Әюб 28 - Изге Язма

Зирәклек турында кыйсса

¹ «Әйе, көмеш шахталары бар, алтынны юып таба торган урыннар бар.

² Тимерне – җирдән казып, бакырны мәгъдән эретеп табалар.

³ Кешеләр караңгылыкны чигендерәләр, таш эзләп, дөм караңгылык хөкем сөргән тирәнлекнең төпкеленә үтеп керәләр;

⁴ адәм заты яшәмәгән урыннарда мәгъдән коелары казыйлар, һичкем аяк басмаган ерак җирләрдә, шул коеларда, бауларда асылынып эшлиләр.

⁵ Менә, икмәк үстерә торган җир тирәндә-тирәндә утта эрегән сымандыр;

⁶ андагы ташларда зәңгәр якутлар яшеренгән, алтын бөртекләре сибелгән.

⁷ Шунда илтүче юлны ерткыч кошлар белми, лачынның күзе аны күрә алмый;

⁸ анда кыргый җанвар да йөрмәгән, арыслан да аяк басмаган;

⁹ ә кешеләр таш кыяларга кулын күтәрә, тауларны төбе-тамыры белән әйләндереп ташлый;

¹⁰ тау-ташлар арасында канаулар казый, һәм аларның күзе барча шул хәзинәне күрә;

¹¹ елга суларына алар буалар кора һәм яшерен хәзинәләрне дөнья йөзенә чыгара.

¹² Ә зирәклек каян табыла соң, зиһеннең чыганагы кайда?

¹³ Аңа илтүче юл кешегә билгесез – бу терек дөньяда аны эзләп табу мөмкин түгел.

¹⁴ Төпсез тирәнлекләр: „Миндә ул юк“, – дияр, „Миндә дә юк“, – дип әйтер диңгез.

¹⁵ Алтын түләп алып булмый аны, көмеш үлчәп биреп тә алалмыйсың;

¹⁶ Офир алтыны белән дә, затлы ахак яки зәңгәр якут белән дә бәяләнми ул.

¹⁷ Алтын һәм кыйммәтле пыяла белән дә тиңләшми ул, саф алтын савытка да алыштыра алмыйсың аны.

¹⁸ Мәрҗән вә бәллүр турында уйлыйсы да юк, зирәклекнең бәһасе энҗеләрдән кыйммәтрәк.

¹⁹ Хәбәшстан топазы да тиңләшә алмый аның белән, саф алтын белән дә бәяләнми ул.

Зирәклекнең кайда икәнлеген Аллаһы гына белә

²⁰ Алайса, зирәклек каян килә соң? Зиһеннең чыганагы кайда?

²¹ Ул бар терек җанның күзеннән яшерелгән, күк кошларыннан да качырылган.

²² Хәтта Һәлакәт белән Үлем дә: „Аның турында ишетеп кенә беләбез“, – диләр.

²³ Бары тик Аллаһыга мәгълүм аңа илтүче юл – аның кайда икәнлеген Аллаһы гына белә.

²⁴ Аның карашы җирнең читләренә кадәр җитәдер, күкләр астында ни-нәрсә барлыгын күреп-күзәтеп тора Ул.

²⁵ Җилләргә куәт биргәндә, суларның чиген билгеләгәндә,

²⁶ яңгырларга – яву вакытын, яшенле яңгырларга юл күрсәткәндә,

²⁷ зирәклекне күреп алды Ул һәм кадерен аңлады, сынап карап, югары бәясен бирде.

²⁸ Ә кешегә Ул болай диде: „Хуҗа-Хакимнән курку – зирәклек ул, явызлык кылмау – гакылдыр“».