Саннар 33 - Изге Язма

Мисырдан Үрдүн елгасына кадәр үткән юл

¹ Төркемнәргә бүленгән Исраил халкы, Муса белән Һарун җитәкчелегендә сәяхәт кылганда, түбәндәге урыннарда тукталды.

² Раббы кушуы буенча, Муса чүл сәфәре дәвамында туктап ял итәсе урыннарның исемлеген төзеде. Аларның барыр юллары һәм тукталышлары түбәндәгечә.

³ Беренче айның унбишенче көнендә, Котылу бәйрәменнән соң икенче көндә, мисырлыларның күз алдында алар, кыю атлап, Рәмесестән чыгып киттеләр.

⁴ Ул вакытта мисырлылар Раббы тарафыннан һәлак ителгән беренче булып туган угылларын җирли иделәр – Раббының Мисыр илаһларын хөкем итүе иде бу!

⁵ Исраилиләр, Рәмесестән кузгалып китеп, Суккөттә чатырларын корып урнаштылар.

⁶ Суккөттән китеп, чүл читендәге Этамда чатырларын корып урнаштылар.

⁷ Этамнан китеп, Багал-Сефоннан көнчыгышта урнашкан Пи-Һахирутка таба борылдылар һәм Мигдол каршында чатырларын корып урнаштылар.

⁸ Пи-Һахируттан китеп, диңгезне кичтеләр, аннары чүлгә чыктылар һәм, Этам чүле буйлап өч көн барганнан соң, Марада чатырларын корып урнаштылар.

⁹ Марадан китеп, Элимгә килделәр; Элимдә унике су чыганагы һәм җитмеш хөрмә агачы бар иде. Алар шунда чатырларын корып урнаштылар.

¹⁰ Элимнән китеп, Камышлы диңгез яры буенда чатырларын корып урнаштылар.

¹¹ Камышлы диңгез яры буеннан китеп, Син чүлендә чатырларын корып урнаштылар.

¹² Син чүленнән китеп, Дуфкада чатырларын корып урнаштылар.

¹³ Дуфкадан китеп, Алушта чатырларын корып урнаштылар.

¹⁴ Алуштан китеп, Рефидимдә чатырларын корып урнаштылар; анда халык өчен эчәргә су юк иде.

¹⁵ Рефидимнән китеп, Синай чүлендә чатырларын корып урнаштылар.

¹⁶ Синай чүленнән китеп, Кыйбрут-Һаттавада чатырларын корып урнаштылар.

¹⁷ Кыйбрут-Һаттавадан китеп, Хасеротта чатырларын корып урнаштылар.

¹⁸ Хасероттан китеп, Ритмада чатырларын корып урнаштылар.

¹⁹ Ритмадан китеп, Риммун-Переста чатырларын корып урнаштылар.

²⁰ Риммун-Перестан китеп, Либнада чатырларын корып урнаштылар.

²¹ Либнадан китеп, Риссада чатырларын корып урнаштылар.

²² Риссадан китеп, Кыһилатада чатырларын корып урнаштылар.

²³ Кыһилатадан китеп, Шефер тавында чатырларын корып урнаштылар.

²⁴ Шефер тавыннан китеп, Харадада чатырларын корып урнаштылар.

²⁵ Харададан китеп, Макыһелотта чатырларын корып урнаштылар.

²⁶ Макыһелоттан китеп, Тахатта чатырларын корып урнаштылар.

²⁷ Тахаттан китеп, Терахта чатырларын корып урнаштылар.

²⁸ Терахтан китеп, Миткада чатырларын корып урнаштылар.

²⁹ Миткадан китеп, Хашмонада чатырларын корып урнаштылар.

³⁰ Хашмонадан китеп, Мосеротта чатырларын корып урнаштылар.

³¹ Мосероттан китеп, Бәне-Ягаканда чатырларын корып урнаштылар.

³² Бәне-Ягаканнан китеп, Хор-Һагидгәддә чатырларын корып урнаштылар.

³³ Хор-Һагидгәддән китеп, Йотбатада чатырларын корып урнаштылар.

³⁴ Йотбатадан китеп, Абронада чатырларын корып урнаштылар.

³⁵ Абронадан китеп, Эсион-Гебердә чатырларын корып урнаштылар.

³⁶ Эсион-Гебердән китеп, Сыйн чүлендәге Кадышта чатырларын корып урнаштылар.

³⁷ Кадыштан китеп, Эдом җирләре чигендәге Һор тавында чатырларын корып урнаштылар.

³⁸ Исраил халкының Мисырдан чыгуына кырыгынчы ел киткәч, бишенче айның беренче көнендә, Раббының кушуы буенча, рухани Һарун Һор тавына менде һәм шунда вафат булды.

³⁹ Һор тавында үлеп калганда, Һарунга йөз егерме өч яшь иде.

⁴⁰ (Кәнган җиреннән көньякта, Нәгебтә яшәгән кәнгани Арад патша исраилиләрнең килүен ишетә.)

⁴¹ Алар, Һор тавыннан китеп, Салмунада чатырларын корып урнаштылар.

⁴² Салмунадан китеп, Пунонда чатырларын корып урнаштылар.

⁴³ Пуноннан китеп, Оботта чатырларын корып урнаштылар.

⁴⁴ Оботтан китеп, Мәаб чигендәге Ие-Әбаримдә чатырларын корып урнаштылар.

⁴⁵ Ие-Әбаримнән китеп, Дибон-Гадта чатырларын корып урнаштылар.

⁴⁶ Дибон-Гадтан китеп, Алмон-Диблатаимдә чатырларын корып урнаштылар.

⁴⁷ Алмон-Диблатаимнән китеп, Нәбу алдындагы Әбарим тауларында чатырларын корып урнаштылар.

⁴⁸ Әбарим тауларыннан китеп, Мәаб үзәнлегендә, Үрдүн елгасы янындагы Әрихә каршында чатырларын корып урнаштылар.

⁴⁹ Аларның чатырлары Үрдүн яры буйлап Мәаб үзәнлегендәге Бәйт-Ешимоттан алып Әбел-Шиттимгә кадәр урнашкан иде.

⁵⁰ Мәаб үзәнлегендә, Үрдүн елгасы янындагы Әрихә каршында Раббы Мусага:

^51-52 – Исраилиләргә әйт: «Үрдүн елгасын кичеп, Кәнган җиренә кергәч, ул җирдә яшәүчеләрне бөтенләй куып чыгарыгыз. Аларның коеп яки таштан сырлап ясаган барча потларын һәм потханәләрен пыр туздырыгыз, – диде. –

⁵³ Ул җирне яулап алыгыз һәм шунда хуҗа булып урнашыгыз, чөнки Мин ул җирне сезгә биләмә итеп бирәм.

⁵⁴ Ул җирне, шобага салып, ыруглар арасында бүлегез; зуррак ыругка – күбрәк, кечерәк ыругка азрак итеп җир бирегез; шобага кемгә чыкса, шул җир аныкы булыр. Җирне ата-бабаларыгызның токымнары арасында бүлегез.

⁵⁵ Әгәр ул җирдә яшәүчеләрне куып җибәрмәсәгез, сезнең арада яшәп калучылар күзегезгә кергән тикән, янтыгыгызга кадалган тигәнәк кебек булырлар: бу җирдә алар сезгә тыныч кына яшәргә ирек бирмәсләр.

⁵⁶ Шул чакта Мин, аларга каршы нәрсә эшләргә ниятләгән булсам, шуны сезгә каршы эшләрмен».