Зәбур 52 - Изге Язма

¹ Җырчылар җитәкчесенә: «Махалат» көенә. Давытның нәсыйхәт сүзләре.

² Акылсызның күңел төбендә «Аллаһы юк!» дигән уй ятар. Кешеләр азды, эшләре җирәнгечтер, игелек кылучы һичкем юк.

³ Аны эзләүче берәр акыллысы бармы икән дип, Аллаһы күктән бәндәләренә күз салды.

⁴ Юк, һәммәсе юлдан язган, бозыклыкка бердәй баткан; игелек кылучы күренми, һичкем юк!

⁵ Икмәк кисәге йоткандай, халкымны йотучы, Аллаһыга дога кылмаучы ул бозыклар шулай акылга килмәсме инде?

⁶ Хактыр: курыкмас җирдән дәһшәтле курку алачак әле аларны, чөнки Аллаһы сиңа каршы баш күтәрүченең сөякләрен таратып ташлар; Аллаһы читкә тибәргәнне син мәсхәрәгә калдырырсың.

⁷ Килсен Исраилгә котылу Сионнан! Аллаһы Үз халкына муллык-иминлек кайтаргач, Ягъкуб токымы сөенәчәк, Исраил халкы шатлык кичерәчәк әле!