̱ wanang.

³² Ye tamandi ɓaanu dakhlar nang shiki ndu̱ dlu gaariku Afisa nang, mbu̱ nga shi ku̱me ɗyi nu̱ke nduki ka saki memu̱na wor nu̱ ɗyinan, ngga gwakya nu̱m mban ɗo, mbu̱ke mu̱tiku ɓu̱ ji ɓa? “Bu zu̱m mi chem za, nu̱ke wuri chem a ma mu̱ti.”

³³ Ku̱ nduk lamba nu ɓa! “Khar ndu̱ nu̱ mu̱narku wa ka sa nduk mbarkandi tu̱ gaɓ ma nduk malkandi.”

³⁴ A gaɓ man mbu kwaari ɓaanu mbarkandi, tun njig tlu̱nar solari. Ɓeena nduki chele ɓaanu nu̱ zu̱n Magham ku ɓa. Nga zu̱ wanang ma ku̱ tu̱k nu kawa.

Pooni Man Var nu̱ke Mu̱tiku ka Jiiki si

³⁵ Yang ɓeenan ka zham za, “Ka ji ndu̱ mu̱tikwang kikimndana? Ka ɗa vi ku ndu̱ nyi pooni manva?”

³⁶ Nggu̱bu̱ngi! Ɗyi no kaɓki nu̱ka ɓana ɓa kope wa mu̱ɗi.

³⁷ Yang ɗyi no kaɓkyang nang ke ɗyi nu̱ke ka ɗa ɓanaki ɓa, to kaɓkya ye pon, aa ye alkama, aa ɓu̱ ɗyi nggur zum, yang ka ɗa ɓanakya ɗyi nggur zum.

³⁸ Magham ke nu̱ vu̱r shipar nggur zum ye ɗyi no kaɓkyang ba wa nu̱ shimki, aa nyi ye pooni ndu̱ pooni shipar nu̱ke kaɗa ɓanaki si.

³⁹ Manva nu̱ kha wayen ɓa. Man var nduk zum, ɓu̱ ɗye nggarku zum, ɓu̱ ɗyikhtiku zum, ɓu̱ yurviku zum tu̱k.

⁴⁰ Mbu̱ ɗyiku nu̱ Magham du̱ngki, pooni ɗyiku a nje nu̱ Magham du̱ngki nu̱ mu̱na viɗi, pooni ɗyiku a nje tu̱k nu̱ du̱ngki nu̱ vu̱ghai. Yang zhaaji ɓu̱ ɗyiku nu̱ viɗi zum ndu̱ nu̱ yaghai.

⁴¹ Zhaaji ɓu̱ fu̱ɗa zum, ɓu̱ chere zum, ɓu̱ anjinjeku zum tu̱k, yang aa chele ɓu̱ anjinjekwang, anjinje nggur wa duk nggur ndu̱ zhaaji.

⁴² Jiiri mbe mu̱ti ba wanang tu̱k. Man var nu̱ paki gha wa ka mu̱tli, man var nu̱ jiiki nu̱ka shi mu̱tli ɓa.

⁴³ Ka pa gha zhaaji su̱ ɓa, yang ka ji ndu̱ chin mbu̱ zhaaji. Ka pa gha du̱mbu̱r su̱ ɓa, ka ji ndu̱ chin du̱mbu̱ran.

⁴⁴ Ka pa gha ɗya var nduku. Ka ji mbu̱ man var ɓu̱ jiimba. Nu̱ke man var nduku a nje, man var jiimba a nje tu̱k.

⁴⁵ A nje bu̱laran za, “Njif nu̱ gumapaali, chin Adamu, wa kha ma nduk nu̱ nyifi.” Yang Adamu nu̱ gana ɗya jiimbi nu̱ka vu̱rki nyifiri.

⁴⁶ Nu̱ jiimbyang a ɓa ki gumapaali ɓa, ɗya chin ndukang a ɓa ki kom tu̱ jiimbyang a ɓa.

⁴⁷ Njif nu̱ gumapaalyang shir nda ndu̱ kalau ghai, a ɓa vu̱ghai. Nu̱ rapndang yang a ɓa viɗi.

⁴⁸ Ba wa nu̱ke njif nu̱ vu̱ghai a si, wanang tu̱k nduk nu̱ shiki ndu̱ ghai ka khaki, ba wa nu̱ke njif na viki viɗang a sang wanang tu̱k nduk nu̱kya viɗang ka khaki shiku̱tku̱t.

⁴⁹ Yang ba wa nyem daki shipar ɓu̱ njif nu̱ shiki nda ndu̱ kalau nang, chem ka da shipar ɓu̱ njif nu̱ ɗa ɓa ki viɗang tu̱k.

⁵⁰ Nyeezaku, ɗyi nu̱ke nga zu̱ranang chin ke, ɓu̱ shi ku̱ man vaarem nu̱ke ɗya dlu ndu̱ tom gwa kwaaɗar ɓu̱ Magham ɓa, yang ɗyi nu̱ka mu̱tlki ɓu̱ kha wa ɗyi nu̱ke nu̱ka mu̱tl ɓa ɓa.

⁵¹ Gwa ma dlu̱mdonu, nga ma zu̱ ɗyi tukakandi nggur ye nu! Chem ɓu̱ mu̱t kap ɓa, ka ɓa mbu̱m shipar ɓaarem yerem nu̱gha kap ɓaarem,

⁵² ɗyen ka shi ba ku̱luw, mbu̱ kelep yiti, mbu̱ wa pi domndi nu̱ gana. Jiwa ka ɓa pi domndi, tu̱ ji ndu̱ mu̱tiku ndu̱ manvarku nu̱ke nu̱ka shi mu̱tl ɓa, ka nggoɗ shipar ɓaarem yerem nu̱gha tu̱k.

⁵³ Jiwa wa ku̱s ku̱ manvar nu̱ka mu̱tlki mbu̱m tu̱ kha ma nu̱ka shi mu̱tl ɓa, manvar nu̱ka mu̱tki nang ka kha nu̱ka mu̱t ɓa.

⁵⁴ Sarchi nu̱ke manvar nu̱ka mu̱tlkyang mbu̱mki tu̱ kha nu̱ka mu̱tl ɓa, man var nu̱ka mu̱tki nang tu̱ kha nu̱ka mu̱t ɓa. Ɓalar nu̱ke a nje bu̱laran nang ka ɓaa khan si ye sarchi ni, nu̱ zu̱ki za, “Wa ɗu̱ka mu̱ti ɓara, wa ra nda.

⁵⁵ To, mu̱ɗi, a fu̱n ke loobo ɓaara? To, mu̱ɗi, a fu̱n ke ɗye taɓti ɓaara?”

⁵⁶ Ai, sola ke ɗye taɓti ɓu̱ mu̱ɗi, yang kuma ke du̱mbu̱r ɓu̱ sola.

⁵⁷ Ku̱ kunar kha Magham nu̱ka saki chem shi loobo nu̱ ku̱nshe Zhinerem gwaanji Yesu Masiya.

⁵⁸ Ku̱me nang, nyeezaku nu̱ke nga ndolaran, ching ma gha shaanggu̱ɗang, song nu ɓar ɓa, tun a vu̱r vaanu ye tlu̱nar ɓu̱ Zhinerem gwaanji. Ku̱me tun wa zu̱n nu̱ ɗyine bonye nu̱ke tun a shiran ku̱me Zhinerem gwaanji ɓu̱ kha bam ɓa.