Ешуа 19 - Изге Язма

Шимун ыругы җирләре

¹ Жирәбәнең икенчесе Шимун ыругындагы нәселләргә чыкты; аларга дигән җирләр Яһүдә угылларының биләмәсе эчендә урнашкан иде.

² Алар өлешенә түбәндәге шәһәрләр чыкты: Беер-Шеба (ягъни Шеба), Молада,

³ Хатсар-Шугал, Балаһ, Эсем,

⁴ Элтолад, Бетул, Хорма,

⁵ Сыйкләг, Бәйт-Маркабут, Хатсар-Суса,

⁶ Бәйт-Лебаот һәм Шарухен – авыллары белән бергә барлыгы унөч шәһәр;

⁷ Аин, Риммун, Этер һәм Ашан – авыллары белән бергә барлыгы дүрт кала;

⁸ шулай ук Багалат-Беерга (ягъни Рамат-Нәгебкә) җиткәнче әлеге шәһәрләр тирәсендәге бөтен авыллар. Шимун ыругы нәселләренең биләмә җирләре әнә шулардыр.

⁹ Яһүдә угылларының биләмәсе артык зур булу сәбәпле, Шимун угылларына җир алар өлешеннән бүлеп бирелде. Шул рәвешле, шимуннарга тәгаенләнгән җирләр яһүдиләр биләмәсе эчендә булды.

Зәбулун ыругы җирләре

¹⁰ Жирәбәнең өченчесе Зәбулун ыругындагы нәселләргә чыкты; аларның биләмәсе Сарид шәһәренә кадәр сузыла.

¹¹ Саридтән соң чик сызыгы көнбатышка – Маргала шәһәренә таба бара да Даббешет шәһәренә һәм Йокнегам шәһәре каршындагы үзәнгә килеп җитә.

¹² Саридтән ул көнчыгышка юл ала, Кислот-Таворның янәшәсеннән узып, Дабератка юнәлә, аннары Яфия шәһәренә күтәрелә

¹³ һәм, көнчыгышка – Гәт-Хепер вә Эт-Касин шәһәрләренә – юлын дәвам итеп, Риммунга барып җиткәч, Нега шәһәренә таба борыла.

¹⁴ Шуннан соң ул Ханнатон шәһәрен төньяктан әйләнеп уза да Ифтах-Эл үзәненә җитеп туктый.

¹⁵ Зәбулун ыругы биләмәсенә тирә-яктагы авыллары белән бергә барлыгы унике шәһәр, шул исәптән Каттат, Наһалал, Шимрон, Идала һәм Бәйт-Лехем керде.

¹⁶ Зәбулун ыругы нәселләренең биләмә җирләре һәм шәһәр-авыллары әнә шулардыр.

Исәсхәр ыругы җирләре

¹⁷ Жирәбәнең дүртенчесе Исәсхәр ыругындагы нәселләргә чыкты.

¹⁸ Аларның биләмәсенә Изрегыл, Кесуллот, Шунем,

¹⁹ Хапараим, Шион, Анахарат,

²⁰ Раббит, Кышион, Эвес,

²¹ Ремет, Эн-Ганним, Эн-Хадда һәм Бәйт-Пасес шәһәрләре керде.

²² Ыругның биләмә чиге, Тавор, Шахасум һәм Бәйт-Шемеш шәһәрләре аша үтеп, Үрдүн ярына җитеп туктый. Исәсхәрләр уналты шәһәргә һәм шулар тирәсендәге авылларга хуҗа булды.

²³ Исәсхәр ыругы нәселләренең биләмә җирләре һәм шәһәр-авыллары әнә шулардыр.

Ашер ыругы җирләре

²⁴ Жирәбәнең бишенчесе Ашер ыругындагы нәселләргә чыкты.

²⁵ Аларның биләмәсенә Хелкат, Хали, Бетен, Ахшап,

²⁶ Аламмәлик, Амгад һәм Мишал шәһәрләре керде. Көнбатышта Ашер ыругының биләмәсе Кармил тавы һәм Шихор-Либнат елгасы белән чикләнә.

