Зәбур 150 - Изге Язма

¹ Раббыны данлагыз! Мөкатдәс урынында данлагыз Аллаһыны! Данлагыз Аны Үзенең кальгасында – күк гөмбәзендә!

² Данлагыз Аның кодрәтле гамәлләрен! Тиңсез бөеклеген данлагыз!

³ Данлагыз Аны мөгез быргы авазлары яңгыратып, лира вә гөслә кыллары чиертеп!

⁴ Данлагыз Аны барабаннар кагып, бии-бии! Кыллы уен коралларында, курайда уйнап данлагыз!

⁵ Данлагыз Аны хуш авазлы тәлинкәләр һәм яңгыравык тәлинкәләр чыңлатып!

⁶ Әй бөтен терек җаннар, Раббыны данлагыз! Раббыны данлагыз!