Зәбур 8 - Изге Язма

¹ Җырчылар җитәкчесенә: «Гиттит» көенә. Давытның мәдхиясе.

² И Хуҗабыз Раббы! Бөектән-бөектер исемең җир йөзендә, шөһрәтең күтәрелгәндер күкләрдән югары!

³ Сабый һәм имчәк балалар теленнән Син, Үзеңә мактаулар яудыртып, дошманның вә үчленең авызын томаладың.

⁴ Син бар иткән күкләр киңлегенә, күк гөмбәзенә Син утырткан Айга вә йолдызларга баксам,

⁵ үз-үземә сорау бирәм: «Син шулай игътибар күрсәткән инсан кем ул?! Син шулай кайгырткан адәм баласы кем?!»

⁶ Кешене Син илаһи затлардан әллә ни ким яратмадың, дан вә кадер-хөрмәт таҗын башына кигездең.

⁷ Тудырган бар нәрсәң өстеннән хаким иттең аны, бар нәрсәне аның аяк астына салдың:

⁸ сарыкларны, үгезләрне, дала-кыр киекләрен,

⁹ күктәге кошларны, диңгездәге балыкларны, диңгез юлларын айкаган барлык җан ияләрен.

¹⁰ И Хуҗабыз Раббы! Бөектән-бөектер исемең җир йөзендә!