Зәбур 54 - Изге Язма

¹ Җырчылар җитәкчесенә: кыллы уен коралларында. Давытның нәсыйхәт сүзләре.

² И Аллаһы, догама колак сал, ялваруларымнан яшеренмә!

^3-4 Яхшылап тыңла мине, җавап бир! Дошманым тавышыннан, яман бәндәнең җәбер-золымыннан хафага калдым, хәсрәт эчендә интегеп яшим. Алар миңа нахак бәла ягалар, усалланып миңа каршы золым кылалар.

⁵ Эчемдә әрнеп-әрнеп сыза йөрәгем, яныйдыр миңа үлем дәһшәте.

⁶ Курку-тетрәнүләр, шомлы уйлар биләп алды минем җанымны.

^7-9 Шулчак мин үз-үземә әйттем: «Күгәрченнекедәй канатларым булса, ерак-еракларга очып китәр идем дә, берәр аулак сахра җиргә төшеп, бар җил-давыллардан яшеренер һәм тынычланып калыр идем!» – дидем.

^10-11 Туздыр үзләрен, и Хуҗа-Хаким, куешкан сүзләре таркалсын, чөнки шуны күрәм мин шәһәрдә: көчләү, гауга йөри көн-төн диварларда, җинаять вә афәт һәр җирдә;

¹² һәлакәт хөкем сөрә шәһәр эчләрендә, золым белән ялган тулган урамнарга.

¹³ Мине дошман күргән кемсә хурласа, әле түзәр идем; миңа үчле берәү мәсхәрәләсә, аңардан кача алыр идем.

^14-15 Әмма шундый булдың, әй син дә, үземдәй якын күргән ишем, сердәш дустым, ихлас әңгәмәдәшем, бергә Аллаһы йортына йөргән юлдашым.

¹⁶ Өйләре вә йөрәкләре явызлык тулы дошманнарны якаларыннан үлем эләктереп алсын, тереләй дөмексеннәр алар үлеләр дөньясына.

¹⁷ Мин исә Аллаһыга ялварып дәшәрмен, һәм Ул, Раббы, мине коткарыр.

¹⁸ Иртә-кичен, төшлектә дә инәлеп Аңа аһ-зарымны белдерермен; инәлү авазымны ишетер Ул,

¹⁹ миңа каршы аякланган дошманнарым исәпсез күп булса да, алардан җанымны саклап калыр.

²⁰ Әзәлдән Үз тәхетендә утырган Аллаһы, фөрьядымны ишетеп, дошманнарны тар-мар итәр; юлларын үзгәртергә теләмәгәннәре, Аллаһыдан куркуны белмәгәннәре өчен булыр бу.

²¹ Әнә шулай дусларына кул озайтты, үз антына хыянәт итте ул.

²² Сөйләгән сүзләре майдай йомшак, балдай татлы булса да, күңелендә аның – дошманлык, теле аның – үткен кылычтыр.

²³ Кайгы йөгеңне син Раббыга тапшыр, Ул сиңа таяныч булыр – тәкъва бәндәсенә егылырга ирек бирмәс.

²⁴ Хәйлә-мәкер корып яшәгән, канга сусаган яман бәндәләрне Син, Аллаһы, үлем чокырына хөкем итәчәксең; гомер юлының яртысын да яши алмый гаип булсын алар! Мин исә тик Сиңа сыенамын!