1 Korintiyeku 14 - Mewar Alqawarang

Vu̱rtiku nu̱ Ɓalar mbu̱ me Ghiindiku zum zum ndu̱ Zu̱r Ru̱kti ɓu̱ Magham

¹ Laɓ ma kya ndola tun kasha vu̱rtiku ɓu̱ Jiimbi shakhshakhndi, nu̱ shi wa vu̱rti nu̱ zu̱r ru̱kti ɓu̱ Magham ɓa.

² Ku̱me nu̱ ɓalar mbu̱ me ghiindiku zum zum a shiran ndu̱ nduk ɓa ɗo, a ɓalarang ye Magham, ku̱me nduk a nje nu̱ke a da mbu̱ ɗyi nu̱ke a zu̱ran ɓa, nu̱ke a zu̱kya ɗyi tukakandi nu̱ ku̱nshe zalale ɓu̱ Jiimba.

³ Yang njif nu̱ke a zu̱ ru̱kti ɓu̱ Magham a ɓalarang ndu̱ nduki ma ku̱ shaata wora, ku̱ pa du̱mbu̱r ye wora, ku̱ du̱ng memu̱na wora.

⁴ Njif nu̱ke a ɓalar mbu̱ me ghiindi a du̱ngkya ɗyinan, yang njif nu̱ke a zu̱ ru̱kti ɓu̱ Magham a du̱ngkya tabar ɓu̱ nu̱ mbu Yesu.

⁵ Nga shim ku̱ shi nu ɓalar mbu̱ me ghiindi kap ɓaanu, yang nga duk shimndan ku̱ zu̱ nu ru̱kti ɓu̱ Magham. Njif nu̱ka zu̱ki ru̱kti ɓu̱ Magham wa duk nu̱ ɓalar mbu̱ me ghiindi gwaari, buka mbu̱ nduk a nje nu̱ zu̱ki mban ye tabar ɓu̱ nu̱ mbu Yesu ku ma ku̱ gor ku.

⁶ Yang ɓa, nyeezaku, mbu̱ nga ɓa she nu nga ɓalar ye nu mbu̱ me ghiindiku, nga boota nu ndu̱ nu̱ma, mbu̱ na nga ɓa ye nu ndu̱ nu̱ zu̱r mban ɓa. Yang ɓalar zu̱ndi ɗyi nggur ɓa, ɓalar ɓu̱ Magham ɓa, yang nga shogakya ɓalar ɓu̱ Magham ye nu rong ɓa?

⁷ Na ma nu̱ ve ɗye dlu̱rti ku ɓa, wa pelnggum ndu̱ sumbuli, mbu̱ su̱qur wor nu̱ ɗa vi mbar ɓa, ki ka zu̱nki ɗyi nu̱ke a piiran ndu̱ dlu̱rtanang?

⁸ Mbu̱ke nu̱ pi domndi nu̱ pooni qar nu̱ka shiki mbu̱ dakhla wa ji ɓa, ki ka daasaki ma yir ma dakhlarang na?

⁹ Ka kha ye nu wanang tu̱k, mbu̱ tun a ɓalar ndu̱ me ghiindiku nu̱ke nduki nu̱ zu̱n ɓa, ka da mbu ɗyi nu̱ke tun a zu̱ranang kikimndana? Ɓalar ɓaanu wa kha bam ɗo.

¹⁰ Me ghaiku a nje khang mbu̱ larji nang, yang aa nyi me ghai ye mbu si.

¹¹ Yang mbu̱ nang da mbu̱ me ghai nu̱ke njif nggur a shiran ɓa, ngga kha runggini she nda, tu̱ kha runggu sha tu̱k.

¹² Wanang tu̱k ye nu. Nu̱ke tun a kasha gwar vu̱rtiku ɓu̱ Jiimba, tun vu̱r du̱mbu̱r ɓaanu ye boote ndu̱ vu̱rtiku nu̱ke ka du̱nki tabar ɓu̱ nu̱ mbu Yesu.

