Зәбур 71 - Изге Язма

¹ И Аллаһы, гаделлек вә хаклык сыйфатыңны патшага – патшаның углына бүләк ит!

² Ул Синең халкыңны хаклык белән, бичара мазлумнарыңны гаделлек белән идарә итсен.

³ Таулар халыкка – бәрәкәт, рәхәтлек, калкулыклар хаклык җиткерсен.

⁴ Патша илдәге мазлумнарның хакын хакласын, фәкыйрьләрнең угылларын коткарсын, залимнәрне исә тар-мар итсен.

⁵ Аның гомере, күктәге кояш вә ай гомередәй, буыннан-буынга дәвам итсен.

⁶ Яңа чабылган болын өстенә яуган яңгыр кебек, туфракны дымландырган көчле яңгыр кебек килсен патша.

⁷ Хакимлеге көннәрендә тәкъвалар чәчәк атсын, ай нуры сүрелгәнче, илдә иминлек, муллык-бәрәкәт хөкем сөрсен.

⁸ Хакимлеге җәелсен диңгездән-диңгезгәчә, Фырат елгасыннан җир йөзенең очларынача.

⁹ Чүлдәге кабиләләр тез чүксен каршысында, дошманнары тузан яласын җиргә ятып.

¹⁰ Таршиш вә утрау патшалары аңа ясак түләсен, Шеба вә Себа патшалары бүләкләр китерсен.

¹¹ Барча патшалар сәҗдә кылсын каршысында, барча кавемнәр аңа коллык итсен.

¹² Хактыр: ялварып-инәлеп торган фәкыйрьне, яклаучысы булмаган мазлумны коткарыр ул.

¹³ Юксыл-мескенгә, фәкыйрьгә мәрхәмәтле булыр, мохтаҗның тормышын саклап калыр,

¹⁴ җәбер-золымнан йолып алыр, чөнки алар кадерледер аның өчен.

¹⁵ Гомере озын булсын шундый патшаның! Хәзинәсенә Шеба алтыннары аксын! Аның хакына гел догалар кылып торсын халык, көннең-көнендә хәер-фатихада булсын!

¹⁶ Кырларда иген ишелеп уңсын, тау итәкләрендә башаклар чайкалып торсын – Ливан тавындагы кебек алар тук булсын; шәһәрләрдә халык даладагы үлән санынча бихисап булсын.

¹⁷ Патшаның исеме мәңге яшәсен, даны кояш гомередәй озын-озак булсын; исеме белән кавемнәр мөбарәк кылынсын, халыклар аны бәрәкәт иясе дип атасын.

¹⁸ Могҗизалы эшләрне тудыручы Раббы Аллага, Исраилнең Алласына мактау-шөкерләр яусын!

¹⁹ Шанлы исеме мәңге мөбарәк булсын, бөтен җир йөзенә Аның дан-шөһрәте җәелсен! Амин, амин!

²⁰ Ишай углы Давытның догалары шушында тәмамлана.