Әюб 10 - Изге Язма

Син мине бар иткән идең, хәзер юк итәргә телисеңме?

¹ Яшәүдән гайрәтем чикте, кайгыларымны түгим әле, җаным ачыргаланудан сөйлим әле.

² Аллаһыга әйтермен: хөкем чыгарырга ашыкма! Нәрсәдә гаеплисең Син мине?

³ Мине җәберләвең шулай бик яхшы дисеңме?! Үз кулларың белән яратканны кире кагып, яманнарның мәкерен хуплавың әйбәт нәрсәме?!

⁴ Әллә Синең дә күзләрең гади кешенеке сыманмы?! Син дә дөньяга кешеләр кебек карыйсыңмы?!

⁵ Әллә Синең көннәрең аларның көннәре кебекме?! Елларың адәм затыныкы кебек кыскамы?!

⁶ Шуның өченме син миннән гаеп эзлисең, гөнаһ табарга телисең?

⁷ Син минем гаепсез икәнемне, Синең куеныңнан берәүнең дә коткара алмаячагын беләсең.

⁸ Синең кулларың мине бар итте, әвәләде, хәзер, кире уйлап, мине юк итәргә телисеңме?

⁹ Исеңдәме: Син мине балчыктан әвәләп бар иткән идең, инде янә туфрак хәленә кайтарасыңмы?

¹⁰ Мине яратканда, савытка сөт салган кебек, эремчек итеп куерткан Син түгел идеңме?!

¹¹ Син мине, ит һәм тирегә төрендереп, сөяк, сеңерләргә кушып тукыдың.

¹² Миңа тормыш бирдең, мәрхәмәтле булдың; мине кайгыртып, рухымны саклап тордың.

¹³ Ләкин йөрәк түреңдә башка нәрсә дә яшеренгән булган икән, мин беләм, Синең ниятең шундый булган:

¹⁴ мине күзәтеп торырга һәм, әгәр гөнаһ кылсам, гаебемне җәзасыз калдырмаска.

¹⁵ Әгәр гаепле икәнмен – беттем мин! Ә инде гаепсез икәнмен – анда да башымны күтәрә алмамын; кимсетүләрдән гарыкмын һәм кайгылардан исерекмен.

¹⁶ Башымны гына күтәрәмен – арыслан кебек ташланасың, янә миңа каршы дәһшәтле көчеңне күрсәтәсең:

¹⁷ миңа каршы яңа шаһитлар табасың, ачуыңны һаман ныграк кабартасың, һөҗүм арты һөҗүм оештырасың.

Ник Син мине бу дөньяга китердең?

¹⁸ Ник Син мине ана карыныннан бу дөньяга китердең? Тумас борын, беркем күрмәгән килеш үлгән булсам, яхшырак булыр иде –

¹⁹ ана карыныннан туп-туры кабергә күчеп, мин бөтенләй дөньяга килмәгән дә кебек булыр идем.

²⁰ Көннәрем санаулы гына – калдыр мине, аз гына хәл алырга мөмкинлек бир.

²¹ Мин бит тиздән караңгы, үлем сөременә чумган, мәңге әйләнеп кайтмаслык илгә –

²² дөм караңгылык, үлем сөреме баскан, яктылык та кара булып тоелган җыйнаксыз-таркау илгә китәм».