¹³ Ku̱me nang, nu̱ ɓalar mbu̱ mewar ghiindiku, ku̱ shi barar tu̱ gwa vu̱rti nu̱ke ka zu̱ki mban ye nduki.

¹⁴ Mbu̱ nga shi barar mbu̱ mewar ghin, jiimba kya barari, yang nu̱ boota kwaari ɓang ndu̱ aa nu̱m ɓa.

¹⁵ Yang shi nga kya nu̱ma? Ngga shi barar ndu̱ jiimba, yang ngga shi tu̱k ndu̱ kwaari ɓanga. Ngga shi taazi gwaari dlu̱m Magham ndu̱ jiimba, yang ngga shi ndu̱ kwaari ɓang tu̱k.

¹⁶ Mbu̱ wanang ɓa, to ka kuna Magham ndu̱ jiimbor ɗyenda, yang njif nu gwaki dlu̱mndan yoro yang nu̱ da mbu̱ ɗyi nu̱ke ta zu̱ranang ɓa. Ka tlogha za, “Ku̱ shi wanang” ku̱me kunar no shikyang kikimndana, nu̱ke nu̱ zu̱n ɗyi no zu̱ki ɓa?

¹⁷ Aa nu̱ke ta kuna Magham maɗyi, yang njif naandangang nu̱ boota ndu̱ aa nu̱m ɓa.

¹⁸ Nga kuna Magham ku̱me nga ka shi ɓalar mbu̱ ghiindiku tu̱ duk ɓu̱ aaki chele ɓaanu.

¹⁹ Yang kap ndu̱ nang, mbu̱ nga chele tabar ɓu̱ nu̱ mbu Yesu, ngga shim ku̱ zu̱ nga ɓalar wor qurmun nu̱ke nduk ka daki mban ma ku̱ nduk shoga ɗyi ngguri, ye zu̱ nga ɓalarku aru ndu̱ me ghai ngguri.

²⁰ Nyeezaku, ku̱ kwaari ɓaanu kha wa qusongga ɓa, ye maa ɗye mu̱na, tun kha wa ɓeelar woi, yang ku̱ kwaari ɓaanu kha wa nduk gori.

²¹ A nje bu̱laran mbu̱ Bibitang za, “Ngga shi ɓalar ye nduki nang nu̱ ku̱nshe nduki nu̱ me ghai zumndi, mbu̱ mewar me ghiindi, yang kap ndu̱ nang ɓu̱ gwa dlu̱mndi wor ya ɓa.” Nang ɗya zu̱r ɓu̱ Zhinkir gwaanji.

²² Yang alapa me ghiindiku ɗya ɗyi nu̱ke nduki nu̱ maitaki ku ka naki nu̱ si ɓa, nduki nu̱ke nu̱ maita ɓa ka naki nu̱ si. Yang zu̱r ru̱kti ɓu̱ Magham shi ku̱me nduki nu̱ maitaki, ɗya ɓu̱ nduki nu̱ke nu̱ maita ɓa ɓa.

²³ Mbu̱ nu̱ mbu Yesu ku wa taba, tu̱ yang aaki ki ɓalar ndu̱ me ghai nggur zum. Tu̱ yang nduki nggur vi nu̱ she nu nu̱ke nu̱ zu̱n ɗyi nu̱ke tun a shiran ɓa, aa ɗya nduki nu̱ke ɗya nu̱ mbu Yesu ku ɓa, ɓu̱ zu̱ ku za tun wa gu̱r yir ɓa goma?

²⁴ Yang mbu̱ aakya zu̱kya ru̱kti ɓu̱ Magham, tu̱ njif nggur nu̱ke ɗya nu̱ mbu Yesu ɓa, yang nu̱ zu̱n ɗyi nu̱ke tun a shiran ɓa a vi nu̱ she nu, ɓalarang ka su̱ɓa memu̱naran, tu̱ nggoɗi.

²⁵ Ɗyi tukakandi nu̱ mbu̱ memu̱naran ka ra, tu̱ nggu̱ɗ nu̱ ye ghai tu̱ ghar ghai ye Magham, a zu̱ran za, “Magham a nje su̱yen ndu̱ tun shwat.”