²⁷ Шул җирдән чик сызыгы, Бәйт-Дагон шәһәренә таба борылып, көнчыгышка – Зәбулун җирләренә һәм Ифтах-Эл үзәненә килеп тоташа. Аннары, Бәйт-Эмык һәм Нәгыил шәһәрләрен үтеп, төньякка – Кавул,

²⁸ Абдун, Рәхуб, Хаммон һәм Канага дәвам итә. Бөек Сидун шәһәренә килеп җитеп,

²⁹ Рамаһка таба китә һәм ныгытылган Сур каласына юл ала да, Хоса ягына борылып, диңгез ярында тәмамлана. Махалаб, Акзиб,

³⁰ Умма, Афык Һәм Рәхуб шәһәрләрен исәпкә алып, ашерлар биләмәсенә тирә-яктагы авыллары белән бергә барлыгы егерме ике шәһәр керде.

³¹ Ашер ыругы нәселләренең биләмә җирләре һәм шәһәр-авыллары әнә шулардыр.

Нәптали ыругы җирләре

³² Жирәбәнең алтынчысы Нәптали ыругындагы нәселләргә чыкты.

³³ Аларның биләмә чикләре Хелеп шәһәреннән һәм Сагананнимдә үсеп утырган имәннән башлана да Адами-Нәкыб һәм Явнеил аша үтә һәм, Лаккум шәһәренә җитеп, Үрдүн ярында тәмамлана.

³⁴ Көнбатышка таба чик сызыгы Азнот-Таворга, шуннан соң Хукок шәһәренә юл ала. Көньякта нәпталиләр биләмәсе – зәбулуннар җире белән, көнбатышта – ашерлар җире белән, кояш чыгышы тарафында Үрдүн елгасы белән чикләнә.

³⁵ Аларның биләмәсенә ныгытылган калалар Сиддим, Сер, Хаммат, Раккат, Киннерет,

³⁶ Адама, Рамаһ, Хатсор,

³⁷ Кыдыш, Эдрегый, Эн-Хатсор,

³⁸ Иреон, Мигдал-Эл, Хорем, Бәйт-Анат һәм Бәйт-Шемеш керә; тирә-яктагы авыллары белән бергә барлыгы унтугыз шәһәр.

³⁹ Нәптали ыругы нәселләренең биләмә җирләре һәм шәһәр-авыллары әнә шулардыр.

Дан ыругы җирләре

⁴⁰ Жирәбәнең җиденчесе Дан ыругындагы нәселләргә чыкты.

⁴¹ Аларның биләмә җирләренә Сурга, Эштаол, Ир-Шемеш,

⁴² Шагалабин, Айалун, Итла,

⁴³ Элун, Тимна, Экрон,

⁴⁴ Элтыкы, Гиббетон, Багалат,

⁴⁵ Еһүд, Бене-Берак, Гәт-Риммун шәһәрләре,

⁴⁶ Ме-Яркун, Раккун һәм Яфу каласы янындагы җирләр керде.

⁴⁷ Әмма Дан угыллары үзләренә тигән җирләрне югалталар һәм, яуга кузгалып, Лешем каласына һөҗүм итәләр; шәһәрне кулга төшергәннән соң, аның халкын кылычтан уздыралар һәм, биредә үзләре яши башлап, ерак бабалары хөрмәтенә Лешем каласына Дан дип исем кушалар.

⁴⁸ Дан ыругы нәселләренең биләмә җирләре һәм шәһәр-авыллары әнә шулардыр.

Нун углы Ешуаның өлеше

⁴⁹ Бөтен илне үзара бүлеп бетергәннән соң, исраилиләр үз җирләреннән Нун углы Ешуага өлеш чыгардылар.

⁵⁰ Раббы әмер иткәнчә, Ешуага алар Эфраим тауларыннан Ешуа үзе сайлаган Тимнат-Серах шәһәрен бирделәр. Шәһәрне төзекләндергәннән соң, Ешуа шунда яши башлады.

⁵¹ Рухани Элгазар, Нун углы Ешуа, шулай ук нәсел башлыклары, Очрашу чатыры алдында, Раббы каршында Шилоһта жирәбә салып, Исраил ыругларына бүлеп биргән биләмә җирләре әнә шулардыр. Шулай итеп, җирне бүлү тәмамланды.