Зәбур 145 - Изге Язма

¹ Раббыны данлагыз! И күңелем, Раббыны данла!

² Гомерем ахырынача Раббыны данлаячакмын, исән чагымда Аллама мәдхияләр җырлаячакмын!

³ Түрә-башлыкларга өмет багламагыз, алар адәм затыннан гына – сезне коткара алмыйлар!

⁴ Җаны-рухы чыкты исә, адәм баласы үзенең туфрагына кире кайта, аның бөтен теләк-ниятләре шул көнне үк юк була.

⁵ Бәхетледер Ягъкуб Алласыннан ярдәм алганнар, өметен үз Алласына, Раббыга баглаганнар!

⁶ Күкне вә җирне, диңгезне, андагы бар нәрсәне яраткан, тугрылыгын мәңге саклап,

⁷ мазлумнарның хакын яклаган, ачларга ризык биргән Раббы ул! Раббы тоткыннарны иреккә чыгара,

⁸ Раббы сукырларның күзләрен ача, сыгылганнарны турайтып бастыра, тәкъваларны ярата-сөя,

⁹ читтән килгәннәрне саклап яшәтә, үксезгә вә тол хатынга ярдәмен күрсәтә, яман бәндәләрнең юлларын исә һәлакәткә илтә.

¹⁰ Раббы мәңге патшалык итәр, әй Сион, синең Аллаң буыннан-буынга патшалык итәр! Раббыны данлагыз!