Shi ma Ghaari ghai Ɓaanu wa nu̱ Shipaki

²⁶ Yang tun ka shi kim ɗo nyeezaku? Mbu̱ tun wa taba kap, yang njif nggur a qa taazi gwaari dlu̱m Magham, njif nggur a shikya shogar ɓara, njif nggur a ɓalar ndu̱ mewar me ghin, njif nggur a zu̱kya ɗyi nu̱ Magham wutki yenda. Yang ɓu̱ njif nggur a zu̱kya mbu̱ ɗyi nu̱ke nu̱ mewar me ghayang a zu̱ran, shi ma aa nu̱m ma ku̱ nduki gwa shaata tu̱ gor ku.

²⁷ Mbu̱ njif nggur a ma ɓalar mbu me ghiindi, ku̱ peeta nduki rap ma yir kunung ɓa, tu̱ yang shi ku nu̱ da da, njif nggur a zu̱ mbu̱ ɗyi nu̱ke a zu̱ran kwang.

²⁸ Yang mbu̱ nu̱ zu̱r mbanang a nje ɓa, ku̱ nduki nang kha yit mbu̱ tabar ɓu̱ nu̱ mbu Yesu kwang, tu̱ shi ɓalarang ye vaanda ndu̱ Magham.

²⁹ Annabiku rap ma yir kunung ku̱ shi ɓalarang, tu̱ ɓeenan nggu̱t mbu̱ ɗyi nu̱ zu̱ki kwang.

³⁰ Mbu̱ yang Magham wa wut tunu ye njif nggur mbu̱ tabarang, ku̱ nu̱ ɓalar nu̱ gumapaalyang ching gha.

³¹ Kap ɓaanu tun ka ɗu̱ma zu̱ ru̱kti ɓu̱ Maghamang nu̱ daa da, tu̱ aaki shoga tunu, tu̱ gwa par du̱mbu̱ri.

³² Ai, Jiimbi ɓu̱ annabiku a mbu̱ bu̱n annabiku.

³³ Maghamndi ɓaarem ɗya nu̱ rokhdla ɓa, ɗya nu̱ ɓar ndu̱ qaandi memu̱na. Wa nu̱ke a nje mbu̱ tabar ɓu̱ nu̱ mbu Yesu ku kap.

³⁴ Wa shipa ku̱ nusuku kha yit mbu̱ tabar ɓu̱ nu̱ mbu Yesu. Nu̱ vu̱r zalale ye wor ku̱ shi ɓala ɓa, ku̱ mbu ɗyi nu̱ke a nje, ba wa nu̱ shogar ɓu̱ Musa zu̱ki.

³⁵ Mbu̱ ɗyi nggur a nje nu̱ke a shim shogaran ku, ku̱ zham zhime wor kaari. Ku̱me ɗya ɗye kawa ku̱ nusu shi ɓala mbu̱ tabar ɓu̱ nu̱ mbu Yesu ku.

³⁶ Woɗye nggaasi ɓalar ɓu̱ Magham ɗyine nu mu, yang a ɓa ye nu tun ɗyenda mu?

³⁷ Mbu̱ njif nggur a nje nu̱ tamanki za chin annabi, aa taman za vu̱rti ɓu̱ Jiimbi nggur a nje kha nda, ku̱ zu̱n nu̱ ɗyine, ɗyi nang bu̱laki ye nu nang ɗya ɗyi nu̱ Zhinerem gwaanji zu̱ki ya.

³⁸ Mbu̱ yang njif nggur nu̱ damta si ɓa, damta nu ndu̱ chin zum ɓa.

³⁹ Ku̱me nang nyeezaku, sa ma memu̱na nu nu̱ ɗyine zu̱r ru̱kti ɓu̱ Magham, yang nggu̱tl nu ɓalar ndu̱ ghiindiku ɓa.

⁴⁰ Yang tun shi aa nu̱m ve njiv nu̱ shipaki, wa nu̱ shipaki.